އިބޫއަކީ ގޮނޑިކޮއްކޮ ސަރުކާރެއް ގާއިމްކުރުމަށް ނަޝީދު ނެރެގެން އުޅޭ ޕަޕެޓެއް: އަޒްލީން
އެއާޕޯޓް ޖީއެމްއާރަށް ވިއްކާލުމުގައި މޭސްތިރިއަކަށް ހުންނެވީ އިބޫކަމަށް ތުހުމަތުކުރެއްވި
ޕިޕީއެމް ސަރުކާރުގެ ހޯމްމިނިސް އަޒްލީން އަހުމަދު
އިދިކޮޅު ކެނޑިޑޭޓް އިބްރާހިމް މުޙައްމަދު ސޯލިޙު (އިބޫ) އަކީ ގޮނޑިކޮއްކޮ ސަރުކާރެއް ގާއިމްކުރުމަށް ކުރީގެ ރައީސް މުޙައްމަދު ނަޝީދު ނެރެގެން އުޅޭ ޕަޕެޓެއްކަަމަށް މިސަރުކާރުގެ ހޯމްމިނިސްޓަރ އަޒްލީން އަހުމަދު ވިދާޅުވެއްޖެއެވެ.
މައްޗަންގޮޅީގައި އެޕާޓީގެ ޖަގަހައެއް ހުޅުވުމަށް ބޭއްވި ހަފްލާއެއްގައި ވާހަކަފުޅު ދައްކަވަމުން އަޒުލީން ވިދާޅުވީ، އިދިކޮޅު ކެނޑިޑޭޓް އިބޫ ފުރަތަމަވެސް އެބޭފުޅާއަކީ އެއްވެސް މީހެއްގެ އަޅެއް ނޫންކަމަށް ވިދާޅުވިއަސް، އެހެން އެ ވިދާޅުވެވުނީ އަޅުވެތި ވެފައިވާލެއް ބޮޑުކަމުން ކަމަށެވެ.
އިބޫއަށް ވަަަރަށްބޮޑަށް ފާޑު ވިދާޅުވަމުން އަޒްލީން ވިދާޅުވީ ރާއްޖޭގެ އެއާޕޯޓް ޖީއެމްއާރަށް ވިއްކާލުމުގައިވެސް މޭސްތިރިއަކަށް ހުންނެވީ އިބޫކަމަށެވެ. އޭނާ ވިދާޅުވީ ރައީސް ޔާމީން އާދިއްތަ ދުވަހުގެރޭ ކުރިމަތި ކުރެއްވި ސުވާލުތަކުގެ ތެރެއަށް އެއްސުވާލު އިތުރުކުރަން ޖެހޭކަމަށާއި އެ ސުވާލަކީ އޭރުގެ ޖީއެމްއާރު އެއާޕޯޓް ވިއްކާލައިގެން ލިބުނު ލާރިއަށް ވީގޮތެއް އިބޫ ބުނެދެއްވަންޖެހޭ ކަމަށެވެ.
"އެއާޕޯޓް ވިއްކާލުމުގައި ދައުލަތަށް ލިބުނީ 70 ވަރަކަށް މިލިއަން ޑޮލަރު. 100 އެތަށް މިލިއަން ޑޮލަރެއް ހޭދަކުރެއްވިކަމަށް ވަނީ. ބާކީވި ފައިސާއަށް ވީ ގޮތެއް އިބްރާހިމް މުހައްމަދު ސޯލިހު ވާނެ ދިވެހިރައްޔިތުންނަށް ދައްކަން. އޭގެ ކުރިއަކުން އަޅުގަނޑުމެން ކައިރިއަށް ވަޑައިގަންނަވައިގެން ނުވާނެ" އަޒްލީން ވިދާޅުވިއެވެ.
އަޒްލީން ވިދާޅުވީ އިބޫ ވަޑައިގަންނަވަނީ ސީދާ ރައީސް ނަޝީދުގެ "ފުޓްޕްރިން" ކޮޕީކުރައްވައިގެންކަމަށެވެ. ލާމަރުކަޒީ ނިޒާމު ގަޑުބަޑުކޮށް ހަލާކުކޮށްލީވެސް ނަޝީދުގެ ސަރުކާރުންކަމަށާއި އެހެންކަމުން ދެން އިތުރަށް ވައުދުވެވަޑައިގަތުމުގެ ބަދަލުގައި ރައީސް ޔާމީން ކުރިމަތިކުރެއްވި ސުވާލުތަކަށް ޖަވާބުދިނުން އިބޫއަށް މާ ރަނގަޅުވާނެ ކަމަށް އަޒްލީން ވިދާޅުވިއެވެ.
އަޒްލީން ވިދާޅުވީ، އިސްލާމް ދީނާއި ސުންނަތުގައި އޮތްކަމެއް އިދިކޮޅު މީހުންނަށް ކުރާކަށް ނުކެރޭނެކަމަށާއި، ކުރާނަމޭ ބުނެފިނަމަވެސް އެމީހުންނަށް ތާއީދުކުރާ ހުޅަނގުގެ ޖަމާއަތްތަކުން ގުޅުން ކަނޑާލާނެކަމަށެވެ.
އަދާލަތު ޕާޓީއަށް ފާޑު ވިދާޅުވަމުން އަޒްލީން ވިދާޅުވީ، އަސްލު އަދާލަތު ޕާޓީ މިހާރު ނެތްކަމަށާއި، މިހާރު އޮތީ އެ ޕާޓީގެ ޓްރޭޑްމަކު ނަގައިގެން އުޅޭ މަދުބައެއް ކަމަށެވެ. އަދި ރައީސް ޔާމީން ގެންނަވާ ތަރަށްގީއަށް ހަސަދަވެރިވާ ބަޔަކާއި އެކު އަދާލަތަށްވެސް އެއްގަލަކަށް ނޭރިގެން އުޅޭކަމަށް އަޒްލީން ވިދާޅުވިއެވެ.
އޭނާ ވިދާޅުވީ އެމްޑީޕީގެ ސަރުކާރަކަށް ވެރިކަން ލިބިއްޖެއްޔާ އަދާލަތުގެ ތިބި މަދު ބޭފުޅުންކޮޅަށް އެމްޑީޕީން އޮޅުވާލާނޭކަމަށެވެ. އޭނާ ވިދާޅުވިގޮތުގައި އަދާލަތުގައި ތިއްބެވި ޝެއިޚުން ތިބީ ސިޔާސީ ކުލަޖެހިފައެެވެ. އަދާލަތު ޕަޓީގައި ތިބި މެންބަރުން އެބޭފުޅުންނައި ގުޅިވަޑައިގެން ރައީސް ޔާމީންގެ ފަހަތްޕުޅަށް އެރުމަށް އަޒްލީން ގޮވާލެއވިއެވެ.
