މަޑުއްވަރީގައި ކުރިއަށް ގެންދިޔަ މަޝްރޫއުތައް ކުރިއަށް ގެންދިޔައީ ރައްޔިތުން ބޭނުންވާ ގޮތަކަށް ނޫން: މަޑުއްވަރީ ދައިރާގެ ރައީސް

ރ. މަޑުއްވަރީގެ ރައީސް ޔާމިންގެ ސަރުކާރުން ކުރިއަށް ގެންދިޔަ މަޝްރޫއުތަކަކީ ރައްޔިތުން ބޭނުންވާ ގޮތަށް ކުރިއަށް ގެންދިޔަ މަޝްރޫއުތަކެއް ނޫން ކަމަށް އެމްޑީޕީ ގައުމީ މަޖިލީހުގެ މަޑުއްވަރީ ދައިރާގެ ރައީސް މޫސާ އަލިމަނިކު ވިދާޅުވެއްޖެއެވެ.

ރާއްޖެޓީވީގެ ދައިރާގެ ޕްރޮގްރާމްގައި ވާހަކަދައްކަވަމުން މޫސަ ވިދާޅުވީ ރައީސް ޔާމިން ވެރިކަމަށް ވަޑައިގަތުމަށް މަޑުއްވަރީގެ ރައްޔިތުންގެ ކުރިމަތީގައި އެމަނިފާނު އެތައް ވައުދުތަކެއް ވެފައިވާ ކަމަށެވެ.

އެގޮތުން މަޑުއްވަރީގެ ބިން ހިއްކައި، ފަންސާސް ފްލެޓް އަޅައިދޭނެ ކަމަށް ވައުދުވި ކަމަށާއި، ނަމަވެސް މި މަޝްރޫއުތައް ވެގެންދިޔައީ ރައްޔިތުންނަށް ދެއްކި ކުލައެއް ނެތް ހުވަފެނަކަށް ކަމަށެވެ.

މަޑުއްވަރީގައި ކުރިއަށް ގެންދިޔަ މަޝްރޫއުތަކަށް އަލިއަޅުއްވަލައްވަމުން މޫސަ ވިދާޅުވީ މަޑުއްވަރީއަށް ރަށްގިރުމުގެ މައްސަލަ ކުރިމަތިވުމުން ބޭރުތޮށީގައި ބޮޑު ހިލަ ޖަހަން ރައްޔިތުން ބޭނުންވި ކަމަށާއި، ނަމަވެސް އެމަސައްކަތް ކުރީ ސަރުކާރުން ބޭނުންވާ ގޮތަށް ކަމަށެވެ. އެގޮތުން އެއްގަމު ގޮނޑުދޮށުގައި ހިލަތައް ޖެހީ ކަމަށް އޭނަ ވިދާޅުވިއެވެ.

މޫސަ ވިދާޅުވީ ގޮނޑުދޮށުގައި ބޮޑު ހިލަޖާހާތީ އެކަމާ ރައްޔިތުން ހިތްހަމަ ނުޖެހިގެން މުޒާހަރާކޮށް، ޕެޓިޝަން ވެސް ހަދާ މުއައްސަސާތަކަށް ހުށަހެޅި ކަމަށާއި، ނަމަވެސް މިސަރުކާރުން އަދަބު ދިނީ ރައްޔިތުންނަށް ކަމަށެވެ.

"އެކަމާ އިހުތިޖާޖު ކުރި މީހުން ގެންގޮސް 15 ދުވަހަށް ޖަލަށްލާ މިހުރިހާ ކަމެއްކޮށް، ރައްޔިތުންނަށް ބިރު ދައްކައިގެން ރައްޔިތުން ބޭނުންވާ ގޮތާ ހިލާފަށް ކަންތައް ކުރެއްވީމަ މިއަދު އެއޮތީ ރައްޔިތުންނަށް އޭނގެ ތުރާ ޖެހިފައި. މިއަދު މުޅި ރަށްވަށާ މީދާ ހާލިހަދާފަ. ގާމަތި ރަށަކަށް މުޅި ރަށް މަދަލުކޮށްލާފައި އެއޮތީ. މީގެ ސަބަބުން ރައްޔިތުންގެ ހިތުގައި އުފެދުނީ ނަފުރަތު،" މޫސަ ވިދާޅުވިއެވެ.

މޫސަ ވިދާޅުވީ މަޑުއްވަރީގެ ގިނަ މަޝްރޫއުތައް ނިންމާފައި ހުރީ ރައީސް ވަހީދުގެ ވެރިކަމުގައި ކަމަށެވެ. ރައީސް ޔާމިން ނިންމި ކަމަށް ބުނާ ނުވަ ކުލާސް ރޫމްގެ ހަތަރު ބުރީގެ އިމާރާތާއި، ސިއްހީ މަރުކަޒު މާރާމާތު ކުރުމާއި، ވޭސްޓް މެނޭޖްމެންޓު ސެންޓަރު ގާއިމް ކުރީ މިސަރުކާރުގައި ނޫން ކަމަށެވެ. މިއީ ރައީސް ޔާމިން ނިންމި މަޝްރޫއުތައް ކަމަށް ފޮތުގައި ލިޔެފައި އޮތަސް މަޑުއްވަރީގެ ރައްޔިތުން އެކަން ބަލައި ނުގަންނާނެ ކަމަށް މޫސަ ވިދާޅުވިއެވެ.

"ރައީސް ޔާމިންނާ ހަމައަށް އަންނަން ޖެހޭ ކަމަށް ވަންޏާ އަޅުގަނޑަށް ފެންނަނީ ޝަމްސުއްދީން ރަދުންނާއި ހިސާބުން ފެށިގެން ދިވެހިރާއްޖޭގައި ކޮށްފައި ހުރި ހުރިހާ މަސައްކަތެއް ލާންވީއޭ ރައީސް ޔާމިނަށް. މީގެ ތެރެއިން އަޅުގަނޑަށް ފާހަގަކުރެވުނީ ހުސް ވައްކަން. އެނޫން ކަމެއް އަޅުގަނޑަށް ފާހަގައެއް ނުކުރެވޭ،" މޫސަ ވިދާޅުވިއެވެ.

ރައީސް ޔާމިންގެ ވެރިކަމުގައި މަޑުއްވަރީގެ ސްޕޯޓް އެރީނާގެ ނަމުގައި ބަށިކޯޓެއް އަޅައިދިންކަން ފާހަގަކުރައްވައި މޫސަ ވިދާޅުވީ ބަށި ކޯޓު އެޅުމަށް 64000 ރުފިޔާ ޖަހާފައިވާ ކަމަށާއި، މިޕްރޮޖެކްޓަށް މިވަރަށް ފައިސާ ހަރަދު ނުވާނެ ކަމަށެވެ. ބަށި ކޯޓު ހަދާފައި ވަނީ ވަށައިގެން ދާކޮޅެއް ދަމައިގެން ކަމަށް މޫސަ ވިދާޅުވިއެވެ.