ޒިމްބާބުވޭގެ އިންތިޚާބު:މިހާރުގެ ރައީސްއަށް ތާއީދު ނުކުރާކަން މުގާބޭ ހާމަކުރައްވައިފި

ޒިމްބާބުވޭގެ ރިޔާސީ އިންތިޚާބާއި ގުޅުވައި ކުރީގެ ރައީސްގެ ރޮބަޓް މުގާބޭ ކުއްލި ނޫސްކޮންފަރެންސެއް ދެއްވައިފިއެވެ.

މުގާބޭ ވިދާޅުވީ އެ މަނިކުފާނަށް ފަހު ޒަނޫ ޕީއެފް ޕާޓީގެ ރައީސްގެ މަގާމަށް ވަޑައިގެންނެވި އެމަރސަން ނަންގަގްވާއަށް ތާއީދު ނުކުރައްވާނެ ކަމަށް ވިދާޅުވެފައެވެ. މުގާބޭ ސިފަކުރައްވާފައިވާ ގޮތުގައި އެމަނިކުފާނު އުފެއްދެވި ޕާޓީން އެމަނިކުފާނު ބޭރުކުރައްވާފައި ވަނީ ގަދަބާރުންނެވެ.

"އަޅުގަނޑަކަށް ވޯޓެއް ނުދެވޭނެ އެ ޕާޓީއަކުން އަހަރެން ބޭރުކޮށްލި މީހާއަކަށް، ދެންތިބި 22 މީހުންގެ ތެރެއިން އަހަންނަށް ފެންނަ މީހަކު ހޮވާނަން،"

މިދިޔަ އަހަރުގެ ނޮވެމްބަރު މަހު މުގާބޭ މަގާމުން ދުރުކުރުމަށް ފަހު އެ ގައުމުގައި ބާއްވާ ފުރަތަމަ ރިޔާސީ އިންތިޚާބު ހޯމަ ދުވަހު އެ ގައުމުގައި އޮންނާނެއެވެ.

ވެރިރަށް ހަރާރޭގައި ހުންނަ މުގާބޭގެ ގެކޮޅުގައި އާދީއްތަ ދުވަހު ނޫސްވެރިންނާ ވާހަކަ ދައްކަވަމުން މުގާބޭ ވިދާޅުވީ އެމަނިކުފާނު މަގާމުން ދުރުކުރީ އަސްކަރީ ބަޣާވާތަކުން ކަމަށާއި މަގާމު ދޫކޮށްލެއްވީ ހަމަނުޖެހުމެއް އުފެދުނަ ނުދެއްވުމަށްކަމަށެވެ.

އޭނާ އިތުރަށް ވިދާޅުވީ މިހާރު އެދިވަޑައިގަންނަވަނީ އިދިކޮޅު މޫވް މެންޓް ފޮރ ޑިމޮކްރެޓިކް ޗޭންޖް (އެމްޑީސީ) ކެންޑިޑޭޓް ނެލްސަން ޗެމީސާ ހޮވިވަޑައިގަތުމަށްކަމަށެވެ.

"ފެންނަ ފެނުމަށް އޭނާ ރަނގަޅު، އޭނާ ހޮވިއްޖެނަމަ އޭނާއަށް ރަނގަޅު ގޮތް އެދެން،"

މުގާބޭއަށް ފަހު އެ ގައުމުގައި ވެރިކަން ކުރައްވާނެ ފަރާތެއް ހޮވުމަށް 38 އަހަރަށް ފަހު ފުރަތަމަ ފަހަރަށް ބާއްވާ އިންތިޚާބު ހޯމަ ދުވަހު ބާއްވާއިރު އެ އިންތިޚާބުގައި ފަސް މިލިއަނަށް ވުރެ ގިނަ މީހުން ވޯޓްލާނެއެވެ.

ރިޔާސީ އިންތިޚާބާއި ގާނޫނު ހަދާ މަޖިލީހުގެ އިންތިޚާބާއި، ލޯކަލް އިންތިޚާބު އެކުގައި ކުރިޔަށް ދާއިރު ރިޔާސީ އިންތިޚާބުގައި 23 ކެންޑިޑޭޓަކު ވާދަކުރައްވައެވެ.