ށ އަތޮޅު މިލަންދޫ މެޖިސްޓްރޭޓް ކޯޓް ފަޅާލައި, 7,000ރ. ނަގައިފި އެވެ.
މިލަންދޫ ކައުންސިލްގެ ނާއިބު ރައީސް އަހުމަދު ސިޔާމް ރާއްޖެ އެމްވީއަށް ވިދާޅުވީ އެރަށުގެ މެޖިސްޓްރޭޓް ކޯޓު ފަޅާލާފައި ވަނީ އަންގާރަ ދުވަހުގެ ރޭގެ ވަގުތެއްގައި ކަމަށެވެ.
ސިޔާމް ވިދާޅުވީ ކޯޓު ފަޅާލާފައި ވަނީ ކުށްވެރިން ބައިތިއްބަން ހަދާފައިވާ ކޮޓަރިއަކަށް ވަދެވެން ހުންނަ ދޮރެއް ހަލާކުކޮށްލައިގެން ކަމަށެވެ. ދަގަނޑެއް ކަހަލަ އެއްޗަކުން މަތާލައިގެން ދޮރު ހުޅުވާފައިވާކަމަށް ބެލެވޭ ކަމަށް އޭނާ ވިދާޅުވިއެވެ.
މި މައްސަލަ ފުލުހުން މިހާރު ދަނީ ތަހްގީގުކުރަމުންނެވެ.
މިކަމާ ގުޅޭގޮތުން ފުލުހުންގެ ބަހެއް އަދިވަނީ ލިބޭ ގޮތް ނުވެފައެވެ.
