ގުޅިފައިވާ ޕާޓީތަކުގެ މެނިފެސްޓޯ ދެތިން ދުވަހުގެ ތެރޭގައި ނެރެނީ
އެމްޑީޕީގެ މެނިފެސްޓޯ ވަނީ ހާމަ ކޮށްފަ
މ. ކުނޫޒުގައި ގުޅިފައިވާ ޕާޓީތަކުން ބޭއްވި ޖަލްސާއެއްގެ ތެރެއިން
ގުޅިފައިވާ ސިޔާސީ ޕާޓީތަކުން ތައްޔާރުކުރާ މެނިފެސްޓޯ ކުރިއަށް އޮތް ދެތިން ދުވަހުގެ ތެރޭގައި ހާމަ ކުރައްވާނެ ކަމަށް، ގުޅިފައިވާ ސިޔާސީ ޕާޓީތަކުން ރިޔާސީ އިންތިހާބަށް ވާދަ ކުރައްވާ ކެންޑިޑޭޓް އިބްރާހީމް މުހައްމަދު ސޯލިހު (އިބޫ) ވިދާޅުވެއްޖެ އެވެ.
މަލޭ ސިޓީ ކައުންސިލާ އެކު ބޭއްވި ބައްދަލުވުމަށްފަހު އިބޫ ވިދާޅުވީ އެމްޑީޕީގެ މެނިފެސްޓޯ އާންމުކޮށްފައި އޮތް ނަމަވެސް، ގުޅިފައިވާ ޕާޓީތަކުގެ ވިސްނުމާއެކު އާ މެނިފެސްޓޯއެއް ނެރޭނެ ކަމަށެވެ.
ގުޅިފައިވާ ޕާޓީތަކުގެ މެނިފެސްޓޯގައި ހިމެނުމަށް އަދާލަތު ޕާޓީން ހުށަހަޅާ ކަންކަން އަންގާރަ ދުވަހު ވަނީ އާއްމުކޮށްފަ އެވެ. ޖުމްހޫރީ ޕާޓީގެ މެނިފެސްޓޯ ހާމަނުކުރި ނަމަވެސް، ގުޅިފައިވާ ޕާޓީތަކުގެ މެނިފެސްޓޯގައި ހިމެނުމަށް ފެނިވަޑައިގަންނަވާ ކަމަށް ވިދާޅުވެ، ގާސިމްގެ ވިސްނުންފުޅުތަކެއް ވަނީ ނެރުއްވާފަ އެވެ.
ގުޅިފައިވާ ސިޔާސީ ޕާޓީތަކުން މެނިފެސްޓޯ ތައްޔާރުކުރާއިރު، އެ ހުރިހާ ޕާޓީތަކުގެ ވިސްނުމާއި ޕާޓީތަކުން މެނިފެސްޓޯގައި ހިމަނާނެ ކަންކަމާމެދު މިހާރު ދަނީ މަޝްވަރާ ކުރަމުން ނެވެ.
މާލޭ ސިޓީކައުންސިލާއެކު ބޭއްވި ބައްދަލުވުމުގައި އިބޫގެ ރަނިން މޭޓް، ފައިސަލް ނަސީމް ވެސް ބައިވެރިވެވަޑައިގަތެވެ.
