ފައިސަލާއި ޝަހީދު ހައި ކޯޓުގެ ފަނޑިޔާރުކަމުގެ ހުވާކުރައްވައިފި
އައްޔަން ކުރިއިރު، ފައިސަލް ވަނީ މެމްބަރުކަމުން އިސްތިއުފާ ދީފައި: ޖޭއެސްސީ
ހައި ކޯޓުގެ ފަނޑިޔާރު ކަމަށް ފައިސަލް އައްޔަން ކުރުމަށް ފަހު، މަގާމުގެ ފަތްކޮޅު އުއްތަމަ ފަނޑިޔާރު ހަވާލުކޮށްދެއްވަނީ
ޖުޑީޝަލް ސާވިސް ކޮމިޝަން (ޖޭއެސްސީ)ގެ ނާއިބު ރައީސް މުހައްމަދު ފައިސަލާއި ކްރިމިނަލް ކޯޓުގެ ފަނޑިޔާރު ހުސައިން ޝަހީދު ހައި ކޯޓު ފަނޑިޔާރު ކަމަށް އައްޔަންކޮށްފިއެވެ.
ޖޭއެސްސީގެ މީޑިއާ އޮފިޝަލް ހަސަން ޒަހީން "ރާއްޖެއެމްވީ"އަށް ވިދާޅުވީ ފައިސަލް ހައި ކޯޓުގެ ފަނޑިޔާރު ކަމަށް އައްޔަން ކުރެއްވިއިރު، އޭނާ ޖޭއެސްސީގެ މެމްބަރުކަމުން އިސްތިއުފާ ދެއްވާފައިވާ ކަމަށެވެ.
ނަމަވެސް ހައި ކޯޓުގެ ފަނޑިޔާރުގެ މަގާމަށް ފައިސަލް އައްޔަން ކުރަން އާދީއްތަ ދުވަހު ޖޭއެސްސީގައި ބޭއްވި ބައްދަލުވުމުގައި ނިންމި އިރު ވެސް އޭނާ އެ މަގާމުން އިސްތިއުފާ ދެއްވާފައެއް ނުވެއެވެ. ފައިސަލަކީ ރައީސުލްޖުމްހޫރިއްޔާގެ މެމްބަރެއްގެ ގޮތުގައި އެ ކޮމިޝަންގައި އިންނަވާ މެމްބަރެކެވެ. އޭނާ އެ ކޮމިޝަންގެ ނާއިބު ރައީސްގެ މަގާމުގައި އިންނަވައިގެން، ހައި ކޯޓުގެ ފަނޑިޔާރު ކަމަށް ވަޑައިގަތުމަށް އެ ކޮމިޝަނުން ނިންމުމުން، ގިނަ ބައެއްގެ ފާޑުކިޔުން ވަނީ އަމާޒުވެފައެވެ.
ހުސައިން ޝަހީދު ހައި ކޯޓުގެ ފަނޑިޔާރު ކަމަށް އައްޔަން ކުރެއްވި ރަސްމިއްޔާތުގެ ތެރެއިން. -- ފޮޓޯ/ މުހައްމަދު ޝަރުހާން
ޖޭއެސްސީން ބުނެފައި ވަނީ ހައި ކޯޓުގެ ފަނޑިޔާރު ކަމަށް ފައިސަލް ކުރިމަތިލެއްވި ފަހުން، ޖޭއެސްސީގެ އެއްވެސް މަސައްކަތެއްގައި އޭނާ ބައިވެރިވެވަޑައި ނުގަންނަވައެވެ.
ފައިސަލާ އެކު، ހައި ކޯޓުގެ ފަނޑިޔާރުގެ މަގާމަށް އަންގާރަ ދުވަހުގެ ރޭ އައްޔަން ކުރެއްވި ހުސައިން ޝަހީދަކީ ކްރިމިނަލް ކޯޓަށް މިއަހަރުގެ ޖެނުއަރީ މަހު 25 ވަނަ ދުވަހު އައްޔަން ކުރި ގާޒީއެކެވެ. އޭގެ ކުރިން އޭނާ ހުންނެވީ އަތޮޅު ތެރޭ ކޯޓެއްގެ މެޖިސްޓްރޭޓަކަށެވެ.
ސުޕްރީމް ކޯޓުގެ ފަސް ފަނޑިޔާރުން: ހައި ކޯޓަށް ފަނޑިޔާރުން އައްޔަން ކުރުމުގެ ރަސްމިއްޔާތު އޮތީ ހައި ކޯޓުގައި-- ފޮޓޯ/ މުހައްމަދު ޝަރުހާން
ގުޅިފައިވާ ޕާޓީތަކުން ހޯމަ ދުވަހު އިލެކްޝަންސް ކޮމިޝަން (އީސީ) ކުރިމަތީގައި ކުރި މުޒާހަރާގައި ތުހުމަތުކޮށްފައި ވަނީ ފައިސަލާއި ޝަހީދު ހައި ކޯޓަށް އައްޔަން ކުރީ އިންތިހާބަށް ނުފޫޒު ފޯރުވުމަށް ކަމަށެވެ. އިންތިހާބުތަކާ ބެހޭ އާންމު ގާނޫނުގައި ބުނެފައިވާ ގޮތުން އިންތިހާބާ ގުޅުންހުރި މައްސަލަތައް ބަލާނީ ހައި ކޯޓާއި ސުޕްރީމް ކޯޓުންނެވެ.
"ހައި ކޯޓަށް އެއްވެސް މައްސަލައެއް ދިއުމުގެ ކުރީގައި ރައީސް ޔާމީން ބޭނުންވާ ބަޔަކު، ބޭނުން ގޮތަކަށް ނަތީޖާ ނެރުމަށްޓަކާ ހައި ކޯޓު މި ފިކްސް ކުރީ. އެއީ ވެސް އިންތިހާބު އޮޅުވާލުމާއި މަކަރު ހެދުމަށް ރައީސް ޔާމީން ބޭނުންވާ ގޮތަށް ކަންކަން ކުރުމަށް ކުރި ކަމެއް،" އަލީ ނިޔާޒު ވިދާޅުވިއެވެ.
