ތިރީސް ހަ ސިޔާސަތަކާ އެކު، އަދާލަތު ޕާޓީގެ ރިޔާސީ މެނިފެސްޓޯ ގުޅިފައިވާ ޕާޓީތަކަށް ހުށަހަޅައިފިއެވެ.

އަދާލަތު ޕާޓީން މެނިފެސްޓޯގެ ސިޔާސަތުތައް ކަނޑައަޅާފައި ވަނީ މައިގަނޑު ތިން ދާއިރާއަކަށް އަމާޒުކޮށްގެންނެވެ. އެއީ ދިވެހިންގެ ދީނާއި ހެޔޮވެރިކަމާއި ފުދުންތެރި ދިރިއުޅުމުގެ މައްޗަށެވެ.

މެނިފެސްޓޯއާ ގުޅޭ ގޮތުން، އެ ޕާޓީގެ އޮފީހުގައި ބޭއްވި ޕްރެސް ކޮންފަރެންސްގައި ވާހަކަފުޅު ދައްކަވަމުން އަދާލަތު ޕާޓީގެ މީޑިއާ ކޮމެޓީގެ މުގައްރިރު އަލީ ނަޒީރު ވިދާޅުވީ އެ ޕާޓީގެ މެނިފެސްޓޯ އެކުލަވާލުމުގައި ވިސްނާފައި އޮތީ އިސްލާމީ ހިދާޔަތުގެ ތެރެއިން ދުނިޔޭގައި ވެސް އަދި އާހިރަތުގައި ވެސް ބާއްޖަވެރިކަން ހޯދުމަށް ކަމަށެވެ. މެނިފެސްޓޯގެ ސިޔާސަތުތައް އެކުލަވާލުމުގައި ދުނިޔޭގައި އުފެދިފައިވާ އިސްލާމީ ދައުލަތްތަކުން ކަންކަން ކޮށްފައިވާ ގޮތް ބަލާފައިވާނެ ކަމަށް ވެސް ނަޒީރު ވިދާޅުވިއެވެ.

"މި ހުރިހާ ކަމެއް އެކުލަވާލުމަށްޓަކައި އަޅުގަނޑުމެން ދިރާސާ ކުރިން، މާޒީގައި އުފެދިފައި ހުރި ބޮޑެތި އިސްލާމީ ދައުލަތްތަކުން ކަންކަން ކޮށްފައިވާ ގޮތް. އަޅުގަނޑުމެން ދިރާސާ ކުރިން މިޒަމާނުގެ ވެރިކަމުގެ ނިޒާމުތަކުގައި ކުރިއަރާފައި ހުރި ގައުމުތަކުގައި އަމަލު ކުރެވެމުންދާ ގޮތް، އަދި އަޅުގަނޑުމެން އެކަންކަން ގުޅުވާލިން ދިވެހި ރާއްޖެއަށް، ދިވެހި ރައްޔިތުންނަށް މަންފާ ކުރަނީ ކޮން ގޮތްތަކެއްތޯ؟،" ނަޒީރު ވިދާޅުވިއެވެ.

އިސްލާމް ދީނުގެ ހިދާޔަތު ރާއްޖޭގައި ފެތުރުމަށް، 2005 ވަނަ އަހަރުން ފެށިގެން މަސައްކަތް ކުރާ އަދާލަތު ޕާޓީގެ ދީނީ ސިޔާސަތުތަކާ ގުޅޭ ގޮތުން އެ ޕާޓީގެ މެނިފެސްޓޯގައި އެކުލަވާލާފައިވާ ކަންކަން މީޑިއާއަށް ހިއްސާކޮށްދެއްވީ ރައްޔިތުންގެ މަޖިލީހުގެ މަކުނުދޫ ދާއިރާގެ މެމްބަރު އަނާރާ ނައީމެވެ. އަނާރާ ވިދާޅުވީ ޒަކާތު ފަންޑާއި ވަގުފު ފަންޑަށް ހާއްސަ ގާނޫނެއް ހެދުމާއި ފިގުހު އެކަޑަމީ މިނިވަން މުއައްސަސާއަކަށް ހެދުމަށް ވެސް އެ ޕާޓީގެ މެނިފެސްޓޯގައި ކަނޑައަޅާފައިވާނެ ކަމަށެވެ.

ބާރަ ސިޔާސަތެއްގެ މައްޗަށް އެކުލެވޭ ދީނާ ގުޅޭ ވައުދު އިއްވައި ދެއްވަމުން، އަނާރާ ވިދާޅުވީ ދައުލަތުގެ އެންމެހައި ކަންކަން އިސްލާމީ ތަރަހައިގެ ތެރޭގައި ހިންގަން އަދާލަތުން ބާރު އަޅާނެ ކަމަށެވެ.

ހެޔޮވެރިކަމުގެ ވައުދާ ގުޅޭ ގޮތުން ވާހަކަ ދައްކަވަމުން އަދާލަތު ޕާޓީގެ ހާރިޖީ ގުޅުންތަކާ ބެހޭ ކޮމެޓީގެ މުގައްރިރު ޝިދާތާ ޝަރީފު ވަނީ ނުވަ ސިޔާސަތެއް އިއްވައި ދީފައެވެ. އޭގެ ތެރެއިން އެންމެ ފާހަގަ ކުރެވޭ ސިޔާސަތަކީ ބަލިވެ އިނީއްސުރެ، ކުއްޖާ އުފަންވެ، އުމުރުން ދެ އަހަރު ފުރެންދެން މައިމީހާއަށް އެލެވަންސެއް ދޭން ހުށަހަޅާފައިވެއެވެ.

"ބަލިވެއިނީއްސުރެ، ކުއްޖާގެ އުމުރުން ދެ އަހަރު ވަންދެން، މައިމީހާއަށް ދައުލަތުން އެލަވަންސެއް ދިނުމަށް އަޅުގަނޑުމެންގެ ވިސްނުމެއް އެބަ ހުށަހަޅަން. ހަމައެއާއެކު ތުއްތު ދަރިފުޅުގެ އަސާސީ ހިދުމަތްތަކާއި ކަންކަން ދަތިކުރުމަކާ ނުލައި، އާއިލާތަކަށް ފޯރުކޮށް ދެވޭނެ ގޮތްތަކަށް ދައުލަތުން އެހީތެރިކަން ފޯރުކޮށްދިނުން ވެސް އެބަ ހިމެނޭ،" ޝިދާތާ ވިދާޅުވިއެވެ.

ޓްރާންސް ޝިޕްމަންޓު ބަނދަރާއި އާޓިފިޝަލް އިންޓަލިޖެންސްގެ ސިޔާސަތުތަކާއެކު، އަދާލަތު ޕާޓީގެ އިގްތިސާދީ ވައުދަށް ދީފައި ވަނީ "ފުދުންތެރި ދިރިއުޅުން" މި ނަމެވެ. އެ ވައުދު ތަފްސީލުކޮށްދެއްވީ އަދާލަތު ޕާޓީގެ އިންސާނީ ހައްގުތަކާ ބެހޭ ކޮމެޓީގެ މުގައްރިރު އަހުމަދު ނުއުމާނެވެ.

"އަޅުގަނޑުމެން ދެކޭ ގޮތުން ޒުވާން ޖީލަށް ބޭނުންވާ ކަންކަން އަޅުގަނޑުމެން ފަހިކުރަންޖެހޭ. އެގޮތުން އަޅުގަނޑުމެންނަށް ފާހަގަ ކުރެވިފައި އޮތް ކަމެއް، މަސްނޫޢީ ވިސްނުމަކީ ޒުވާން ޖީލުގެ ޝައުގުވެރިކަން ވަރަށް ބޮޑަށް އޮތް ކަމެއް. މަސްނޫޢީ ވިސްނުން، އިނގިރޭސީ ބަހުން ދަންނަވާނަމަ، އާޓްފިޝަލް އިންޓެލިޖެންސް. އެގޮތުން މިއީ އަޅުގަނޑުމެން އިސްކަންދޭނެ ދާއިރާއެއް. މީގެ ތެރޭގައި މަސްނޫޢީ ވިސްނުން ކުރިއެރުވުމަށްޓަކައި މެޝިން ލާނިން، ލީޕް ލާނިން، ކޮންޕިއުޓަރ އިންޖިނިއަރިން ފަދަ ދާއިރާތައް މިހާރަށް ވުރެ ބޮޑަށް ފުޅާކުރެވި، އެކަންކަމާ ގުޅޭ އިލްމީ ގާބިލުކަން ޒުވާނުންގެ މެދުގައި އިތުރުކުރެވޭނެ،" ނުއުމާން ވިދާޅުވިއެވެ.

މެނިފެސްޓޯ ތަފްސީލުކޮށް ދިނުމަށް ފަހު، ނަޒީރު ވިދާޅުވީ ގުޅިފައިވާ ހަތަރު ޕާޓީގެ ވިސްނުން، އެއްގޮތް ކުރުމަށްޓަކައި ހުށަހަޅާނީ "18/19 ކޮމެޓީ" އަށް ކަމަށެވެ. ގުޅިފައިވާ ޕާޓީތަކުން އެއްބަސްވެވޭ އެއް ކެންޑިޑޭޓަކު ނެރުމުގެ މަސައްކަތް ކުރި އެ ކޮމެޓީން، ގުޅިފައިވާ ޕާޓީތަކުގެ މެނިފެސްޓޯ އެކުލަވާލާނެ ކަމަށާއި ކޮންމެ ޕާޓީއަކުން ހުށަހެޅި ސިޔާސަތުތަކާ އެކު ވައުދުތަކާ ގުޅޭ ގޮތުން ވަކިވަކިން މަޝްވަރާތައް ކުރާނެ ކަމަށް ނަޒީރު ވިދާޅުވިއެވެ.