ސައޫދީން ރާއްޖެއަށް ހަދިޔާކުރި ކަދުރު ބަހާ ނިންމައިފި
24 ޖުލައި 2018 | އަންގާރަ 05:15ސައޫދީން ރާއްޖެއަށް ހަދިޔާ ކުރީ 50 ޓަނުގެ ކަދުރު
އިސްލާމިކް މިނިސްޓްރީން ކަދުރު ބެހުމުގެ މަސައްކަތް ކުރިއަށް ދަނީ
ސައޫދީ އަރަބިއްޔާއިން ރާއްޖެއަށް ހަދިޔާކުރި 50 ޓަނުގެ ކަދުރު ބަހާ ނިންމައިފިއެވެ.
އިސްލާމިކް މިނިސްޓްރީން ކޮށްފައިވާ އިއުލާނެއްގައި ބުނެފައި ވަނީ މާލެ ސިޓީ އާއި، އައްޑޫ ސިޓީ އާއި، ފުވައްމުލަކު ސިޓީ އާއި، އަތޮޅުތަކުގެ ރަށްރަށުގައި މީހުން ދިރިއުޅޭ ގޭބިސީތަކުގެ އަދަދު ބެލުމަށްފަހު، ކޮންމެ ގޭބިސީއަކަށް 1 ޕަކެޓް ކަދުރު ދޭ އުސޫލުން ކަދުރު ބަހައި ނިންމާފައި ވަނީ މިމަހު 22 ވީ އާދިއްތަ ދުވަހު ކަމަށެވެ.
މާލެ އާއި އަތޮޅުތެރެއިން ޖުމްލަ 24345 ގޭބިސީއަށް ކަދުރު ބަހާފައިވާއިރު، ރާއްޖޭގެ އެކި ކަންކޮޅުތަކުން 43 ރަށުގެ ކައުންސިލުން ކަދުރު ހަވާލުވެފައިވާ ކަމަށާއި، އަތޮޅުތަކުން ޖުމްލަ 13052 ގޭބިސީއަށް ވަނީ ކަދުރު ހަވާލުކޮށްފައި ކަމަށް އިސްލާމިކް މިނިސްޓްރީން މައުލޫމާތުދެއެވެ.
އާންމު ގޮތެއްގައި ސައުދީން ރާއްޖެ އަށް ކަދުރު ހަދިޔާކުރަނީ ރޯދަމަހާ ދިމާކޮށެވެ. ސައުދީން ދޭ ކަދުރު ރޯދަ މަހާ ދިމާކޮށް ގޭގެއަށް ބަހާއިރު މި ފަހަރުގެ ރޯދަ މަހު ސަރުކާރުން ކަދުރު ބަހާފައެއް ނުވެއެވެ.
