ޕާކިސްތާނާއި ރާއްޖެއަށް ކުރިމަތިވާ ބޭރުގެ ޕްރެޝަރު ތަކުން ހައްލު ހޯދުމަށް އެކުގައި މަސައްކަތް ކުރުމަށް ރައީސް އެދިވަޑައިގެންފި
24 ޖުލައި 2018 | އަންގާރަ 06:16ކަނޑުގެ ސަރަހައްދީ ރޮނގު ބެލެހެއްޓުމަށް ރާއްޖެއިން ވަނީ ޕާކިސްތާނު ކިބައިން އެދިފައި
ރައީސް ޔާމީން ޕާކިސްތާންގެ ޗީފް އޮފް ދަ ނޭވަލް ސްޓާފް އެޑްމިރަލް ޒަފަރު މަހްމޫދު އައްބާސީއާ ބައްދަލު ކުރައްވަނީ
ބައިނަލްއަގުވާމީ މަޝްރަހު ތަކުން ރާއްޖެއާއި ޕާކިސްތާނަށް ދިމާވާ މައްސަލަތަކަށް އެކުގައި މަސައްކަތް ކުރެއްވުމަށް އުއްމީދު ކުރައްވާކަމަށް ރައީސް ޔާމީން ވިދާޅުވެއްޖެއެވެ.
ރައީސް ޔާމީން މިހެން ވިދާޅުވީ ޕާކިސްތާންގެ ޗީފް އޮފް ދަ ނޭވަލް ސްޓާފް އެޑްމިރަލް ޒަފަރު މަހްމޫދު އައްބާސީއާ ބައްދަލު ކުރެއްވުމަށް ރައީސް އޮފީހުގައި ހޯމަ ދުވަހު ބޭއްވި ރަސްމިއްޔާތުގައި ވާހަކަ ދައްކަވަމުންނެވެ.
ދިވެހިރާއްޖޭގެ ތަރައްގީއަށް ޕާކިސްތާނުން ވެދެއްވާ އެހީތެރިކަމާއި އެއްބާރުލުން ފާހަގަ ކުރައްވާ ކުރިއަށް އޮތް ތާނގައި ވެސް ދިވެހިރާއްޖެއާ ޕާކިސްތާނާ ދެމެދުގައި އޮތް ސިޔާސީ ގުޅުން އިތުރަށް ބަދަހިވާނެކަމަށް އުންމީދު ކުރައްވާ ކަމަށް ވިދާޅުވެ، ބައިނަލްއަގުވާމީ މަޝްރަހުން ދެޤައުމަށް ކުރިމަތިވާ އެއްގޮތް މައްސަލަތަކުގައި ހައްލު ހޯދުމަށް އެކުގައި މަސައްކަތް ކުރުމަށް އުންމީދު ކުރައްވާ ކަމަށް ރައީސް ޔާމީން ވިދާޅުވިއެވެ.
ޕާކިސްތާނުގެ ޗީފް އޮފް ނޭވަލް ސްޓާފް ރާއްޖެ ވަޑައިގެންފައިވާއިރު ރާއްޖޭގެ ކަނޑުގެ ސަރަހައްދީ ރޮނގު ބެލެހެއްޓުމުގައި އިންޑިއާގެ އެންމެ ބޮޑު ހަތުރު ކަމަށްވާ ޕާކިސްތާނުގެ އެހީއަށް ރާއްޖެއިން ވަނީ މިދިޔަ އެޕްރީލް މަހު އެދިފައެވެ.
މިކަމާއި ގުޅިގެން އިންޑިއާއިން އޭރު ކަންބޮޑުވުން ވެސް ފާޅުކުރިއެވެ. މިހާތަނަށް ރާއްޖޭގެ ސަރަހައްދީ ރޮގު ބެހެލެއްޓުމުގައި ހަރަކާތްތެރިވާ ހަމައެކަނި ގައުމަކީ އިންޑިއާއެވެ. ވަޔާއި ކަނޑުގެ ސަރަހައްދު ބެލެހެއްޓުމުގައި އިންޑިޔާގެ އަސްކަރިއްޔާ އިން ހަރަކާތްތެރިވެއެވެ.
ބޭރުގެ ޕްރެޝަރުތަކުން ހައްލު ހޯދުމަށް ޕާކިސްތާނާއި ރާއްޖެއާއި އެކީގައި މަސައްކަތް ކުރުމަށް ރައީސް އެދިވަޑައިގެންފައިވާއިރު ޔޫރަޕިއަން ޔޫނިއަން އިން ރާއްޖެއާމެދު ފިޔަވަޅު އެޅުމުގެ ފްރޭމްވޯކް ވަނީ ހާމަކޮށްފައެވެ. އަދި އިންސާނީ ހައްގުތަކާއި، ގާނޫނުތައް ނެގެހެއްޓުމަށާއި، ސިޔާސީ ހައްލެއް ހޯދުމަށް ހުރަސް އަޅާ ފަރުދުންނާއި، ބައެއް ފަރާތްތަކާ މެދު ފިޔަވަޅު އެޅުމަށް ވަނީ ނިންމާފައެވެ.
