ވަޒީފާއާ ބެހޭ ޓްރައިބިއުނަލްގެ މެމްބަރަކަމުން މަރިޔަމް މުނާ އާދީއްތަ ދުވަހު ވަކިކޮށްފި އެެވެ.
ވަޒީފާއާ ބެހޭ ޓްރައިބިއުނަލަށް މެމްބަރުން އައްޔަންކުރުމާއި ވަކިކުރުމުގެ ބާރު އޮންނަނީ ރައީސުލްޖުމްހޫރިއްޔާ އަށެވެ.
މުނާ މަގާމުން ވަކިކުރި ކަން ރައީސް އޮފީހުން އަދި ހާމަނުކުރި ނަމަވެސް، ނަން ނުޖެހުމަށް ޝަރުތުކޮށް ރާއްޖެއެމްވީ އަށް މައުލޫމާތު ދެއްވި ގާނޫނީ ދާއިރާގެ ބޭފުޅަކު ވިދާޅުވި ގޮތުގައި ކުރިން ޑިފެންސް މިނިސްޓްރީގައި ގިނަ އަހަރުތަކެއްގައި ވަޒީފާ އަދާކުރެއްވި މުނާ ވަޒީފާއާ ބެހޭ ޓްރައިބިއުނަލުން ވަކިކުރީ "ސަރުކާރުން އޭނާއާމެދު ހިތްހަމަ ނުޖެހިގެން" ކަމަށެވެ.
ސަރުކާރުން ހިތްހަމަ ނުޖެހުނު މައިގަނޑު ސަބަބަކީ މުނާއާ ވެސް ގާތްގުޅުމެއް އޮންނަ ގާނޫނީ ވަކީލު ވިދާޅުވި ގޮތުގައި ސަރުކާރުން ބޭނުންވާ ގޮތަށް ބައެއް މައްސަލަތައް ނުނިންމުމެވެ.
"ބައެއް މައްސަލަތަކާ ގުޅޭ ގޮތުން ވަކި ގޮތަކަށް ކަންކަން ނިންމުމަށް އަބަދު ވެސް ރައީސް އޮފީހުން ކޯލުތައް އާދޭ. ނަމަވެސް މުނާގެ ނިންމުންތައް ހުންނަނީ މުނާ ދެކެވަޑައިގަންނަވާ އެންމެ ރަނގަޅު ގޮތަކަށް،" ގާނޫނީ ވަކީލު ވިދާޅުވި އެވެ.
މިކަމާ ގުޅޭ ގޮތުން މުނާގެ ބަހެއް ލިބޭ ގޮތް ވަނީ ނުވެފަ އެވެ.
ޓްރައިބިއުނަލްގެ މެންބަރަކަށް އޯގަސްޓް 25، 2014 ވަނަ އަހަރު މުނާ އައްޔަނުކުރެއްވުމުގެ ކުރީން ސަރުކާރުގައި ދިގު މުއްދަތަކަށް އޭނާ މަސައްކަތް ކުރައްވާފައިވެ އެވެ. މިގޮތުން 1997 ވަނަ އަހަރުން ފެށިގެން 2012 ޖުލައި ގެނިޔަލަށް މިނިސްޓްރީ އޮފް ޑިފެންސް އެންޑް ނޭޝަނަލް ސެކިއުރިޓީގައި ގިނަ މަގާމުތަކެއް ފުރުއްވި އެވެ. އެގޮތުން އެ މިނިސްޓްރީގެ އެކްޓިންގ ޕަރމަނަންޓް ސެކްރެޓަރީ ކަމުގެ އިތުރުން އެސިސްޓެންޓް ޑިރެކްޓަރގެ މަޤާމާއި، ހަމަ އެމިނިސްޓްރީގެ ސީނިއަރ ސެކްރެޓްރީ އަދި ސެކްރެޓްރީގެ މަޤާމު ވެސް އޭނާ އަދާކުރެއްވެވި އެވެ.
ޕޮލިސް އިންޓްގްރިޓީ ކޮމިޝަންގެ ޑިރެކްޓަރ އޮޕަރޭޝަންސްގެ މަގާމު ވެސް އަދާކުރެއްވެވި މުނާ ވަނީ އޮސްޓްރޭލިއާގެ އެޑިތް ކޮވާން ޔުނިވަރސިޓީގައި މާސްޓަރސް އިން ބިޒްނަސް އެޑްމިނިސްޓްރޭޝަން ހާސިލް ކުރައްވާފަ އެވެ. އޭނާ އަކީ ސިވިލް ސަރވިސް ޓްރެއިނިންގ އިންސްޓްޓިއުޓްގެ ޓްރެއިނަރެއްގެ ގޮތުން ސިވިލް ސަރވިސްގެ މުވައްޒަފުން ތަމްރީނުކުރުމުގެ ގިނަ މަސައްކަތްތަކެއް ކުރައްފައިވާ ބޭފުޅެކެވެ.
