ކަރެކްޝަންސްގެ މުވައްޒަފުން ޖަލު ފޮށިތަކަށް ވޯޓުލާން މަޖުބޫރުކޮށްފި
22 ޖުލައި 2018 | އާދީއްތަ 18:49އޮފިސްތަކުން ރީރެޖިސްޓްރީ ކުރިޔަސް، އެކަމަށް އިތުބާރު ކުރެވޭނަމަ އަލުން ރެޖިސްޓަރ ކުރެވޭނެ ކަމަށް އީސީން ބުނި
މާފުށި ޖަލު: ކަރެކްޝަންސް މުވައްޒަފުން ވޯޓްލާން ޖެހޭނީ ޖަލު ފޮށިތަކަށް
މިއަހަރުގެ ސެޕްޓެމްބަރު މަހު 23 ގައި ބޭއްވުމަށް ނިންމާފައިވާ ރިޔާސީ އިންތިހާބުގައި މޯލްޑިވްސް ކަރެކްޝަނަލް ސާރވިސްގެ މުވައްޒަފުން ޖަލު ފޮށިތަކަށް ވޯޓްލުމަށް މަޖުބޫރުކޮށްފިއެވެ.
މިމަހުގެ 19 ވަނަ ދުވަހުން ފެށިގެން ތަންފީޒު ކުރާ ގޮތަށް އާދީއްތަ ދުވަހު ކަރެކްޝަނަލް ސާރވިސްއިން މުވައްޒަފުންނަށް ފޮނުވި އުސޫލުގައި ބުނެފައިވަނީ ރިޔާސީ އިންތިހާބުގައި ކަރެކްޝަނަލް ސާރވިސްގެ މުވައްޒަފުން ވޯޓްލާން ޖެހޭނީ އެ މުވައްޒަފަކު މަސައްކަތް ކުރާ ތަނެއްގައި ހުންނަ ވޯޓް ފޮށްޓަކަށް ކަމަށެވެ. މާލޭގައި މަސައްކަތްކުރާ އޮފިސަރުންނާއި މަދަނީ މުވައްޒަފުން ވޯޓްލާނީ މާލޭ ޖަލުގައި ބަހައްޓާ ވޯޓް ފޮށްޓަކަށް ކަމަށްވެސް ކަރެކްޝަންގެ އެ އުސޫލުގައި ބުނެފައި ވެއެވެ.
މީގެ އިތުރުން މުވައްޒަފުންގެ ރީރެޖިސްޓްރޭޝަން ހިއުމަން ރިސޯސް ޑިޕާޓްމަންޓުން ޖަލުތަކާއި ގުޅިގެން ކުރިއަށް ގެންދާނެ ކަމަށްވެސް ކަރެކްޝަނަލް ސާރވިސްގެ އެ އުސޫލުގައި ބުނެފައި ވެއެވެ.
އެ އުސޫލުގައި ބުނެފައިވާ ގޮތުގައި ކޮންމެ އޮފިސަރެއް އަދި މަދަނީ މުވައްޒަފެއް ވޯޓްލުމަށް ރަޖިސްޓްރީ ކުރެވިފައިވޭތޯ 10 އޯގަސްޓް 2018 ގެ ކުރިން ބަލާ ޗެކްކުރުމަކީ އެމީހެއްގެ އަމިއްލަ ޒިންމާއެއް ކަމަށެވެ.
މުވައްޒަފުންނަށް ފޮނުވި އުސޫލު
ޖަލުތަކުގައި ބެހެއްޓޭ ފޮށިތަކަށް ރީރެޖިސްޓްރީ ކުރުމުގެ މަސައްކަތް ޖަލުތަކާ ގުޅިގެން ހިއުމަން ރިސޯސް ޑިޕާޓްމަންޓުން ކުރިއަށް ގެންދާނެ ކަމަށްވެސް އެ އުސޫލުގައި ބުނެފައި ވެއެވެ.
މިގޮތަށް މުވައްޒަފުންނަށް މަޖުބޫރުކުރި ނަމަވެސް، އެކަން އެގޮތަށް ނުކުރުމަށާއި ރިޕޯޓްކުރުމަށް ގުޅިފައިވާ ޕާޓީތަކުން ވަނީ ގޮވާލައިފަ އެވެ. މިފަދަ ކަންކަން ހިންގަނީ ވޯޓު އޮޅުވާލުމަށް ކަމަށް ވެސް ބައެއް ފަރާތްތަކުން ތުހްމަތުކުރެ އެވެ.
ވަޒީފާ އަދާކުރާ ދައުލަތުގެ އޮފީހުން މަޖުބޫރުކޮށްގެން ރީރަޖިސްޓްރީކުރިޔަސް، އެކަމާމެދު އިތުބާރު ނެތް ނަމަ، އަމިއްލަ އަށް ރަޖިސްޓްރީކުރެވޭނެ ކަމަށް ވެސް އިލެކްޝަންސް ކޮމިޝަނުން ބުނެ އެވެ.
