މާލޭގައި ކޭއެފްސީ ހުޅުވަން ތައްޔާރުވެއްޖެ!

އަންނަ ހޯމަ ދުވަހު ރާއްޖޭގެ ފުރަތަމަ ކޭއެފްސީގެ އައުޓްލެޓް މާލޭގައި ހުޅުވަން ތައްޔާރުވެއްޖެއެވެ.

ކުކުޅުން އުފައްދާ ތަފާތު ކެއުންތަކަށް މަޝްހޫރު ކޭއެފްސީގެ ރާއްޖޭގެ ފޭސްބުކް ޕޭޖުގައި ބުނެފައި ވަނީ އަންނަ ހޯމަ ދުވަހުގެ 11:00 ގައި މާލޭގައި ކޭއެފްސީ ހުޅުވާނެ ކަމަށާއި ފުރަތަމަ 100 ކަސްޓަމަރުންނަށް ކޭއެފްސީގެ ހާއްސަ ޓީޝާޓެއް ލިބޭނެ ކަމަށެވެ. ކޭއެފްސީގެ އައުޓްލެޓް ހުންނަނީ ޕިއްޒާ ހަޓާ ކައިރީ، އަމީނީ މަގުގެ މާލެ ސްކޮއާގައެވެ.

ރަސްފަންނު ޕެވިލިއަންގައި ކޭއެފްސި ހުޅުވާނެ ކަމަށް ކުރިން އަޑުތައް ފެތުރުނު ނަމަވެސް ފަހުން އެތަނުގައި ހުޅުވީ "ޗިކިން" ކިޔާ ތަނެކެވެ.

ކޭ އެފްސީއަކީ ކުކުޅުން ތަފާތު ކެއުންތައް އުފައްދާ ދުނިޔޭގެ ނަން މަޝްހޫރު ބްރޭންޑެކެވެ. އެގޮތުން 120 އަށް ވުރެ ގިނަ ގައުމުގައި އެ ބެރޭންޑް 20،000 އަށް ވުރެ ގިނަ އައުޓް މިހާރު ވެސް ހުރެއެވެ. މެކްޑޮނާލްޑް އަށް ފަހު އެންމެ އައުޓްލެޓް ގިނައީ ކޭއެފްސީގެއެވެ.