ސިއްހަތާއި ތަނަވަސްކަން ދެއްވި ކޮންމެ މީހަކު ހައްޖުގެ އަޅުކަން އަދާ ކުރުމަށް އަވަސްވެ ގަންނަންޖެހޭ: ޚުތުބާ
20 ޖުލައި 2018 | ހުކުރު 12:43ހައްޖަކީ އެކަމުގައި ތަފާތު މަނާސިކުތަކާއި ކިޔަމަންގަތުންތަކެއް ހިމެނޭ މާލީ އަދި ޖިސްމާނީ އަޅުކަމެއް
މިއަދުގެ ހުކުރު ޚުތުބާ އިއްވާފައިވަނީ ހައްޖުގެ އަޅުކަން މިމައުޟޫއަށް
ސިއްހަތާއި ދުޅަހެޔޮކަމާއި ތަނަވަސްކަން ދެއްވި ކޮންމެ މީހަކު ހައްޖުގެ އަޅުކަން އަދާ ކުރުމަށް އަވަސްވެ ގަތުމަށް މިއަދުގެ ހުކުރު ޚުތުބާގައި ގޮވާލައްވައިފިއެވެ.
ހައްޖުގެ އަޅުކަން މިމައުޟޫއަށް މިއަދު އިއްވި ހުކުރު ޚުތުބާގައި ބުނީ ހައްޖަކީ އެކަމުގައި ތަފާތު މަނާސިކުތަކާއި ކިޔަމަންގަތުންތަކެއް ހިމެނޭ މާލީ އަދި ޖިސްމާނީ އަޅުކަމެއް ކަމަށެވެ.
އެގޮތުން ތަވާފުކުރުމާއި ސަފާމަރްވާއާ ދެމެދު ހިނގުމާއި ނަމާދުކުރުމާއި ދުއާ ކުރުމާއި ހަދްޔު ކަތިލުމާއި ބޯ ބޭލުމާއި ނުވަތަ ބޯކޮށުމާއި މިނާގައި ރޭކުރުމާއި، ޒިކްރުކުރުމާއި ތަކްބީރު ކިޔުމާއި އަރަފާތުގައި ހުރުމާއި މުޒްދަލިފާގައި ރޭކުރުން ފަދަ ތަފާތު އަޅުކަންތަކެއް ހިމެނޭ ބުރަ އަޅުކަމެއް ކަމަށެވެ. އަދި ހައްޖުގެ ދުވަސްތަކުގެ މިއަޅުކަންތައް ހިމެނޭތީ އެކަލާނގެ ހައްޖުގެ ދުވަސްތައް އެންމެ މަތިވެރި ދުވަސްތައް ކަމުގައި ލެއްވި ކަމަށް ޚުތުބާގައި ބުންޏެވެ.
ރަސޫލާ ހަދީސް ކުރައްވާފައިވާއި ބަސްފުޅެއްގެ މާނައިވަނީ " ﷲގެ ހަޟްރަތުގައި އަރަފާތު ދުވަހަށްވުރެ މާތްކަން ބޮޑު ދުވަހެއް ނުވެއެވެ. އެ ދުވަހު ﷲ ތައާލާ ދުނިޔޭގެ އުޑަށް ތަޖައްލީވެވޮޑިގެން، އުޑުގެ އަހްލުވެރިންގެ ގާތުގައި ބިމުގެ އަހްލުވެރިންނާމެދު ފަޚްރުވެރިވެ ވޮޑިގަންނަވާނެއެވެ. އެހިނދު ވަޙީ ކުރައްވާނެތެވެ. ތިޔަބައިމީހުން ތިމަންރަސްކަލާނގެ ޙަސްރަތަށް އައިސް އެތިބީ ބޯހޭވި ހިރަފުހުން ތަތްތެޅި ކާރޫބާރޫބޮޑުކަމުގެ ތެރޭގައެވެ. އެބައިމީހުން އައިސްމިވަނީ ދުރު ހިސާބު ހިސާބުންނެވެ. އެބައިމީހުން ތިމަންރަސްކަލާނގެ ޢިޤާބު ނުދެކި ތިމަންރަސްލާނގެ ރަހްމަތަށް އެދެއެވެ. ފާފަކުރާ އަޅުތަކުން، އަރަފާތު ދުވަހަށްވުރެ ގިނައިން ނަރަކައިން މުއްތިކުރެއްވޭނޭ އެހެން ދުވަހެއް ނުވެއެވެ."
މާތްﷲ އެމީހަކަށް ސިއްހަތާއި ދުޅަހެޔޮކަމާއި ތަނަވަސްކަން ދެއްވި ކޮންމެ މީހަކު ހައްޖުގެ ފަރީޟާ އަދާ ކުރުމަށް އަވަސްވެ ގަންނަންޖެހޭކަން ފާހަގަކުރައްވާ ޚުތުބާގައި ބުނީ ލިބުނު ފުރުސަތު ބީވެގެން ދިޔަދީގެން ނުވާނެ ކަމަށެވެ. އެގޮތުން މަބްރޫރު ހައްޖެއް ހޯދުމަށް ހައްޖުގެ ރުކުންތަކާއި ވާޖިބުތަކާއި ސުންނަތްތައް ދަސްކުރުމަށް ވަނީ ގޮވާލާފައެވެ.
ހުކުރު ޚުތުބާގައި ބުނީ ހައްޖަކީ އެހެނިހެން އަޅުކަންތަކާ ހިލާފަށް ވަރަށް ބުރަ އަޅުކަމެއް ކަމަށާއި، އެކަމުގައި ތިމާގެ ޖާނާއި މުދާ ހޭދަކުރަންޖެހޭ ކަމަށްށެވެ. އެކަމުގައި ދަތުރުފަތުރު ހިމެނޭ ކަމަށާއި، މީސް ބޯކަމާއި ކާރޫބާރު ބޮޑުކަން ހިމެނެއެވެ. ކެތްތެރިކަމަށާއި، ޚުޝޫޢަތްތެރިކަމަށާއި، މަޑުމައިތިރިކަމަށް ބޭނުންވާ ކަމަށް ޚުތުބާގައި ބުންޏެވެ.
