އެއްވެސް ރައްޔިތަކު އެއްކިބާއެއް އިންސާފުން ނުވާނެ: ފައިސަލް
ގުޅިފައިވާ ޕާޓީތަކުގެ ވެރިކަމުގައި އެއްވެސް ފަރާތަކަށް ނުފޫޒެއް ނުފޯރުވާނަން
އެމްޑީޕީގެ ހަރުގޭގައި ބޭއްވި ޖަލްސާގައި ފައިސަލް ވާހަފުޅު ދައްކަވަނީ
ގުޅިފައިވާ ޕާޓީތަކުގެ ވެރިކަމެއްގައި ދިވެހި އެއްވެސް ރައްޔިތަކު އިންސާފުން އެއްކިބާ ނުވާނެ ކަމަށް އިބްރާހިމް މުހައްމަދު ސޯލިހު (އިބޫ) ގެ ރަނިންގމޭޓު ފައިސް ނަސީމް ވިދާޅުވެއްޖެއެވެ.
ދިއްގަރު ދާއިރާގެ ރައްޔިތުންގެ މަޖިލީހުގެ މެމްބަރު ފާރިސް މައުމޫން ޖަލުގައި ބަންދުކުރެވިފައިވާތާ އެއް އަހަރު ދުވަސް ވުމާއި ގުޅިގެން ގުޅިފައިވާ ސިޔާސީ ޕާޓީތަކުން އެމްޑީޕީ ހަރުގޭގައި ބުދަ ދުވަހުގެ ރޭ ބޭއްވި ޖަލްސާގައި ވާހަކަފުޅު ދައްކަވަމުން ފައިސަލް ވިދާޅުވީ ގުޅިފައިވާ ސިޔާސީ ޕާޓީތަކުގެ ވެރިކަމެއްގައި އެއްވެސް ފަރާތަކަށް ނުފޫޒެއް ނުފޯރުވާނެ ކަމަށާއި ވަކި މީހެއްގެ މެދުގައި ތަފާތުކުރުމެއް ނުގެންގުޅުއްވާނެ ކަމަށެވެ. އިންސާފަކީ ދިވެހި ކޮންމެ ރައްޔިތަކަށް ލިބެންޖެހޭ އެއްޗެއް ކަމަށް ފައިސަލް ވިދާޅުވިއެވެ.
"އަޅުގަނޑުމެން ޙަގީގަތުގައި ރާއްޖޭގެ އެކި ކަންކޮޅުތަކަށް އެއްވެ ތިބެގެން، މި ގޮތަށް މަސައްކަތް ކުރަން ޖެހެނީ ވެސް، އަޅުގަނޑުމެންގެ ތެރޭގައި އިންސާފު ނެތުމުން، އެގޮތުން އަޅުނޑުމެންގެ ސަރުކާރެއްގައި އިރާދަކުރެއްވިއްޔާ ދިވެހި ރާއްޖޭގެ ހުރިހާ ރައްޔިތުންގެ މެދުގައި ހަމަހަމަކަން ގާއިމްވެގެންދާނެ" ހަރުގެ ޖަލްސާގައި ވާހަކަފުޅު ދައްކަވަމުން ފައިސަލް ވިދާޅުވިއެވެ.
ސިޔާސީ އެކި ސަބަބުތަކަށްޓަކައި މި ވަގުތު ޖަލުގެ ތޭރިތަކުގެ ފުރަގަހުގައި ތިއްބެވި ބޭފުޅުންނަކީ ކުއްވެރިން ނޫން ކަމަށާއި އެ ބޭފުޅުން މިނިވަން ކުރުމަށް، ކަމާއި ބޭހޭ މުވައްސަސާތަކަށް ފައިސަލް ވަނީ ގޮވާލައްވާފައެވެ. އިސްލާހީ މަސައްކަތް ގުޅިފައިވާ ސިޔާސީ ޕާޓީތަކުން ފެށީ ވެސް އިންސާފުން ގެއްލިގެން ދިއުމުން ކަމަށާއި އެ މަސައްކަތަކާއި އެކު އެތަކެށް ރައްޔިތުންނަން ބޭއިންސާފުން އަނިޔާލިބެމުންދާ ކަމަށް ފައިސަލް ވިދާޅުވިއެވެ.
ގުޅިފައިވާ ޕާޓީތަކުން ބޭއްވި ޖަލްސާގެ ތެރެއިން -- ފޮޓޯ: ސޯޝަލް މީޑިއާ
"މިހާރު ޖަލުތަކުގެ ހިތްދަތިކަން ތަހައްމަލް ކުރަމުންދާ ފަރާތަކަށް އިންސާފު އެއީ ލިބެންޖެހޭނެ އެއްޗެއް، މިހާރުން މިހާރަށް ކަމާއި ބެހޭ ފަރާތްތަކުން މިކަން ކޮށް، ގައުމު ހަމަ މަގަށް ގެންދިއުމަށްޓަކައި ކަންތައްތައް ކުރުމަކީ، އިސްލާހުގެ މަގަށް ކަންތައްތައް ކުރުމަކީ ވަކި ވަގުތެއްގައި ކުރަންޖެހޭނެ ކަމެއް ނޫން، މިހާރުން މިހާރަށް އެކަންތައްތައް ކޮށް ރައްޔިތުންން ހަމަޖެހިލައިގެން އުޅެވޭނެ ގޮތް ތަނަވަސް ކޮށްދިނުމަކީ މިއަދު ކަންތައްތަކާއި ހަވާލުވެތިބި މީހުންގެ ޒިންމާއައެއް" ފައިސަލް ވިދާޅުވިއެވެ.
އެހެންކަމުން ގުޅިފައިވާ ސިޔާސީ ޕާޓީތަކުގެ ވެރިކަމުގައި ރައްޔިތުންނަން ލިބޭނެ އެންމެ ބޮޑު ހިތްހަމަޖެހުމަކީ އިންސާފު ގާއިމްވެފައި އޮތުމުން ލިބޭނެ ހިތްހަމަޖެހުން ކަމަށް ފައިސަލް ވިދާޅުވިއެވެ.
