އަޅުގަނޑުގެ ފިކުރު ނެތިކޮށްލަން ނިކުތީ އަޅުގަނޑުމެންގެ ތެރެއިން، މި ފަސް އަހަރަކީ ހިތް ދަތި، ނާމާން ދުވަސްތަކެއް: ރައީސް
18 ޖުލައި 2018 | ބުދަ 14:50ޕީޕީއެމުން ކުރި ދަތުރަކީ ހިތްދަތި ދަތުރެއް
ބާރަށުގައި ބޭއްވި ރަސްމިއްޔާތުގައި ރައީސް ޔާމީން ވާހަކަދައްކަވަނީ
އެމަނިކުފާނުގެ ފިކުރު ނެތިކޮށްލުމަށް ނިކުތީ، ޕީޕީއެމްގެ ތެރެއިން ކަމަށާއި، ވެރިކަމުގެ ފަސް އަހަރަކީ ހިތް ދަތި، ނާމާން ދުވަސްތަކެއް ކަމަށް ރައީސް އަބްދުﷲ ޔާމީން ވިދާޅުވެއްޖެ އެވެ.
ރައީސް ޔާމީން އެފަދައިން ވިދާޅުވީ ހއ. ބާރަށު ރައްޔިތުންނާއި މުހާތަބުކުރައްވާ ވާހަކަފުޅު ދައްކަވަމުންނެވެ.
ބާރަށު ޖެޓީ ހުޅުއްވައިދެއްވުމަށް ބޭއްވި އެ ރަސްމިޔާތުގައި ވާހަކަފުޅު ދައްކަވަމުން ރައީސް ޔާމީން ވިދާޅުވީ ޕީޕީއެމުން ކުރި ދަތުރަކީ ހިތްދަތި ދަތުރެއް ކަމަށެވެ. އެގޮތުން ވެރިކަމުގެ ފަސް އަހަރަކީ ފަސޭހަ ދުވަސްތަކެއް ނޫން ކަމަށާއި، އަމާން ދުވަސްތަކެއް ވެސް ނޫން ކަމަށް ރައީސް ޔާމީން ވިދާޅުވި އެވެ.
ރައީސް ޔާމީން ވިދާޅުވިގޮތުގައި އެ ހިތްދަތިކަމާއި، ނާމާންކަމާއި ކުރިމަތިލައްވަންޖެހިވަޑައިގެންނެވީ އެމަނިކުފާނުގެ ޕާޓީގެ ތެރެއިން ބަޔަކު ނިކުމެ، އެމަނިކުފާނުގެ ފިިކުރާއި ދެކޮޅަށް މަސައްކަތް ފެށުމާއި ގުޅިގެންނެވެ. އަދި ވިދާޅުވީ އެމަނިކުފާނުގެ ފިކުރު ނެތިކޮށްލަން ނިކުތީ އެމްޑީޕީން ނޫން ކަމަށާއި، އެކަން ކުރުމަށް ނިކުތީ އެމަނިކުފާނާއެކުގައިި ތިއްބެވި އެމަނިކުފާނުގެ ބޭފުޅުން ކަމަށެވެ. އޭގެތެރޭގައި އެމަނިކުފާނުގެ މިނިސްޓަރުންނާއި، ސްޓޭޓް މިނިސްޓަރުންނާއި، ރައްޔިތުންގެ މަޖިލީހުގެ މެމްބަރުން ހިމެނޭ ކަމަށް ރައީސް ޔާމީން ވިދާޅުވި އެެވެ.
"ނިމުނު ދުވަސްތަކަކީ ހިތް ދަތި ދުވަސްތަކެއް، އަޅުގަނޑުގެ ސަރުކާރަށް އެތައް ގޮންޖެހުންތަކެއް ކުރިމަތިވި. އަޅުގަނޑު ދޫކޮށްދިޔައީ އަޅުގަނޑުގެ ސިޔާސަތު ގޯސްވެގެނެއް ނޫން. އެއްވެސް މީހަކަށް ވިދާޅެއް ނުވެވޭނެ އަޅުގަނޑުކުރި ކަންތައްތަކަކީ ރައްޔިތުން ނޭދޭ ކަންތައްތަކެއް ކަމަކަށް."
ރައީސުލްޖުމްހޫރިއްޔާ، ހއ. ބާރަށު ރައްޔިތުންނާ ބައްދަލު ކުރެއްވުން -- ފޮޓޯ: ރައީސް އޮފީސް
އިތުރަށް ވާހަކަފުޅު ދައްކަވަމުން ރައީސް އަބްދުﷲ ޔާމީން ވިދާޅުވީ ސިޔާސީ މައްސަލަތައް ހައްލުކުރުމަށް އެމަނިކުފާނު ބޭނުންވާ ކަމަށެވެ. ނަމަވެސް ކުށްވެރިން ދޫނުކުރެވޭނެ ކަމަށާއި، އެ ކުށްވެރިން ދޫކުރެވެން ނެތީ އެއީ ރައްޔިތުންގެ މަސްލަހަތު އެކަމުގައި ހިމެނޭތީ ކަމަށް ރައީސް ޔާމީން ވިދާޅުވި އެވެ.
އެމަނިކުފާނު ވިދާޅުވީ މަޝްވަރާއަށް ގޮވާލުމުން ސިޔާސީ ހައްޔަރީން މިނިވަންކޮށް، ލީޑަރުން މިނިވަން ކުރުމަށް ޕާޓީތަކުން ޝަރުތު ކޮށްފައިވާކަމަށާއި، އެ ޝަރުތު ފުރިހަމަ ކޮށްދީފިނަމަ އިތުރަށް ދައްކާނެ ވާހަކައެއް ނޯންނާނެ ކަމަށެވެ. އެހެންކަމުން އެ ހިސާބުން މަޝްވަރާކުރުމުގެ ބޭނުމެއް ނޯންނާނެ ކަމަށް ވެސް ރައީސް ޔާމީން ވިދާޅުވި އެވެ. އަދި ވިދާޅުވީ އެމަނިކުފާނު އެއްވެސް ޝަރުތުތަކެއް ނެތި މަޝްވަރާއަށްދާއިރު، އެ ބޭފުޅުން ވެސް އަންނަންޖެހޭނީ އެއްވެސް ޝަރުތެއް ނެތި ކަމަށެވެ. އެހެން ނޫނީ އިންސާފަށް ނުވާނެ ކަމަށް ރައީސް ޔާމީން ވިދާޅުވި އެވެ.
"އަޅުގަނޑަށް އެ ބޭފުޅުން ހުށައެޅިި ޝަރުތުތަކާއއި އެއްގޮތަށް ކަންތައްތައް ކޮށްދެވޭކަން ނެތް"
ރައީސުލްޖުމްހޫރިއްޔާ، ހއ. ބާރަށު ރައްޔިތުންނާ ބައްދަލު ކުރެއްވުން -- ފޮޓޯ: ރައީސް އޮފީސް
ސިޔާސީ ހައްޔަރީން މިނިވަން ކުރުމަކީ ކުރެއްވޭނެ ކަމެއް ނޫންކަމަށް ރައީސް ޔާމީން ވިދާޅުވިއިރު، ބުދަ ދުވަހު އެމަނިކުފާނު ވަނީ މަސްތުވާތަކެތީގެ ބޮޑެތި މައްސަލަތަކުގައި ހުކުމް ތަންފީޒްކުރާ ކުށްވެރިންނަށް މައާފު ދިނުމަށް ގަވައިދަށް ބަދަލު ގެނެސްފަ އެވެ. އަދި ގަވައިދަށް ބަދަލު ގެނެސް، ކުށްވެރިންތަކަކަށް މައާފު ދިނުމަށް ތައްޔާރުވާއިރު، އެއީ ގައުމުގެ އަމާން ކަމަށް އޮތް ހުރަހެއް ކަމަށް ސަރުކާރުން ޤަބޫލުކުރާ ކަމަކަށް ނުބެލެވެ އެވެ.
