ރީ ރަޖިސްޓްރީ ކުރުމުންދޭ ލިޔުމުގެ އޮރިޖިނަލް ކޮންމެހެން ވެސް ބާއްވަން ޖެހޭ: މާރިޔާ
ފަހަށް މަޑުނުކޮށް އަވަހަށް ރަޖިސްޓްރީ ކުރުމަށް ގޮވާލަން
ރީ ރެޖިސްޓްރީކުރުމުގެ މަސައްކަތް ކުރިއަށް ދަނީ
ރަށްވެހިވެފައިވާ ރަށް ނޫން އެހެން ރަށެއްގައި ވޯޓުލުމަށް ރަޖިސްޓްރީ ކުރުމުންދޭ ލިޔުމުގެ އޮރިޖިނަލް ކޮންމެ މީހެއްގެ އަތުގައި ވެސް ބޭއްވުން ވަރަށް މުހިއްމު ކަމަށް ގުޅިފައިވާ ޕާޓީތަކުގެ ރިޔާސީ ކެންޑިޑޭޓް އިބްރާހީމް މުހައްމަދު ޞޯލިހްގެ ތަރުޖަމާން މާރިޔާ އަހުމަދު ދީދީ ވިދާޅުވެއްޖެއެވެ.
ރާއްޖެ އެމްވީއަށް ދެއްވި އިންޓަރވިއުއެއްގައި މައްޗަންގޯޅީ އުތުރު ދާއިރާގެ މެންބަރުކަން ވެސް ކުރައްވާ މާރިޔާ ވިދާޅުވީ މިވަގުތު އެންމެ މުހިއްމީ ވޯޓުލާ ދުވަހު ހުންނާނެ ތަނެއް ކަނޑައަޅައި ރީ ރަޖިސްޓްރީ ކުރުން ކަމަށާއި ހުރިހާ ފަރާތްތަކުން ވެސް ފަހަށް މަޑުނުކޮށް އެކަން ކުރަންޖެހޭ ކަމަށެވެ.
މާރިޔާ ވިދާޅުވީ މިސަރުކާރުން މިނިވަން އިންސާފްވެރި އިންތިޚާބެއް ބާއްވަން ފުރުސަތު ދޭނޭ ކަމަށް ޤަބޫލުނުކުރައްވާ ކަމަށާއި ވޯޓުން މަކަރު ހެދުމަށް ވަރަށް ބޮޑަށް ސަރުކާރުން މަސައްކަތްކުރާ ކަމަށެވެ. ނަމަވެސް އެކަންކަން ކުޑަކޮށް، މަކަރު ހެދުމާއި އޮޅުވާލުމުން ގެއްލޭ ވޯޓު މަދުކުރުމަށް ވީހާ ވެސް ބޮޑަށް މަސައްކަތް ކުރަން ޖެހޭ ކަމަށް މާރިޔާ ވިދާޅުވިއެވެ.
އެގޮތުން ވޯޓުލާން ރީ ރަޖިސްޓްރީ ކުރުމުން އިލެކްޝަންސް ކޮމިޝަނުން ދޫކުރާ ލިޔުމުގެ އޮރިޖިނަލް ކޮންމެ މީހެއްގެ އަތުގައިވެސް ބޭއްވުން މުހިއްމު ކަމަށާއި ވޯޓުލާ ދުވަހު އެލިޔުން ގެންދިއުމަކީ ވެސް މުހިއްމު ކަމެއް ކަމަށެވެ. ރަޖިސްޓްރީ ކުރިއަސް ނަން ނޯވެދާނެ ކަމަށް ބަލަން ޖެހޭ ކަމަށާއި އެފަދަ ހާލަތެއްގައި ރަޖިސްޓްރީ ކުރިކަން ދެއްކުމަށް ވެސް އެލިޔުން މުހިއްމުވާނެ ކަމަށް މާރިޔާ ވިދާޅުވިއެވެ.
އެންމެ ފަހުން ބޭއްވި ރިޔާސީ އިންތިޚާބުގައި ވަނީ ރަޖިސްޓްރީއާ ކުޅުނު ކަމުގެ ތުހުމަތު ކުރެވިފައެވެ. އަދި ރީ ރަޖިސްޓްރީކުރި ބައެއް މީހުންގެ ނަން ރަޖިސްޓްރީކުރި ތަންތަނުގައި ނެތުމުގެ މައްސަލަތައް ވަނީ ފެންމަތިވެފައެވެ.
