ވ. ކެޔޮދޫގައި ސިހުރު ހަދާ ކަމަށް ބުނާތީ ފުލުހުން އޮޕަރޭޝަނެއް ހިންގައިފިއެވެ.

ފުލުހުން ވެސް ވަނީ މިކަން ކަށަވަރުކޮށްދީފައެވެ. އަދި އެ އޮޕަރޭޝަނުގައި ބެލި ދެގެއިން ސިހުރު ހަދާ ކަމަށް ބެލެވޭ ތަކެތި ފެނިފައިނުވާ ކަމަށް ފުލުހުން ބުނެއެވެ.

މިކަމާ ގުޅިގެން ތުހުމަތުކުރެވޭ އެރަށުގެ ދެ ގެއެއް ބަލާފާސްކޮށްފައި ވެއެވެ. އެ ކަމާ ގުޅޭ ގޮތުން ރަށުގެ މީހަކު ބުނީ، ދެ ގެއެއް ބަލާފާސްކޮށްފައިވާ ކަމަށާއި އެ ދެ ގެއިން ބައެއް ތަކެތި ފުލުހުން ގެންދިޔަ މަންޒަރު ވެސް ފެނުނު ކަމަށެވެ. އަދި ތުހުމަތު ކުރެވޭ ދެ މީހަކު ކައުންސިލް އިދާރާއަށް ގެންގޮސް ސުވާލު ކުރެވުނު ކަމަށް ވެސް އޭނާ ބުންޏެވެ.

ކެޔޮދޫގައި ސިހުރުގެ ހަދާ ކަމަށް ތުހުމަތު ކުރެވޭ ދެ މީހެއްގެ ގެ ބަލާފާސްކޮށްފައި ވަނީ ގިނަ ޝަކުވާތަކެއް ފުލުހުންނަށް ލިބުމާ ގުޅިގެންނެވެ.

އަންގާރަ ދުވަހު މި އޮޕަރޭޝަން ހިންގާފައިވާއިރު މި ފާއިތުވެދިޔަ ދުވަސްތަކުގައި އެ ރަށުގައި ގިނައިން ސިހުރު ހާހޫރަ ހަދަމުންދާ ކަމަށް ތުހުމަތުކޮށް ރަށުގެ ބައެއް ފާރުތަކުގައި ތަފާތު ބާވަތްބާވަތުގެ ލިޔުންތައް ވެސް ލިޔެފައި ހުއްޓެވެ.

އެ ރަށު ކައުންސިލްގެ ރައީސް އަހުމަދު ޔޫސުފް ވިދާޅުވީ، ސިހުރު ހަދާ ކަމުގެ ތުހުމަތުތަކެއް ބަޔަކާ މެދު ކުރެވެމުންދާ ކަމަށް ތުހުމަތު ކުރެވޭތާ ދުވަސްތަކެއް ވެފައިވާ ކަމަށާއި ގިނަ ބަޔަކު އެކަމާ ގުޅިގެން ޝަކުވާ ވެސް ކުރަމުންދާ ކަމަށެވެ. އެހެން ނަމަވެސް އެކަމުގެ ހަގީގަތެއް ނޭނގޭ ކަމަށް އޭނާ ވިދާޅުވިއެވެ.

ވ. ކެޔޮދޫގައި މިފަދަ އޮޕަރޭޝަނެއް ހިންގާފައިވާ އިރު ސިހުރު ހެދުމުގެ ތުހުމަތުތަކުގައި މީގެ ކުރިން އެހެން ބައެއް ރަށްރަށުގައި ވެސް ފުލުހުން ވަނީ ތަފާތު އޮޕަރޭޝަންތައް ހިންގާފައެވެ. މިފަދަ އޮޕަރޭޝަންތަކުގައި ބައެއް މީހުން ހައްޔަރުކޮށްފައި ވެސް ވެއެވެ.

ސިހުރު ހެދުމާއި ޖުވާ ކުޅުމަކީ ގާނޫނީ ކުށްތަކެއްގެ ގޮތުގައި ކަނޑައެޅުމަށްޓަކައި ގަނޫނުލް އުގޫބާތަށް އިސްލާހެއް ދާދި ފަހުން ސަރުކާރުން ވަނީ ހުށަހަޅާފައެވެ. މި ބިލް މަޖިލީހަށް ހުށަހަޅާފައި ވަނީ ފޭދޫ ދާއިރާގެ މެންބަރު އިބްރާހިމް ދީދީއެވެ.

އިސްލާމްދީނުގައި ސިހުރު ހެދުމަކީ ބޮޑު ވެގެންވާ ފާފައެކެވެ.