ރިޒޯޓުތަކުގައި ބަހައްޓާ ވޯޓު ފޮށިތައް މަދުކުުރުމުން ބޮޑު މުޒާހަރާ އަކަށް ގޮވާލަން ޖެހޭ: ދިޔާނާ

2013 ވަނަ އަހަރާ އަޅާބަލާއިރު 2018 ވަނަ އަހަރު އޮންނަ ރިޔާސީ އިންތިޚާބުގައި ރިޒޯޓުތަކުގައި ބަހައްޓާ ވޯޓު ފޮށިތައް އިލެކްޝަންސް ކޮމިޝަނުން މަދު ކުރަން ނިންމި ނިންމުމާ ގުޅިގެން އެކަމާ ދެކޮޅަށް ބޮޑު މުޒާހަރާއަކަށް ގޮވާލަން ޖެހޭ ކަމަށް ކުރީގެ ބަންޑާރަ ނައިބު ދިޔާނާ ސައީދު ވިދާޅުވެއްޖެއެވެ.

ދިޔާނާ އަންގާރަ ދުވަހު ކުރެވި ޓްވީޓެއްގައި ވިދާޅުވީ 2013 ގައި ބޭއްވި ރިޔާސީ އިންތިހާބުގައި ރާއްޖޭގެ 42 ރިޒޯޓެއްގައި ވޯޓު ފޮށި ބަހައްޓާފައިވާ އިރު އަންނަ ސެޕްޓެމްބަރު 23 ގައި އޮންނަ ރިޔާސީ އިންތިޚާބުގައި ވޯޓު ފޮށި ބަހައްޓަން ހަމަޖެހިފައި ވަނީ އެންމެ ހަތް ރިޒޯޓުގައި ކަމަށާއި އެއީ ހިސާބުޖަހައިގެން، ސަރުކާރާ އިދިކޮޅު ފަރާތްތަކުގެ ސަޕޯޓު ބޭސް އިން އެތައް ހާސް ބައެއްގެ ވޯޓުލުމުގެ ހައްގު ނިގުޅައިގަނެ ރިޔާސީ އިންޚާބަށް ނުފޫޒު ފޯރުވުމަށް ކުރާ ކަމެއް ކަމަށެވެ. އަދި މިކަންކަން މިހެން ކުރީތީ މިކަމާ ދެކޮޅަށް ބޮޑު މުޒާހަރާއަކަށް ގޮވާލަން ޖެހޭ ކަމަށް ވެސް ދިޔާނާ ވިދާޅުވިއެވެ.

ރިޒޯޓުތަކުގައި ބަހައްޓާ ވޯޓު ފޮށީގެ އަދަދު މަދުކޮށްފައިވާތީ، ހޯމަ ދުވަހު ބޭއްވި ނޫސްވެރިންގެ ބައްދަލުވުމެއްގައި ގުޅިފައިވާ އިދިކޮޅު ސިޔާސީ ޕާޓީތަކުގެ ރިޔާސީ ކެންޑިޑޭޓް، އިބްރާހިމް މުހައްމަދު ސޯލިހު (އިބޫ)ގެ ތަރުޖަމާނު މާރިޔާ އަހުމަދު ދީދީ ވިދާޅުވެފައި ވަނީ ރިޔާސީ އިންތިހާބުގައި އެންމެ ހަތް ރިސޯޓުގައި ވޯޓު ފޮށި ބަހައްޓަން އިލެކްޝަން ކޮމިޝަނުން ނިންމުން އެއީ ވޯޓުލުމުގެ ހައްގު ނިގުޅައިގަތުމަށް ކުރާ ކަމެއް ކަމަށެވެ. ހޯމަ ދުވަހު ސޯލްޓު ކެފޭގައި ބޭއްވި ނޫސްވެރިންގެ ބައްދަލުވުމުގައި ވާހަކަފުޅު ދައްކަވަމުން މާރިޔާ ވިދާޅުވީ ދިވެހިން އެތައް ބައިވަރު ރިސޯޓުތަކެއްގައި ވަޒީފާ އަދާކުރަމުން އަންނައިރު، މި އަހަރު ބާއްވާ އިންތިހާބުގައި އެންމެ ހަތް ރިސޯޓުގައި ވޯޓު ފޮށި ބަހައްޓަން ނިންމުމަކީ ކަންބޮޑުވާ ކަމެއް ކަމަށެވެ. އަދި މިއަދު މި ފެންނަނީ ރިޒޯޓުތަކުގައި މަސައްކަތް ކުރާ މުވައްޒިފުންނަން ވޯޓުލުމުގެ ހައްގު ރައީސް ޔާމީންގެ ސަރުކާރުން ނިގުޅައި ގަންނަމުން ދާތަން ކަމަށް ވެސް މާރިޔާ ވިދާޅުވިއެވެ.