ފިލްމީ ތަރި ރީތާ ބަދޫރީ މަރުވެއްޖެ

ވެޓެރަން އެކްޓްރެސް ރީތާ ބަދޫރީ އުމުރުން 62 އަހަރުގައި މަރުވެއްޖެއެވެ.

ރީތާ މަރުވީ މުމްބާއީގައި ކިޑްނީގެ ބައްޔަށް ފަރުވާ ދެމުން ދަނިކޮށް އަންގާރަ ދުވަހުގެ ހެނދުނުގެ ވަގުތެއްގައެވެ.

އޭނާގެ މަރާ ގުޅިގެން އެކްޓަރ ޝިޝިރް ޝަރްމާ ބުނެފައި ވަނީ މަރުވެ ދިޔައީ ހެޔޮލަފާ ރަނގަޅު އިންސާނެއް ކަމަށާއި އަދި ރަނގަޅު މަންމައެއް ކަމަށެވެ. އޭނާގެ މަތިން އަބަދުވެސް ހަނދާން ކުރާނެ ކަމަށް ޝަރްމާ ވަނީ ބުނެފައެވެ.

ރީތާ ބަދޫރީ ކެރިއަރ ފަށާފައި ވަނީ އޭނާގެ އުމުރުން 16 އަހަރުގައެވެ. އޭނާ ވަނީ ޓީވީ ސީރީޒްތަކުގަ އާއި އެކި ފިލްމުތަކުން ވެސް ފެނިގެން ގޮސްފައެވެ. ރީތާ ފެނިގެން ގޮސްފައިވާ ފިލްމުތަކުގެ ތެރޭގައި ހިންދީ ފިލްމު "ވިރްސާތު"، "ރާޖާ"، "ހީރޯ ނަންބަރު1"، "ކަބީ ހާން ކަބީ ނާ"، "ކިޔާ ކެހެނާ" އަދި "ބޭޓާ" ހިމެނެއެވެ. މީގެ އިތުރުން ގުޖުރާތީ ފިލްމުތަކުން ވެސް އޭނާ ވަނީ ފެނިގެން ގޮސްފައެވެ. ރީތާ އެންމެ ފަހުން ފެނިގެންގޮސްފައިވާ ފިލްމަކީ 2003 ވަނަ އހަރު ނިކުތް ހިންދީ ފިލްމު "މޭ މަދޫރީ ޑިކްސިޓް ބަންނާ ޗާތީ ހޫން" އިންނެވެ. އޭގެ ފަހުން އޭނާ ބޮޑަށް ފެނިގެން ގޮސްފައި ވަނީ ޓީވީ ސީރީޒްތަކުންނެވެ. މަރުވި އިރު އޭނާ ދިޔައީ ސްޓާ ބާރަތުން ދައްކާ "ނިމްކީ މުކިޔާ" ގައި ހަރަކާތްތެރިވަމުންނެވެ.