ކެންޑިޑޭޓުންނަށް ހަމަހަމަ ފުރުސަތު ދިނުމުގެ ނަމުގައި އެކުލަވާލާ އުސޫލުގެ ދަށުން މީޑިއާގެ މިނިވަން ކަމަށް ހުރަސް ނޭޅުމަށް ރާއްޖެޓީވީން ގޮވާލައިފި
16 ޖުލައި 2018 | ހޯމަ 03:30މިހާރު އޮތް ގޮތަށް ފާސްކޮށް އަމަލު ކުރަން ފަށައިފިނަމަ ރާއްޖޭގެ ޤާނޫނު އަސާސީން ލިބިދީފައިވާ ނޫސްވެރިކަމުގެ މިނިވަންކަމަށް ހުރަސް އެޅިދާނެ
ރާއްޖެޓީވީން ބްރޯޑްކޮމްގައި މިއަހަރުގެ ފެބްރުއަރީ މަހު ބޭއްވި ބައްދަލުވުމުގެ ތެރެއިން
ކެންޑިޑޭޓުންނަށް ހަމަހަމަ ފުރުސަތު ދިނުމުގެ ނަމުގައި އެކުލަވާލާ އުސޫލުގެ ދަށުން މީޑިއާގެ މިނިވަން ކަމަށް ހުރަސް ނޭޅުމަށް ރާއްޖެޓީވީން ގޮވާލައިފިއެވެ.
އާދިއްތަ ދުވަހު ރާއްޖެޓީވީން ނެރުނު ބަޔާނުގައި ބުނެފައި ވަނީ ރިޔާސީ އިންތިހާބުގައި ވާދަ ކުރައްވާ ކެންޑިޑޭޓުންނަށް ހަމަ ހަމަ ފުރުސަތު ހޯދައިދިނުމުގެ ނަމުގައި ބްރޯޑްކާސްޓިންގ ކޮމިޝަނުން އެކުލަވާލައިފައިވާ "އިންތިހާބީ ކެންޑިޑޭޓުންނަށް ބްރޯޑްކާސްޓަރުންގެ ވަގުތު ހާއްސަ ކުރުމުގެ ހަމަތައް ބަޔާންކުރުމާއި އިދާރީ ފިޔަވަޅު އެޅުމާބެހޭ އުސޫލު" އަށް އެކަށީގެންވާ އިސްލާހުތަކެއް ނުގެނެވި މިހާރު އޮތް ގޮތަށް ފާސްކޮށް އަމަލު ކުރަން ފަށައިފިނަމަ ރާއްޖޭގެ ޤާނޫނު އަސާސީން ލިބިދީފައިވާ ނޫސްވެރިކަމުގެ މިނިވަން ކަމަށް ހުރަސް އެޅި މީޑިއާތައް އިތުރު ބިރުވެރިކަމެއްގެ ތެރެއަށް ވެއްޓި، އަމިއްލަ ބްރޯޑްކާސްޓަރުންގެ މިނިވަންކަން ގެއްލި، ސްޓޭޝަންތަކަށް ބޮޑެތި ގެއްލުންތައް ލިބިދާނެ ކަމެއް ކަމަށް އެ ސްޓޭޝަނަށް ފެންނާތީ ކަންބޮޑުވާ ކަމަށެވެ.
ރާއްޖެޓީވީ ފަދަ ރާއްޖޭގައި ހަރަކާތްތެރިވާ އަމިއްލަ ބައެއް މީޑިއާތަކަކީ ބޭއިންސާފުން ނުހައްޤު ބޮޑެތި އަދަބުތަކެއް ލިބިފައިވާ ތަންތަން ކަން ފާހަގަކޮށް އެ މައްސަލަތަކުގެ އިސްތިއުނާފުގެ މަރުހަލާތައް ހިނގަމުން ދަނީ ނުހަނު ލަސްމިނެއްގައިކަން ފެންނަން އޮތުމާއެކު، ބްރޯޑްކާސްޓިންގ ކޮމިޝަނުން މައްސަލަތައް ބެލުމުގައި މިހާތަނަށް އަމަލު ކޮށްފައި ވަނީ އިތުބާރު ހިފޭ އިންސާފުވެރި ގޮތެއްގައި ނޫން ކަމަށް ޤަބޫލުކުރެވޭ ހިނދު، އަލަށް އަމަލުކުރަން ފަށާފައިވާ އުސޫލުގެ ދަށުން އެ ކޮމިޝަނުން މައްސަލަ ބެލުމަށް ފަހު ލައިސަންސް ބާތިލް ކުރަން ކޯޓަށް ހުށަހެޅުމުގެ ފުރުސަތު އޮންނަ ގޮތަށް މިހާރުގެ ޑްރާފްޓްގައި އޮތުމަކީ އިންތިހާއަށް ކަންބޮޑުވާކަމެއް ކަމަށް ރާއްޖެޓީވީން ބުންޏެވެ.
މީގެ އިތުރުން އަލަށް އެކުލަވާލާ އުސޫލުގެ ދަށުން އެ ކޮމިޝަން އިންސާފުވެރި ނުވާނެ ކަމަށް ޤަބޫލުކުރެވޭ އެންމެ ބޮޑު އެއް ސަބަބަކީ މިހާރު ވެސް ޤާނޫނުގެ ދަށުން ހަމަހަމަ ފުރުސަތު ނުދޭތީ އާއި އެކަންތައްތަކަކީ ފެންނަ ކަންތައްތަކެއް ނޫންކަމަށް އެކޮމިޝަނުން ހަދާފައިވުން ކަމަށް ބަޔާނުގައި ފާހަގަ ކޮށްފައިވެއެވެ.
ރާއްޖެޓީވީން އަމިއްލައަށް އިސްނަގައިގެން އިންތިހާބުގައި ހަމަހަމަ ފުރުސަތު ދިނުމަށް ޕާޓީތަކާއި މަޝްވަރާކުރާކަން ފާހަގަކޮށް ރާއްޖެޓީވީން ބުނީ ޕްރައިވެޓް ބްރޯޑްކާސްޓަރުންގެ އެއަރ ޓައިމް ކަނޑައެޅުމުގައި އޮންނަ މިނިވަންކަން ހަނިކޮށް އެހެން ބައެއްގެ އަތްދަށަށް އޭގެ ބާރު ގެންދިއުމަށް ކުރާ ކަންކަމަކީ ބަލައިގަނެވޭނެ ކަމެއް ނޫން ކަމުގައެވެ.
އެ އުސޫލަށް ކޮމެންޓް ކުރުމަށް ބްރޯޑްކާސްޓިންގ ކޮމިޝަނުން ދިން ވަގުތަކީ ވަރަށް ކުރު މުއްދަތަކަށްވެފައި އޭގައި ނުހަނު ކަންބޮޑުވާ މައްސަލަތައް ހުރުމާއެކު އެކަށީގެންވާ ގޮތެއްގައި އެ އުސޫލާމެދު މަޝްވަރާ ކުރެވި ޤާނޫނީ ލަފާ ހޯދުމުގެ ފުރުސަތު އިތުރު ކޮށްދެއްވުމަށް ކޮމިޝަނުގައި އެދިފައިވާ ކަމަށް ވެސް ރާއްޖެޓީވީން ވަނީ ބުނެފައެވެ.
