ޑީޖޭއޭގެ އެޑްމިނިސްޓްޜޭޓަރގެ މަގާމުން ހަސަން ސައީދު ވަކިކޮށްފި
ހަސަން ސައީދު ހުންނެވީ ޝަރީއަތް ނިމެންދެން ޖަލުގައި ބަންދުކޮށްފައި
ޑީޖޭއޭގެ ކުރީގެ އެޑްމިނިސްޓްރޭޓަރ ހަސަން ސައީދު
ޑިޕާޓްމަންޓް އޮފް ޖުޑީޝަލް އެޑްމިނިސްޓްރޭޝަން (ޑީޖޭއޭ) ގެ އެޑްމިނިސްޓޭޓަރުގެ މަގާމުގައި ހުންނެވި ހަސަން ސައީދު ހުސައިން އެ މަގާމުން ވަކިކޮށްފިއެވެ.
ފެބްރުއަރީ އެކެއްގެ ސުޕްރީމް ކޯޓުގެ އަމުރާ ގުޅިގެން، ސަރުކާރުން 5 ފެބްރުއަރީގައި ކުއްލި ނުރައްކަލުގެ ހާލަތު އިއުލާން ކުރުމަށްފަހު، އެންމެ ފުރަތަމަ ހައްޔަރުކުރި ބޭފުޅުންގެ ތެރޭގައި ހަސަން ސައީދު ހިމެނެ އެވެ. ނަމަވެސް އޭނާ މަގާމުން ވަކިކޮށްފައި މި ވަނީ މި ޖުލައި މަހުގެ 10 ވަނަ ދުވަހު އެވެ.
ހަސަން ސައީދު ހައްޔަރުކުރީ ސުޕްރީމް ކޯޓުގެ ފަނޑިޔާރުންނަށް ރިޝްވަތު ދިން ކަމަށް ކުރާ ތުހުމަތުގެ މައްސަލައެއް ގައެވެ. ގާނޫނު ހިންގަން ހުރަސްއެޅުމުގެ ދައުވާ އޭނާގެ މައްޗަށް އުފުލާފައި ވަނީ އޭނާ ހައްޔަރު ކުރުމަށް ފުލުހުން މަސައްކަތްކުރި އިރު ފުލުހުންނަށް ފިލައިގެން އުޅުނު ކަމަށް ބުނެއެވެ. ސިޔާސީ ބައެއް ލީޑަރުން ހިމެނޭ ގޮތަށް ގިނަ ބޭފުޅުންތަކެއް ދޫކޮށްލަން މި ދިޔަ ފެބްރުއަރީ މަހުގެ އެއް ވަނަ ދުވަހު ސުޕްރީމް ކޯޓުން ނެރުނު އަމުރާއެކު ފުލުހުން ވަނީ ހަސަން ސައީދު ހޯދަން ވެސް އިއުލާން ކޮށްފަ އެވެ. އަދި ފުލުހުން އޭނާ ހޯދަން ކުރި މަސައްކަތް ސުޕްރީމް ކޯޓުން ވަނީ ހުއްޓުވާފަ އެވެ.
ހަސަން ސައީދުގެ މައްޗަށް ވަނީ ސުޕްރީމް ކޯޓުގެ ފަނޑިޔާރުނަށް ރިޝްވަތު ދިނުމުގެ ތުހުމަތުކޮށް ކިތާބީ ހެކި ވެސް ހުރި ކަމަށް ފުލުހުން ބުނެފައެވެ.
ގާނޫނާ ހިލާފަށް ސަރުކާރު ވައްޓާލަން އުޅުނުކަމަށް ބުނެ ހައްޔަރު ކޮށްފައިވާ ބޭފުޅުންގެ މައްސަލަތަކުގެ ޝަރީއަތްތައް ކްރިމިނަލް ކޯޓުގައި މީގެކުރިން ވަރަށް ބާރަށް ހިނގަމުންދިޔަ ނަމަވެސް މިވަގުތު އެ ޝަރީއަތްތަކުގެ އަޑުއެހުންތައް މަޑުޖެހިފައިވާކަން ފާގަހަ ކުރެވެއެވެ. މިދިއަ ފެބްރުއަރީ މަހު ފުލުހުން ވަނީ ހަސަން ސައީދު ދިރިއުޅުއްވާ އެޕާޓްމަންޓް ބަލައި ފާސްކޮށްފައެވެ. ހަސަން ސައީދުގެ ގެ ބަލައި ފާސްކުރި އިރު ހަސަން ސައީދުގެ އެނދުގެ ގޮދަޑި ދަށުން ގިނަ އަދަދެއްގެ ފައިސާ ފެނިފައިވާ ކަމަށް ވެސް ފުލުހުން ބުނެފައި ވެއެވެ.
