ގދ. ފަރެސްމާތޮޑާގެ އިންޖީނުގެއިން ނުކުންނަ ދުމާއި ހެދި ސްކޫލުގެ ދަރިވަރުންނަށް ކިޔަވަން އުނދަގޫވެފައިވާ މައްސަލަ މިހަފްތާގެ ތެރޭގައި ހައްލު ކުރާނެ ކަމަށް އެރަށުގެ ކައުންސިލުން ބުނެފިއެވެ.
ރާއްޖެއެމްވީއަށް މައުލޫމާތު ދެއްވަމުން ފަރެސްމާތޮޑާގެ ކައުންސިލަރު އިބްރާހިމް ސަބާހު ވިދާޅުވީ އިންޖީނުގެއިން ނުކުންނަ ދުމުގެ ސަބަބުން ސްކޫލު ކުދިންނަށް އުނދަގޫވާ މައްސަލައަކީ ގިނަ ދުވަސްތަކެއް ވެފައިވާ ބޮޑު މައްސަލައެއް ކަމަށެވެ.
ވައި ދައުރުވާ ގޮތުން ސުކޫލަށް ދުމުގެ އަސަރު ވަރަށް ބޮޑަށް ކުރާކަން ފާހަގަކުރައްވައި ސޮބާހު ވިދާޅުވީ ދުމުގެ ސަބަބުން ސްކޫލު ކުދިން ހުން އައިސް، ހޮޑުލައި، ބޮލުގައި ރިހުންފަދަ ސިއްހީ މައްސަލަތައް ކުރިމަތިވެފައިވާ ކަމަށެވެ. އަދި ސުކޫލުގެ ފެން ވެސް ބޭނުން ނުކުރެވޭ ކަމަށް އޭނަ ވިދާޅުވިއެވެ.
ސޮބާހު އިތުރަށް ވިދާޅުވީ މިމައްސަލަ އަށް ހައްލު ނުލިބި ގިނަ ދުވަސްތަކެއް ފާއިތުވެގެންދިޔައީ އިންޖީނުގޭގެ މަސައްކަތްތަކާއި ހަވާލުވެ ތިބޭ މެނޭޖަރުން އަވަސް އަވަހަށް ބަދަލުވެގެންދާތީ ކަމަށާއި، ނަމަވެސް މިހަފްތާގެ ތެރޭގައި މިމައްސަލަ ހައްލު ކުރާނެ ކަމަށެވެ. އަދި މިހާރު ފެނަކައިގެ މުއައްޒަފުން މިމައްސަލަ ހައްލު ކުރުމަށް މަސައްކަތް ފަށާފައިވާ ކަމަށް ސޮބާހު ވިދާޅުވިއެވެ.
އިންޖީނުގޭގެ ދުމުގެ ސަބަބުން ސްކޫލުގެ ކުދިންނާއި ޓީޗަރުންނަށް އެކަމުގެ އުނދަގޫތައް ކުރިމަތިވާތީ އެރަށުގެ ސްކޫލުގެ ބެލެނިވެރިން ނުކުމެ ވަނީ ސްކޫލުގެ ގޭޓްގައި މިމަހުގެ 12 ވަނަ ދުވަހު ތަޅު އަޅުވާފައެވެ. ހަފުތާއެއްހާ ދުވަހުގެ ތެރޭގައި ހައްލެއް ހޯދައިދޭނެ ކަމަށް ފެނަކައިން ޔަގީންކަން ދިނުމުން ސްކޫލު ވަނީ އަލުން ހުޅުވާފައެވެ.
އިންޖީނުގެ ކައިރީގައި ހުންނަ ފަރެސްމާތޮޑާ ސްކޫލަކީ ޕްރީ ސްކޫލުން ފެށިގެން ގްރޭޑް 10 އާ ހަމައަށް ކިޔަވައިދޭ ސްކޫލެކެވެ.
