އަމާޒަކީ ހުރިހާ ރަށަކަށް ޒިޔާރަތްކުރުން: އިބޫ
14 ޖުލައި 2018 | ހޮނިހިރު 09:17އައްޑޫ ރައްޔިތުންގެ މެޖޯރިޓީ ގުޅިފައިވާ ސިޔާސީ ޕާޓީތަކަށް ލިބޭނެ
އެމްޑީޕީގެ ރިޔާސީ ކެނޑިޑޭޓު އިބޫގައިގަ ދުވަސްވީ މީހަކު ލޯބިން ބައްދާލަނީ
ރިޔާސީ އިންތިހާބުގެ ކެމްޕޭންގައި ރާއްޖޭގެ ހުރިހާ ރަށަކަށް ދިއުމުގެ އުއްމީދު އެބައޮތް ކަމަށް ގުޅިފައިވާ ޕާޓީތަކުގެ ކެންޑިޑޭޓު އިބްރާހިމް މުހައްމަދު ސޯލިހު (އިބޫ) ވިދާޅުވެއްޖެއެވެ.
ގުޅިފައިވާ ޕާޓީތަކުގެ ކެންޑިޑޭޓަކަށް ވެވަޑައިގެންނެވުމަށް ފަހު ފުރަތަމަ ކުރައްވާ ދަތުރުފުޅުގައި އައްޑުއަށް ވަޑައިގެންފައިވާ އިބޫ އިބޫ ހޮނިހިރު ދުވަހު ވިދާޅުވީ ރިޔާސީ އިންތިޚާބަށް ވަގުތު ކުޑަތަން ވަމުންދާއިރު ބާކީ އޮތް ދުވަސްތަކުގެ ތެރޭގައި ރާއްޖޭގެ ހުރިހާ ރަކަށް ދަތުރުކުރުމުގެ އުއްމީދު އެބަ އޮތް ކަމަށެވެ. އަދި އަމާޒަކީ ހުރިހާ ރަށަކަށް ވަޑައިގެން ރައްޔިތުންނާއި ބައްދަލުކުރެއްވުން ކަމަށް އެ މަނިކުފާނު ވިދާޅުވިއެވެ.
އިބޫ ވިދާޅުވީ ރަނިން މޭޓާއެކު ގުޅިފައިވާ ސިޔާސީ ޕާޓީތަކުގެ ޓީމުގެ މެންބަރުން ރަށްރަށް ޒިޔާރަތްކޮށް ރައްޔިތުން ހާލު ބަލާނެ ކަމަށެވެ.
"އިރާދަކުރެއްވިއްޔާ ކޮންމެ ރަށެއްގެ ރައްޔިތުންނާއި ބައްދަލުކުރުމުގެ އުންމީދު އަޅުގަނޑުމެންގެ އެބައޮތް. އެތަސައްވުރު އެބައޮތް. އަޅުގަނޑުމެން ދަތުރުތައް ރޭވިގެންދާނީ އެގޮތަށް. ރަނިންމޭޓެއް މިހާރު އެހުރީ. އެހެންވީމަ ޓީމްތައް ބައިބައި ކޮށްގެން އަޅުގަނޑުމެންނަށް މިމަސައްކަތް ކުރެވޭނެ. އަޅުގަނޑު އަޒުމް ކަނޑައަޅާގެން މިހުރީ ކޮންމެ ރަށަކަށް އަރަން." އިބޫ ވިދާޅުވިއެވެ.
އެ މަނިކުފާނު ވިދާޅުވީ އައްޑޫ ދަތުރުން އެކަނި ވެސް ގުޅިފައިވާ ސިޔާސީ ޕާޓީތަކަށް ރައްޔިތުންގެ ތާއީދު އޮތް މިންވަރު ފެނިގެން ހިނގެއްޖެ ކަމަށާއި، އައްޑޫ ރައްޔިތުންގެ އަޣުލަބިއްޔަތު ލިބޭނެކަމާމެދު ޝައްކު ނުކުރައްވާ ކަމަށެވެ.
ރިޔާސީ އިންތިޚާބުގެ ކުރިން އައްޑޫއަށް ދަތުރެއް ކުރާނެ ކަމަށާއި، އެދަތުރުގައި ގުޅިފައިވާ ސިޔާސީ ޕާޓީތަކުގެ ބޮޑު ޖަލްސާއެއް ބާއްވާނެ ކަމަށް އިބޫ ވިދާޅުވިއެވެ. މިފަހަރުގެ ދަތުރުގައި ބޮޑު ޖަލްސާއެއް ނުބޭއްވީ އައްޑުއަށް ވަޑައިގެންނެވިއިރު، ރަނިން މޭޓެއް ހަމަޖެހިފައި ނެތުމުން ކަމަށް އެ މަނިކުފާނު ވިދާޅުވި އެވެ.
"މިދަތުރުގައި ބޮޑު ޖަލްސާއެއް ނުބޭއްވުނީ އޭރު ރަނިން މޭޓާއި އެއްޗެހި ކަނޑަނޭޅޭތީ. ދެން އަންނަ ދަތުރެއްގައި އިރާދަކުރެއްވިއްޔާ އަޅުގަނޑުމެން ކޯލިޝަން އެކުގައި ބޮޑު ޖަލްސާއެއް މިތަނުގައި ބޭއްވިގެންދާނެ." އިބޫ ވިދާޅުވިއެވެ.
ދޮރުން ދޮރަށް ކެމްޕެއިން ރަސްމީކޮށް އިބޫ ފައްޓަވައި ދެއްވީ އައްޑޫ ސިޓީ އާއި ފުވައްމުލަކު ސިޓީއަށް އެމަނިކުފާނު ކުރައްވަމުން ގެންދަވާ ދަތުރުފުޅުގައި އައްޑޫ ސިޓީ، މަރަދޫފޭދޫއިންނެވެ. އެމަނިކުފާނު އެ ހަރަކާތް ފެއްޓެވި ވަގުތު ވެރިރަށް، މާލެ އާއި އަތޮޅު ތެރޭގެ އެކި ރަށްރަށުގައި ވެސް ވަނީ ދޮރުން ދޮރަށް ކެމްޕެއިން ފަށައިފަ އެވެ.
