އެމެރިކާގެ ރައީސް ޑޮނަލްޑް ޓްރަމްޕް އިނގިރޭސިވިލާތައް ވަޑައިގެންނެވުމުން އެކަމާ ދެކޮޅަށް ކުރަމުން ގެންދާ މުޒާހަރާތައް "ސުލްހަވެރިވާން ޖެހޭނެ ކަމަށާއި އަދި އެ މުޒާހަރާތައް ކުރަން ވާނީ ހެޔޮނިޔަތުގައި" ކަމަށް ލަންޑަނުގެ މޭޔަރު ސާދިގް ހާން ވިދާޅުވެއްޖެއެވެ.
މޭޔަރު ހާން މިހެން ވިދާޅުވި އިރު އެމެރިކާގެ ރައީސް ވަނީ ދެ ދުވަހުގެ ދަތުރުފުޅެއްގައި ބުރާސްފަތި ދުވަހު އިނގިރޭސި ވިލާތަައް ވަޑައިގެންފައެވެ. މޭޔަރު ހާން ނެރުއްވި ބަޔާނެއްގައި ވިދާޅުވީ ލަންޑަނުގައި ރައީސް ޓްރަމްޕް ގެ ދަތުރުފުޅާ އަމާޒުކޮށް މުޒާހަރާ ކުރާ ފަރާތްތަކަށް އެމަނިކުފާނު ދެއްވާނެ މެސެޖަކީ މުޒާހަރާ ކުރަން ވާނީ ސުލްހަވެރިކޮށް ކަމަށާއި ހަމަނުޖެހުން އުފައްދާ އަދި ގާނޫނު މުގުރާ ފަރާތްތަކަށް "މަރުހަބާ ނުކިޔާނެ ކަމަށެވެ."
ރައީސް ޓްރަމްޕް ގެ ދަތުރުފުޅުގައި އެމަނިކުފާނު ވަނީ އިނގިރޭސި ވިލާތުގެ ބޮޑު ވަޒީރު ތެރީސާ މޭ އާ ވެސް ބައްދަލުކުރަވަން ހަމަޖެހިފައިވެއެވެ.
