ފާރިސް މައުމޫނަށް އަނިޔާވެރިވަމުން އެގެންދަނީ މި ސަރުކާރަށް ތާޢީދު ނުކުރެއްވުމުން: އެމްޑީޕީ
ފާރިސް އަށް ހުކުމް ކުރީ އެއްވެސް ޙުކުމެއް ނެތި ޖަލުގައި ހައްޔަރުކޮށްފައިވާތާ 10 މަސް ދުވަސް ފަހުން
ފާރިސް މައުމޫން އެމްޑީޕީ ޕީޖީ ލީޑަރ އިބޫއާ އެކު: ފާރިސްއަށް ހުކުމް ކުރީތީ އެމްޑީޕީން ކަންބޮޑުވޭ
ދިއްގަރު ދާއިރާގެ ރައްޔިތުންގެ މަޖިލީހުގެ މެމްބަރ އަޙްމަދު ފާރިސް މައުމޫނަށް ޢަބްދުﷲ ޔާމިންގެ ސަރުކާރުން އަނިޔާވެރިވަމުން އެގެންދަނީ ފާރިސް މައުމޫނު މި ސަރުކާރަށް ތާއީދު ނުކުރެއްވުމުގެ ސަބަބުން ކަމަށާއި ފާރިސްގެ މައްޗަށް 4 މަހާއި 24 ދުވަހަށް ޖަލަށްލުމަށް ކްރިމިނަލް ކޯޓުން ޙުކުމް އިއްވާފައިވާތީ އިންތިހާއަށް ކަންބޮޑުވާ ކަމަށް އެމްޑީޕީން ބުނެފިއެވެ.
އެމްޑީޕީން ނެރެފައިވާ ބަޔާނެއްގައި ބުނެފައި ވަނީ ފާރިސް މައުމޫންގެ މައްޗަށް ޕްރޮސިކިޔުޓަރ ޖެނެރަލް ދަޢުވާކުރި މިމައްސަލައަކީ ޕީޕީއެމްގެ ދިދަ އާއި ލޯގޯ ބޭނުންކުރައްވައިގެން އޭނާ ޕްރެސް ކޮންފަރެންސެއް ދެއްވިކަމަށް ބުނާ މައްސަލަ ކަމަށާއި އަދި ޙުކުމް އިއްވާފައި މިވަނީ ފާރިސް މައުމޫން އެއްވެސް ޙުކުމެއް ނެތި ޖަލުގައި ހައްޔަރުކޮށްފައިވާތާ 10 މަސް ދުވަހުސް ފަހުން ކަމަށެވެ.
އެޕާޓީން ބުނީ ޕީޕީއެމްގެ ރައީސްގެ ގޮތުގައި ކުރީގެ ރައީސް މައުމޫނު ޢަބްދުލްޤައްޔޫމް އިންތިޚާބުކޮށްފައި ވަނިކޮށް، އެ ޕާޓީގެ އަސާސީ ޤަވާއިދާ ކަނޑައެޅިގެން ޚިލާފަށް އެ ޕާޓީގެ މުޝްތަޝާރު ޢަބްދުﷲ ޔާމިން ވަނީ އެ ޕާޓީއަށް ވެރިވެގެންފައި ކަމަށެވެ. އަދި އެއަށް ފަހު ރައީސް މައުމޫންގެ ދަރިކަލުން ފާރިސް މައުމޫންގެ މައްޗަށް ޕްރެސް ކޮންފަރެންސެއްގައި އެ ޕާޓީގެ ދިދަ އާއި ލޯގޯ ބޭނުންކުރެއްވި ކަމަށް ބުނެ ނާއިންސާފުން ދައުވާކޮށްފައި ވަނީ ސީދާ ޔާމިނު ތަޙްޤީޤީ އިދާރާތަކަށާއި ޕްރޮސިކިޔުޓަރ ޖެނެރަލަށް ނުފޫޒު ފޯރުވައިގެން ކަމަށް ދެކޭ ކަމަށް އެ ބަޔާނުގައި ވެއެވެ.
ދައުވާ ކުރެވެން ނެތް ކަންކަމުގައި އަމިއްލައަށް މައްސަލަ އުފައްދައިގެން، ހަމައާއި އިންސާފުން އެއްކިބާވެގެން ތިބެ، ފާރިސްގެ މައްޗަށް ޢަބްދުﷲ ޔާމިންގެ ސަރުކާރުން އަނިޔާވެރިވަމުން އެގެންދަނީ ފާރިސް މި ސަރުކާރަށް ތާޢީދު ނުކުރެއްވުމުގެ ސަބަބުން ނޫން އިތުރު ސަބަބެއް އޮވެގެން ނޫން ކަމަށް އެމްޑީޕީން ވަނީ ބުނެފައެވެ.
އެޕާޓީން ބުނީ ޢަބްދުﷲ ޔާމީނުގެ ސަރުކާރުން ފާރިސް މައުމޫނާއި އެނޫން ވެސް ސިޔާސީ ބޭފުޅުންގެ މައްޗަށް ރާއްޖޭގެ ޤާނޫނު އަސާސީ އާއި ބައިނަލްއަޤުވާމީ ޤާނޫނުތަކާ ޚިލާފަށް ޖަލަށްލައި، ޙުކުމް އިއްވަމުންދާ މައްސަލާގައި މުޅި ދުނިޔެއިން ގެންދަނީ އެކަން ކުށްވެރިކޮށް، އެ ބޭފުޅުން ވަގުތުން މިނިވަންކުރުމަށް ގޮވާލަމުން ކަމަށެވެ. މިފަދަ ދަޢުވާތަކާއި ޙުކުމްތަކުގެ ސަބަބުން ރައްޔިތުންގެ ކުރިމަތީގަ އާއި ދުނިޔޭގެ ކުރިމަތީގައި މިރާއްޖޭގެ ޖިނާޢީ ޢަދުލުގެ ނިޒާމާއި ކޯޓުތަކުގެ އިތުބާރު އިތުރަށް ގެއްލިގެންދާނެ ކަމަށް ވެސް އެމްޑީޕީން ވަނީ ބުނެފައެވެ.
އެމްޑީޕީން ބުނީ ދިއްގަރު ދާއިރާގެ ރައްޔިތުންގެ މަޖިލީހުގެ މެމްބަރ ފާރިސް ޙައްޔަރުކޮށްގެން އޭނާއަށް އަނިޔާވެރިވަމުންދާ ދިއުން ވަގުތުން ހުއްޓާލައި، އޭނާ މިނިވަންކުރުމަށް ތަކުރާރުކޮށް ގޮވާލާ ކަމަށާއި ނާއިންސާފާއި އަނިޔާވެރިކަމުގެ ކުރިމަތީގައި ފާރިސް ދައްކަވަމުން ގެންދަވާ ހިތްވަރާއި ޢަޒުމަށް ސާބަސް ރައްދުކުރާ ކަމަށެވެ.
