ޝަހްސު އޮޅުވާލި ކަމަށް ބުނެ ފާރިސް 4 މަހާ 24 ދުވަހަށް ޖަލަށްލާން ހުކުމް ކޮށްފި
ފާރިސްގެ މައްޗަށް އިތުރު ދައުވާތަކެއްވެސް އުފުލާފައިވޭ
ރައްޔިތުންގެ މަޖިލީހުގެ ދިއްގަރު ދާއިރާގެ މެމްބަރު އަހުމަދު ފާރިސް މައުމޫން:- އޭނާ ނުވަ މަހަށް ޖަލަށް ލާން ކޯޓުން ވަނީ ހުކުމްކޮށްފައި
ރައްޔިތުންގެ މަޖިލީހުގެ ދިއްގަރު ދާއިރާގެ މެމްބަރު އަހުމަދު ފާރިސް މައުމޫން، ސަރުކާރު ހިންގާ ޕާޓީ ޕީޕީއެމްގެ ހުއްދަ ހޯދުމެއް ނެތި އެ ޕާޓީގެ ލޯގާ އާއި ދިދަ ބޭނުންކުރިކަން ސާބިތުވާ ކަމަށް ކަނޑައަޅައި އޭނާ 4 މަހާ 24 ދުވަހަށް ޖަލަށް ލާން ކްރިމިނަލް ކޯޓުން ހުކުމް ކޮށްފި އެވެ.
ބުދަ ދުވަހުގެ ރޭ 10:13 ގައި ކްރިމިނަލް ކޯޓުގެ ގާޒީ އިބްރާހިމް އަލީ އިއްވެވި ހުކުމުގައި ވަނީ ޕީޕީއެމް އިން ފާރިސް ވަކި ކޮށްފައިވަނިކޮށް އެ ޕާޓީގެ މުސްތަޝާރު ރައީސް އަބްދﷲ ޔާމިނާއި އެ ޕާޓީގެ ކައުންސިލް މެމްބަރުންގެ ހުއްދަ ނެތި ނޫސްވެރިންގެ ބައްދަލުވުމެއްގައި ފާރިސް ޕީޕީއެމްގެ ލޯގޯ އާއި ދިދަ ބޭނުން ކޮށްފައިވާކަން އެކަށީގެންވާ ޝައްކެތް ނެތް މިންވަރަށް ޝަރީއަތަށް ސާބިތުވާ ކަމަށެވެ.
މި މައްސަލަ ފާރިސްގެ މައްޗަށް ސާބިތު ކުރުމަށް ދައުލަތުން 3 ސިއްރު ހެކިވެރިޔަކާއި، ފާރިސް ޕާޓީން ވަކިކުރިކަން ސާބިތު ކުރުމަށް އިލެޝަންސް ކޮމިޝަނުގެ ސިޓީއެއްގެ އިތުރުން ފާރިސް ޕީޕީއެމްގެ ދިދަ އާއި ލޯގޯ ބޭނުން ކުރި ކަމަށް ބުނާ ނޫސްވެރިންގެ ބައްދަލުވުމުގެ ރެކޯޑިންގއެއް ޝަރީއަތަށް ހުށަހަޅާފައިވެއެވެ. އަދި ފާރިސް މި ދައުވާއިން ދިފާއުވުމަށް 47 މީހަކު ހެކީގެ ގޮތުގައި ހުށަހެޅިއިރު 27 ކިތާބީ ހެއްކެއް ހުށަހެޅިއެވެ. ނަމަވެސް ހެކިބަސް ނެގީ 6 މީހެއްގެ އެވެ.
ގާޒީ ވިދާޅުވީ 13 އޮކްޓޯބަރު 2016 ގައި ފާރިސް ޕީޕީއެމް އިން ވަކިކޮށްފައިވާކަން އިލެކްޝަންސް ކޮމިޝަނުގެ ސިޓީން އެނގޭއިރު އޭނާ ޕާޓީން ވަކި ކުރި މައްސަލަ ޕީޕީއެމްގެ އިސްތިއުނާފު ކޮމެޓީގައި އިސްތިއުނާފު ކޮށްފައިނުވާކަން އެނގެން އޮންނަ ކަމަށެވެ. އަދި އެހެންމެ ޕާޓީން ވަކި ކުރި މައްސަލަ ފާރިސް ސިވިލް ކޯޓަށް ހުށައެޅުމަށްފަހު އަނބުރާ ގެންގޮސްފައިވުމުން ޕާޓީން ވަކި ކޮށްފައިވަނީ ރަނގަޅަށް ކަމަށް އޭނާވެސް ގަބޫލުކުރާކަން އެއިން އެނގޭ ކަމަށް ގާޒީ ވިދާޅުވިއެވެ.
އަދި ދައުލަތުން ހުށަހެޅި ހެކިންގެ ތެރެއިން ހެކިބަސްދިން ދެ މީހުންގެ ހެކިބަހުން ފާރިސް ނޫސްވެރިންގެ ބައްދަލުވުގައި ވާހަކަ ދެއްކެވިއިރު ފަހަތުގައި ޕީޕީއެމްގެ ދިދަ ހުރި ކަމަށާއި އަދި އޭނާ އަކީ ޕީޕީއެމް މެމްބަރެއް ކަމަށް ބުނިކަން އެނގެން އޮންނަ ކަމަށްވެސް ޝަރީއަތައް ފާހަގަ ކުރެވުނު ކަންކަން ގޮތުގައި ގާޒީ ވިދާޅުވި އެވެ.
އަދި ފާރިސް ބައިވެރިވި އެ ނޫސްވެރިންގެ ބައްދަލުވުގައި އެމްޑީޕީގެ ޕާލަމެންޓްރީ ގުރޫޕްގެ ލީޑަރު އިބްރާހިމް މުހައްމަދު ސޯލިހް (އިބޫ) ޕީޕީއެމް ތަމްސީލް ކުރާނީ ފާރިސް ކަމަށް ވިދާޅުވިކަން އެނގެން އޮންނަ ކަމަށެވެ. އަދި ދިފާއުގައި ހެކިބަސްދިން މީހަކު އިބޫ ތަމްސީލް ކުރަނީ އެމްޑީޕީކަން އެނގުނީ އޭނާގެ ފަހަތުގައި އިން އެ ޕާޓީގެ ދިދައިން ކަމަށް ބުނެފައިވާއިރު ފާރިސްގެ ފަހަތުގައި ވެސް ޕީޕީއެމްގެ ދިދަ އިނުމުން ފާރިސްގެ އަމަލަކީ ޝަހްސު އޮޅުވާލުމަށް ކޮށްފައިވާ ކަމެއްކަން އެނގޭ ކަމަށްވެސް ގާޒީ ވިދާޅުވި އެވެ.
ފާރިސްގެ މައްޗަށް ޖަލު ހުކުމް އައިސްފައިމި ވަނީ އަސާސީ މިންގަނޑުން އެކުށަށް ކަނޑައަޅާފައިވާ އަދަބުގެ މިންވަރެވެ. އެހެން ނަމަވެސް އެ އަދަބު ކުޑަވާން ޖެހޭނެ ކަމަށް ފާރިސްގެ ދިފާއީ ވަކީލުން ވަނީ ވިދާޅުވެފަ އެވެ.
