މިޔަންމާގެ ހަތް އޮފިޝަލަކަށް ކެނެޑާއާއި އީޔޫއިން ފިޔަވަޅު އަޅައިފި
އުދުވާނާއި ގުޅިގެން 720،000 އަށްވުރެ ގިނަ މީހުން އެމީހުންގެ ވަޒަން ދޫކޮށް ދާންޖެހުނު
މިޔަންމާގެ ރެފިއުޖީން އަވަށް ދޫކޮށް ބަންގްލަދޭޝްއަށް ހިޖުރަ ކުރަނީ
ރޮހިންޖާގެ ރައްޔިތުންނާއި، ދެކޮޅަށް ހިންގި ގަތުލު އާއްމުގައި ބައިވެރިވާކަމަށްބުނެ މިޔަންމާގެ ހަތް އޮފިޝަލަކަށް ކެނެޑާއިން ދަތިކުރުމުގެ ފިޔަވަޅު އަޅައިފިއެވެ.
ވިލާތުގެ އިއްތިހާދާއި ކެނެޑާއިން އަޅާފައިވާ އިގްތިސާދީ ދަތިކުރުމުގެ ފިޔަވަޅުތައް އަންގާރަ ދުވަހު އިއުލާނުކުރެއްވީ ޚާރިޖީ ވަޒީރު ކްރިސްޓިއާ ފްރީލަންޑްއެވެ.
ފެޑެރަލް ސަރުކާރުން ބުނެފައިވަނީ ދަތިކުރުމުގެ ފިޔަވަޅުތައް އަމާޒުކުރި ހަތް މީހުންނަކީ ރަޚައިން ސްޓޭޓްގައި 2017 ވަނަ އަހަރު އަސްކަރިއްޔާއިން ހިންގި އަނިޔާވެރި އަމަލުތަކުގައި ބައިވެރިވި މީހުންކަމަށެވެ.
މިޔަންމާގެ ރޮހިންޖާ މުސްލިމުންނާއި ދެކޮޅަށް އެ ގައުމުގެ އަސްކަރިއްޔާއިން ހިންގި އުދުވާނާއި ގުޅިގެން 720،000 އަށްވުރެ ގިނަ މީހުން އެމީހުންގެ ވަޒަން ދޫކޮށް ދާން ޖެހިފައިވެއެވެ. އޭގެ ތެރެއިން ގިނަ މީހުން ދިރިއުޅެމުންދަނީ އަވަށްޓެރި ބަންގްލަދޭޝްގައި ދަތި ހާލަތެއްގައެވެ.
"ކެނެޑާ އަދި ބައިނަލްއަގްވާމީ މުޖުތަމައުއަކަށް މަޑުންނެއް ނޯވެވޭނެ. މިއީ ވަކި އަގީދާއެއްގެ ބަޔަކު ނައްތާލުން. މިއީ އިންސާނިއްޔަތާއި ޚިލާފު ޖަރީމާއެއް." ފްރީލަންޑް އިއްވި ބަޔާނުގައިވެއެވެ.
މި ދަތި ކުރުމުގެ ފިޔަވަޅުތަކުގެ ދަށުން އެމީހުންގެ އެސެޓް ފްރީޒް ކުރުމާއި އެމީހުންނާއިއެކު ވިޔަފާރިކުރުން ވަނީ މަނާކުރެވިފައެވެ.
މީގެ އިތުރުން ގައުމުން ބޭރުގައި އުޅޭ ކެނެޑާގެ ރައްޔިތުންވެސް ދަތިކުރުމުގެ ފިޔވަޅުއެޅިފައިވާ ފަރާތްތަކާއެކު ވިޔަފާރީގެ މުއާމަލާތް ހިންގުން ވަނީ މަނާކުރެވިފައެވެ. މީގެ އިތުރުން އެމީހުންނަށް މާލީ ޚިދުމަތްތައް ދިނުންވެސް ވަނީ މަނާކުރެވިފައެވެ.
