މިއަދު ހުށަހެޅި އިސްލާހުތަކަށް މާދަމާ ބަހުސް ކުރުމަށްފަހު ކޮމެޓީއަށް ފޮނުވުމަށް އެޖެންޑާ ކޮށްފި
މާދަމާ ބާއްވާ ޖަލްސާގައި އެބިލްތަކަށް ބަހުސްކޮށް، ދިރާސާ ކުރުމަށް ކޮމެޓީއަށް ފޮނުވާނެ
ރައްޔިތުންގެ މަޖިލީހުގެ ޖަލްސާއެއްގެ ތެރެއިން
ހޯމަ ދުވަހު ރައްޔިތުންގެ މަޖިލީހަށް ހުށަހެޅި ބިލްތަކުގެ އިބްތިދާއީ ބަހުސް ކުރުމާއި އެ ބިލްތައް ދިރާސާ ކުރުމަށް ކޮމެޓީތަކަށް ފޮނުވުމަށް އަންގާރަ ދުވަހުގެ ޖަލްސާއަށް އެޖެންޑާކޮށްފި އެވެ.
ރައްޔިތުންގެ މަޖިލީހުގެ މިއަހަރުގެ ދެވަނަ ދައުރުގެ ފުރަތަމަ ޖަލްސާ ހޯމަ ދުވަހު ބޭއްވި އިރު، ތިން ބިލެއްގެ ފުރަތަމަ ކިޔުން ވަނީ އިއްވާފަ އެވެ. އެއީ ރިޔާސީ އިންތިހާބުގެ ގާނޫނަށް ހުށަހަޅާފައިވާ އިސްލާހު ގެނައުމުގެ ދެ ބިލަކާއި އިންތިހާބުތަކާބެހޭ އާއްމު ގާނޫނަށް ހުށަހަޅާފައިވާ އިސްލާހު ގެނައުމުގެ ބިލެކެވެ.
އަންގާރަ ދުވަހުގެ ޖަލްސާގެ އެޖެންޑާގައިވާ ގޮތުން، މަޖިލީހުގެ ރައީސްގެ މޭޒުން ހުށަހަޅާ ކަންކަމުގެ އެޖެންޑާގެ ދަށުން އެތިން ބިލް ވެސް އެޖެންޑާ ކޮށްފައިވަނީ މަޖިލީހުގެ ގަވާއިދުގެ 75 ވަނަ މާއްދާގެ (ނ)ގެ ދަށުން ވޯޓަށް އަހައިގެން ކުރިއަށް ގެންދާ ގޮތަށެވެ. އެއީ ބިލެއްގެ ފުރަތަމަ ކިޔުން އިއްވުމަށްފަހު، ބިލަކާ ގުޅިގެން ހިންގަންޖެހޭކަމަށް މަޖިލީހުގެ ގަވާއިދުގައި ބަޔާންކޮށްފައިވާ އެކިއެކި މަރުޙަލާތައް، އެއް މަރުޙަލާއާ ވިދިގެން އަނެއް މަރުޙަލާ ކުރިއަށް ގެންދިއުމަށް، މަޖިލީހުގެ ރައީސް ހުށަހަޅާ ހުށަހެޅުމަކުން، އަދި އިތުރު ބަހުސްއަކާ ނުލައި މަޖިލީހުން ފާސްކުރާ ގޮތަށެވެ.
އެހެންކަމުން މަޖިލީހުގެ ގަވާއިދުގެ 77 ވަނަ މާއްދާގެ (ހ)ގައި ބުނާ، މަޖިލީހަށް ހުށަހެޅޭ ކޮންމެ ބިލެއްގެވެސް ފުރަތަމަ ކިޔުން އިއްވައި ބިލު ތައާރުފުކުރުމަށްފަހު، 3 ދުވަހުގެ ނޯޓިސްދިނުމަށްފަހު، އެ ބިލުގެ އިބްތިދާއީ ބަހުސެއް މަޖިލީހުގެ ރައީސް ބާއްވަންވާނެ ކަމަށްބުނި ނަމަވެސް، 3 ދުވަހުގެ ނޯޓިސް ދިނުމަކާ ނުލައި އެބިލުގެ އިބްތިދާއީ ބަހުސް ކުރުމާއި އެބިލް ދިރާސާ ކުރުމަށް ކޮމެޓީއަށް ފޮނުވިދާނެ އެވެ.
އެއް މަރުޙަލާއާ ވިދިގެން އަނެއް މަރުޙަލާ ކުރިއަށް ގެންދިއުމަށް، މަޖިލީހުގެ ރައީސް ހުށަހަޅާ ހުށަހެޅުމަކުން، އަދި އިތުރު ބަހުސްއަކާ ނުލައި ވޯޓަށް އެހިދާނެ ކަމަށް ބުނާތީ، މިފަހުން މަޖިލީހަށް ހުށަހެޅޭ މުހިއްމު ގިނަ ބިލުތަކުގައި މަޖިލީހުގެ ރައީސް އަމަލު ކުރައްވަމުން ގެންދަވަނީ ވެސް އެގޮތަށެވެ.
އެއް މަރުޙަލާއާ ވިދިގެން އަނެއް މަރުޙަލާ ކުރިއަށް ގެންދެވޭގޮތަށް މަޖިލީހުގެ ގަވާއިދު އިސްލާހު ކުރީވެސް ސަރުކާރު ހިންގާ ޕީޕީއެމް ކޯލިޝަނުގައި ސާފު މެޖޯރިޓީ އޮތް ދުވަސްވަރުގަ އެވެ. އެގޮތުން އެންމެ ފުރަތަމަ މަޖިލީހުން ފާސްކުރި ބިލްތަކުގެ ތެރޭގައި ސްޕެޝަލް އިކޮނޮމިކް ޒޯން (ސެޒް) ބިލް ހިމެނެ އެވެ. އެބިލް މަޖިލީހަށް ހުށަހަޅައި މަޖިލީހުން ފާސްކޮށްފައިވަނީ 24 ގަޑިއިރުގެ ތެރޭގަ އެވެ.
