ދެ ފަނޑިޔާރުންގެ މަޤާމެއް ނުގެއްލޭ، ރަޖިސްޓްރަރގެ ނިންމުން މުރާޖަޢާކުރުމަށް ސުޕްރީމް ކޯޓަށް ހުށަހަޅާނަން: ވަކީލުން
20 ޖޫން 2018 | ބުދަ 13:26ސުޕްރީމް ކޯޓަށް ހުށަހެޅި ނުކުތާތަކުގެ ތެރޭގައި ދިފާއުވުމަށް އެކަށީގެންވާ ފުރުސަތު ނުދިނުމާއި ވަކީލުންގެ އެހީތެރިކަން ނުލިބޭކަން ފާހަގަކޮށްފައިވޭ
އުއްތަމަ ފަނޑިޔާރު އަބްދުﷲ ސައީދާއި، ސުޕްރީމް ކޯޓުގެ ފަނޑިޔާރު އަލީީ ހަމީދު
އުއްތަމަ ފަނޑިޔާރު އަބްދުﷲ ސައީދާއި، ސުޕްރީމް ކޯޓުގެ ފަނޑިޔާރު އަލީީ ހަމީދު ޖަލަށްލާން ކުރި ހުކުމް ރަނގަޅު ކަމަށް ނިންމައި، ސުޕްރީމް ކޯޓުން އެ ބޭފުޅުން ހުށަހެޅި އިސްތިއުނާފް ބަލައިނުގަތުމަށް ނިންމި ނިންމުން މުރާޖާކުރުމަށް އަލުން ސުޕްރީމް ކޯޓަށް ހުށަހަޅުއްވާނެކަމަށް ވަކީލުން ވިދާޅުވެއްޖެ އެވެ.
ސުޕްރީމް ކޯޓުގެ ނިންމުމާއި ގުޅިގެން ދެ ފަނޑިޔާރުންގެ ވަކީލުން ނެރުއްވި ބަޔާނެއްގައި ބުނެފައިވަނީ މައްސަލަ އިސްތިއުނާފްކޮށް، ދެ ފަނޑިޔާރުންގެ ފަރާތުން ސުޕްރީމް ކޯޓަށް ހުށަހެޅި ނުކުތާތަކުގެ ތެރޭގައި ދިފާއުވުމަށް އެކަށީގެންވާ ފުރުސަތު ނުދިނުމާއި ވަކީލުންގެ އެހީތެރިކަން ނުލިބުމުގެ އިތުރުން ގާނޫނާ ޚިލާފަށް އަޑުއެހުންތައް ހިންގާފައިވާ މައްސަލަތައް ފާހަގަކޮށްފައިވާ ކަމަށެވެ. އެކަމަކު މައްސަލަ ބަލައި ނުގަތުމަށް ނިންމީ އެކަންކަމަށް ރިއާޔަތް ނުކޮށް ކަމަށް އެ ބަޔާނުގައިވެ އެވެ.
ވަކީލުންގެ ބަޔާނުގައި ބުނެފައިވާގޮތުން މައްސަލަ ބަލައިނުގަތުމަށް ނިންމާފައިވާކަން އަންގާފައިވަނީ ސުޕްރީމް ކޯޓުގެ ރަޖިސްޓަރަރގެ އެންގުމަކުން ކަމަށެވެ. އަދި މައްސަލަ ބަލައިނުގަތް ސަބަބުކަމަށް "މި މައްސަލައަކީ ދިވެހިރާއްޖޭގެ ހައިކޯޓުންވެސް ބަލައި، ގޮތެއް ނިންމާފައިވާ މައްސަލައެއް" ކަމަށް ފާހަގަކޮށްފައިވާއިރު، ކޮންމެ މައްސަލައެއްވެސް އިސްތިއުނާފަށް ހުށަހެޅޭނީ ހައިކޯޓުން މައްސަލަ ނިންމުމުންކަމަށް ވަކީލުންގެ ބަޔާނުގައި ބުނެފައިވެއެވެ. އެހެންކަމުން އެއީ ޤަނޫނީގޮތުން ހަމަޖެހޭ އަސާސެއް ނޫން ކަމަށާއި، އަދި އެ ނިންމުމަކީ ސުޕްރީމް ކޯޓުގެ ފަނޑިޔާރުންގެ އެނގުމާއި ފެނުމުގެ ތެރެއިން ނިންމާފައިވާ ނިންމުމެއްކަމާއިމެދު ސުވާލު އުފެދޭކަމަށް ވަކީލުން ބުނެފައިވެއެވެ.
ވަކީލުން ބުނެފައިވަނީ ކަން އެހެން އޮތުމާއިއެކު މައްސަލަ ނުބެލޭނެ ކަމަށް ދިވެހިރާއްޖޭގެ ސުޕްރީމް ކޯޓުގެ ރަޖިސްޓްރާގެ ނިންމެވުމުން އަންގާފައިވާ އެންގެވުން މުރާޖަޢާ ކުރުމަށް ދިވެހިރާއްޖޭގެ ކޯޓުތަކުގެ ގާނޫނާއި ސުޕްރީމް ކޯޓުގެ ގަވާއިދުގެ ދަށުން ދިވެހިރާއްޖޭގެ ސުޕްރީމް ކޯޓަށް ހުށަހެޅުމަށް އުއްތަމަ ފަނޑިޔާރު އަބްދުﷲ ސައީދާއި ފަނޑިޔާރު އަލީ ހަމީދު މުހައްމަދުގެ ފަރާތުން ވަނީ ނިންމަވާފައިކަމަށެވެ. އަދި ވަކީލުން ބުނެފައިވަނީ ފަނޑިޔާރުންގެ މަޤާމު ގެއްލޭނީ ސުޕްރީމް ކޯޓުން ނިއާހީ ހުކުމެއް އިއްވާ ހިސާބުންކަން އެނގެން އޮޮންނައިރު ރަޖިސްޓްރަރގެ ނިންމުމަކީ ސުޕްރީމް ކޯޓުގެ ފަނޑިޔާރުންގެ ނިންމުމަކަށް ނުވާތީވެ، އެ ފަނޑިޔާރުންގެ މަޤާމު ގެއްލިފައި ނުވާކަމަށެވެ.
ރަސްމީ ހަސިއްޔަތުން ކުރަން ޖެހޭ ކަމަކަށް ނުފޫޒު ފޯރުވުގެ ކުށް ސާބިތުވާ ކަމަށް ކަނޑައަޅައި އުއްތަމަ ފަނޑިޔާރާއި ފަނޑިޔާރު އަލީ ހަމީދު އެއް އަހަރާއި ދެ މަހަށް ޖަލަށްލާން ކުރި ހުކުމަށާއި ދައުލަތުގެ މަސައްކަތަށް ހުރަސް އެޅުމުގެ ކުށް ސާބިތުވާ ކަމަށް ކަނޑައަޅައި އުއްތަމަ ފަނޑިޔާރު ހަތަރު މަހަށް ޖަލަށްލާން ކޮށްފައިވާ ހުކުމަށް ހައި ކޯޓުން ވަނީ ތާއިދު ކޮށްފަ އެވެ. އަދި އެ ހުކުމް ސުޕްރީމް ކޯޓުގައި އިސްތިއުނާފު ކުރުމުގެ ހުއްދައަށް އެދުމުން ބުދަ ދުވަހު އެ ކޯޓުން ނިންމާފައިވަނީ ހައިކޯޓުން އެ މައްސަލައިގައި ނިންމާފައިވާ ގޮތް ބާތިލް ކޮށްދޭން ހުށަހަޅާފައިވާ ސަބަބުތަކަށް ބަލާއިރު އެ ކޯޓުން ކޮށްފައިވާ ހުކުމް ރަނގަޅު ނޫން ކަމަށް ބަލަން ޖެހޭ އެއްވެސް އަސާސެއް ނެތް ކަމަށެވެ. އަދި އެ މައްސަލައިގައި ހައި ކޯޓުން ކޮށްފައިވާ ހުކުމަކީ ޝަރުއީ އަދި ގާނޫނީ ހަމަތަކާ އެއްގޮތައް ކޮށްފައިވާ ހުކުމެއް ކަމަށް ސުޕްރީމް ކޯޓުން އެ ނިންމުމުގައި ކަނޑައަޅާފައިވެ އެވެ.
