އަނެއްކާ ވެސް އެއްވަނަ މަގާމަށް ފެޑެރާ ޖެހިލައިފި

ޖަރަމަނުގެ ސްޓުޓްގާޓްގައި މިހާރު ކުރިޔަށްދާ މާސިޑީސް ކަޕްގެ ފައިނަލުން ޖާގަ ހޯދައި ދުނިޔޭގެ އެއްވަނަ މަގާމަށް ސްވިޓްޒަލޭންޑުގެ ރޯޖާ ފެޑެރާ ޖެހިލައިފިއެވެ.

އޭނާ މި މުބާރާތުގެ ފައިނަލުން ޖާގަ ހޯދީ އޮސްޓްރޭލިއާގެ ނިކް ކިރްގިއޯސްގެ މައްޗަށް ދެ ސެޓު އެއް ސެޓުން ކުރި ހޯދައިގެންނެވެ. މި މެޗުގެ ފުރަތަމަ ސެޓު 7-6 އިން ކިރްގިއޯސް ގެންދިޔައިރު ފެޑެރާ ވަނީ ފަހުން ކުޅުނު ދެ ސެޓު 6-2 އަދި 7-6 އިން ކާމިޔާބުކޮށް ފައިނަލުން ޖާގަ ހޯދާފައެވެ.

ހޯމަ ދުވަހު ނެރޭ އޭޓީޕީގެ އައު ރޭންކިންގައި ރަފައޭލް ނަޑާލް ފަހަތަށް ޖައްސާލުމަށްފަހު އެއްވަނަ މަގާމު ފެޑެރާ ހޯދާނެއެވެ.

މި މުބާރާތުގެ ފައިނަލުގައި ފެޑެރާ ނުކުންނާޏީ މިލޯސް ރައޯނިޗްއާ ދެކޮޅަށެވެ. ދުނިޔޭގެ 35 ވަނައިގައި ރޭންކް ކުރެވިފައިވާ ރައޯނިޗް ފައިނަލަށް ދަތުރުކުރީ މިދިޔަ އަހަރު މި މުބާރާތް ކާމިޔާބުކުރި ކެނެޑާގެ ލޫކަސް ޕުޔީ ސީދާ ދެ ސެޓުން ބަލިކޮށްގެންނެވެ. މި މެޗުގެ ސެޓުތައް އޭނާ ގެންދިޔައީ 6-4 އަދި 7-6 އިންނެވެ.

ރައޯނިޗް ބަލިކޮށް މާސިޑީސް ކަޕް ކާމިޔާބުކުރުން ވެގެންދާނީ ފެޑެރާގެ ކެރިއަރުގައި އޭނާ ކާމިޔާބުކުރާ 98 ވަނަ މުބާރާތަށެވެ. މިފަހަރު ވެގެންދާނީ ދުނިޔޭގެ ރޭންކިންގެ އެއްވަނައަށް ފެޑެރާ މި ސީޒަނުގައި ޖެހިލާނެ ތިންވަނަ ފަހަރަށެވެ. ދުނިޔޭގެ ރޭންކިންގެ އެއްވަނައަށް ފެޑެރާ ފުރަތަމަ ފަހަރަށް ޖެހިލީ 2004 ވަނަ އަހަރުގެ ފެބްރުއަރީ މަހުގެ ތެރޭގައެވެ. އޭނާ ވަނީ މިހާތަނަށް ޖުމްލަ 309 ހަފްތާގައި އެއްވަނަ މަގާމު ދިފާއުކޮށްފައެވެ.