ސްޓޭޑިއަމްގައި ސުއްޓާ ބުއިން މަނާ ކަމެއް މެރަޑޯނާ އަކަށް ނޭނގޭ

ފުޓްބޯޅަ ލެޖެންޑް ޑިއެގޯ މެރެޑޯނާ އަށް ވޯލްޑްކަޕް ކުޅޭ ސްޓޭޑިއަމް ތަކުގައި ދުންފަތުގެ އިސްތިއުމާލު ކުރުން މަނާ ކަމެއް އޭނާ އަށް ނޭނގޭ ކަމަށް ބުނެފިއެވެ.

ގްރޫޕް - ޑީ ގައި ހޮނިހިރު ދުވަހު އާޖެންޓިނާ އައިސްލެންޑާ އެކު ކުޅުނު މެޗުގައި މެރެޑޯނާ ފެނުނީ މޮސްކޯގެ ސްޕާޓަކް ސްޓޭޑިއަމްގައި ސުއްޓާ ބޯން އިންދައެވެ.

މެރަޑޯނާ ސްޓޭޑިއަމްގެ ތެރޭގައި ބޮޑު ސިންގާ ސުއްޓާއެއް ރޯކޮށްގެން ހުރި އެތައް ފޮޓޯއެއް އާއްމު ވުމާ ގުޅިގެން މެރަޑޯނާ ބުނީ ސްޓޭޑިއަމްގައި އެއްވެސް މީހަކަށް ދުންފަތުގެ އިސްތިއުމާލު ނުކުރެވޭކަން އޭނާއަށް އެނިގިފައި ނެތް ކަމަށެވެ.

"މިއަދު މީ އާޖެންޓިނާ އަށް އުނދަގޫ ދުވަހެއް. ވޯލްޑްކަޕްގެ ފުރަތަމަ މެޗު ވީމާ ވަރަށް ޓެންޝަން ބޮޑު ދުވަހެއް. އެކި މީހުންނަށް ކަންކަން އިހުސާސު ކުރެވޭނީ އެކި ގޮތައް. އަހަރެންނަކަށް ނޭނގޭ ހަމަ ހަގީގަތުގައި ވެސް އެއްވެސް މީހަކަށް ސްޓޭޑިއަމްގައި ދުންފަތުގެ އިސްތިއުމާލް ނުކުރެވޭ ކަމެއް. އެންމެންގެ ކިބައިން އަދި އިންތިޒާމްތައް ކުރާ ފަރާތްތަކުގެ ކިބައިން ވަރަށް ބޮޑަށް މާފަށް އެދެން." މެރެޑޯނާގެ ފޭސްބުކް ޕޭޖްގައި ހާމަކޮށްފައިވާ ބަޔާނެއްގައި ބުނެފައި ވެއެވެ.

އުމުރުން 57 އަހަރުގެ މެރަޑޯނާއަކީ ދުނިޔޭގައި މިހާތަނަށް އުފެދުނު އެންމެ ހުނަރުވެރި އެއް ފުޓްބޯޅަ ކުޅުންތެރިޔާއެވެ. އޭނާގެ ކެޕްޓަން ކަމުގައި 1986 ވަނަ އަހަރުގެ ފީފާ ވާރލްޑް ކަޕްގައި އާޖެންޓިނާއަށް ކާމިޔާބު ހޯދައިދީފައިވެއެވެ.

މެރަޑޯނާ ސުއްޓާ ބުއި މެޗް ނިމުނީ 1-1 ގެ ނަތީޖާ އަކުން އައިސްލެންޑާއި އާޖެންޓިނާ އެއްވަރު ވެގެންނެވެ.

ރަޝިއާ ގައި ކުރިއަށްދާ ފީފާ ވާރލްޑް ކަޕް މުބާރާތް އެ ގައުމުގެ 11 ސިޓީއެއްގައި އަންނަ ޖުލައި 15 އާ ހަމައަށް ކުރިއަށް ދާނެއެވެ.