މަޖިލީހުގެ ޖަލްސާތައް އިދިކޮޅު މަޖިލިސް މެމްބަރުން ބޮއިކޮޓް ކުރައްވާފައި ވަނިކޮށް، އިދިކޮޅު މަޖިލިސް މެމްބަރުން މަޖިލީހަށް ވަޑައިގަންނަވާ ކަމަށް މަޖިލީހުގެ ހާޒިރީން ދައްކައިފިއެވެ.
މަޖިލީހުން އަންގާރަ ދުވަހު ވަނީ ނިމިދިޔަ ދައުރުގެ މެމްބަރުންގެ ހާޒިރީ ރިޕޯޓް އާންމުކޮށްފައެވެ.
ގޮނޑި ގެއްލުނު ކަމަށް ބުނާ 12 މެމްބަރުން ނަން ނުހިމަނައި ނެރުނު ހާޒިރީ ރިޕޯޓުގައި ބުނެފައިވާ ގޮތުން ސަބަބެއް ނާންގައި މަޖިލީހުގެ މިދިޔަ ދައުރުގެ ހުރިހާ ޖަލްސާއަކަށް ވަޑައިނުގަންނަވަނީ ތިން މެމްބަރެކެވެ. އެއީ ޝަރީއަތް ނިމެންދެން ގޭ ބަންދުކޮށްފައިވާ ގަލޮޅު ދެކުނު ދާއިރާގެ މެމްބަރު އަހުމަދު މަހުލޫފާއި ޝަރީއަތް ނިމެންދެން ފުލުހުން ބަންދުކޮށްފައިވާ އަހުމަދު ފާރިސް މައުމޫނާއި ޖަލު ހުކުމެއް އައިސްފައި ވަނިކޮށް ބޭސްފަރުވާއަށް ވަޑައިގަތުމަށް ފަހު، ޖަރުމަނުވިލާތުގައި ހުންނެވި މާމިގިލީ ދާއިރާގެ މެމްބަރު ގާސިމް އިބްރާހިމެވެ.

އެ ތިން މެމްބަރުން ފިޔަވައި އެހެން ބައެއް އިދިކޮޅު މެމްބަރުން ނިމިދިޔަ މިއަހަރުގެ ފުރަތަމަ ދައުރުގެ ޖަލްސާތަކުގެ އެކި ދުވަސްތަކުގަައި މަޖިލީހަށް ވަޑައިގެންނެވި ކަމަށް ހާޒިރީން ދައްކައެވެ.

އިދިކޮޅު ގިނަ މެމްބަރުން އެންމެ ގިނައިން މަޖިލީހަށް ސަލާމް ފޮނުވާފައި ވަނީ މިދިޔަ މާޗު މަހުގެ 13 ވަނަ ދުވަހުއެވެ. އެ ދުވަހަކީ އެންޓި ޑިފެކްޝަންގެ ބިލާއި ފަނޑިޔާރުންގެ މަގާމު ގެއްލޭ ޝަރުތުތައް ކަނޑައަޅައި ބިލް ފާސްކުރި ދުވަހެވެ. އެ ދުވަހުގެ ޖަލްސާއަށް 28 މެމްބަރަކު ވަނީ މަޖިލީހަށް ސަލާމް ފޮނުވާފައެވެ.

އެ ދުވަސް ފިޔަވައި އެހެން ދުވަސްތަކުގެ އެކި ޖަލްސާތަކަށް އިދިކޮޅު މެމްބަރުން މަޖިލީހަށް ވަޑައިގެންނެވި ކަމަށް މަޖިލީހުގެ ހާޒިރީން ދައްކައެވެ.
އިދިކޮޅު މެމްބަރުން މަޖިލީހަށް ވަޑައިގެންނެވި ނަމަވެސް އެބޭފުޅުން ޖަލްސާތަކުގައި ބައިވެރި ނުވަނީ މަޖިލީހުގެ ރައީސް އަބްދުﷲ މަސީހު މަޖިލިސް ހިންގަވަމުންދާ ގޮތާމެދު ހިތްހަމަނުޖެހިގެންނެވެ. ގާނޫނުއަސާސީ އާއި މަޖިލީހުގެ ގަވާއިދާ ހިލާފަށް މަޖިލިސް ހިންގަމުންދާ ކަމަށް އިދިކޮޅު މެމްބަރުން ބުނެފައި ވަނިކޮށް، ބައެއް މެމްބަރުން ވަނީ ހައްޔަރުކޮށް ދައުވާ އުފުލާފައެވެ. އެގޮތުން ހަތަރު މެމްބަރަކު ހައްޔަރު ކޮށްފައިވާއިރު، ޕީޕީއެމް ދޫކޮށް އިދިކޮޅު ފަރާތްތަކާ ގުޅުނު 12 މެމްބަރެއްގެ ގޮނޑި ގެއްލިފައިވާ ކަމަށް އިލެކްޝަންސް ކޮމިޝަން (އީސީ) ވަނީ ބުނެފައެވެ.

އެ ރިޕޯޓުން ދައްކާ ގޮތުން ސަރުކާރު ކޯލިޝަންގެ މެމްބަރުންގެ ތެރެއިން ހާޒިރީގެ ފުލަށް ފެއްޓިފައި ވަނީ މީދޫ ދާއިރާގެ މެމްބަރު އަދި މަޝަހޫރު ވިޔަފާރިވެރިޔާ އަހުމަދު ސިޔާމް މުހައްމަދު (ސަން ސިޔާމް)އެވެ. އޭނާއަކީ މަޖިލީހުގެ ކޮންމެ ދައުރެއްގެ ހާޒިރީގެ ފުލުގައި އޮންނަ މެމްބަރެކެވެ.
ނިމިދިޔަ ދައުރުގެ ތިން މަހުގެ ތެރޭގައި ބޭއްވި މަޖިލީހުގެ 11 ޖަލްސާއަށް ވަޑައިގެންނެވީ 24 މެމްބަރުންނެވެ.