އާސަންދަ ކުންފުންޏާއި ބެހޭ ގޮތުން ދޮގު ޚަބަރު ފަތުރާނަމަ ގާނޫނީ ގޮތުން އެޅެންހުރި ފިޔަވަޅު އަޅާނެ ކަމުގެ އިންޒާރު އެކުންފުނިން ދީފި އެވެ.
އާސަންދަ ކުންފުނިން އިންޒާރު ދީފައި މިވަނީ މިމަހު 10 ވަނަ ދުވަހު ހުޅުމާލޭގައި ހިނގި ނުރައްކާތެރި އެކްސިޑެންޓުގައި ނިޔާވި ޒުވާނާއަށް މެމޯ ނުހެދިގެން ފަރުވާ ނުދީ ލަސްކުރި ކަމަށް ބައެއް މީޑިއާތަކުގައި ރިޕޯޓުގައި ކޮށްފައިވާ ދަނޑިވަޅެއްގަ އެވެ.
އާސަންދައިން ކުރި އިއުލާނެއްގައި ބުނީ މިފަހަކަށް އައިސް އެކިއެކި މީޑިއާ ޕްލެޓްފޯމްތަކުގައި އެކުންފުންޏާ، އެކުންފުނިން ހިންގަމުންދާ ހުޅުމާލެ ހޮސްޕިޓަލް ބަދުނާމު ވާހެން ވާހަކަ ފަތުރާ ކަމަށާއި، ކުންފުނިން ދޭ މައުލޫމާތު ރައްޔިތުންނަށް އޮޅުން އަރާނެހެން ގެނެސްދެމުންދާކަން ފާހަގަކުރެވިފައިވާ ކަމަށެވެ.
އަދި މިފަދަ އަމަލުތައް ހަރުކަށި އިބާރާތުން ކުށްވެރިކުރާ ކަމަށާއި، އަދި މީގެ ފަހުން މިފަދަ ދޮގު މައުލޫމާތުތައް ފަތުރާ ފަރާތްތަކާމެދު ގާނޫނީ ގޮތުން އެޅެންހުރި ފިޔަވަޅުތައް އަޅާނެ ކަމަށް އާސަންދައިން ބުންޏެވެ.
ސިއްހީ ދާއިރާއަކީ ނާޒުކު، ރައްޔިތުންގެ އިއްސާސްތަކާ ނުހަނު ގުޅިފައިވާ ދާއިރާއެއްކަން ފާހަގަކުރައްވައި އާސަންދައިން ބުނީ ރައްޔިތުންގެ ހިތްތަކުގައި ކަންބޮޑުވުމާއި ނަފްރަތު އުފެދޭ ގޮތަށް ރިޕޯޓު ނުކުރުމަށް އެދޭ ކަމަށެވެ. އަދި މިފަދަ ކަންކަމުގައި ހިމެނޭ ފަރާތްތަކަށް އިތުރު ހިތްދަތިކަމެއް ލިބޭފަދަ ގޮތަކަށް އެކިއެކި ފްލެޓްފޯމް ތަކުގައި ހަގީގަތާއި ހިލާފް ވާހަކަތައް ނުފެތުރުމަށް އާސައިންދައިން ވަނީ އިލްތިމާސް ކޮށްފަ އެވެ.