ޒުވާނުންގެ މަރުކަޒުތަކުގެ ބަޖެޓްގެ ޚަރަދުތައް ރަށްރަށުގައި ހުންނަ ސުކޫލްތަކުން ބަލަހައްޓާ ގޮތަށް ހަމަޖައްސައިފި
އެގޮތަށް ބަދަލު ކުރީ ޖޫން އެކަކުން ފެށިގެން
ށ. މިލަންދޫ ސުކޫލް
މިނިސްޓްރީ އޮފް ޔޫތު އެންޑް ސްޕޯރޓްސް އިން އަތޮޅު ތެރޭގައި ހިންގަމުންދާ ޒުވާނުންގެ މަރުކަޒުތަކުގެ ބަޖެޓްގެ ޚަރަދުތައް އެ މަރުކަޒުތައް ހުންނަ ރަށެއްގެ ސުކޫލްތަކުން ބަލަހައްޓާ ގޮތަށް ހަމަޖައްސައިފިއެވެ.
ޔޫތު މިނިސްޓްރީން އަތޮޅު ތެރޭގެ ރަށްރަށުގައި ޤާއިމުކޮށްފައިވާ ޒުވާނުންގެ މަރުކަޒުތަކުގެ ބަޖެޓް ބެލެހެއްޓުމުގެ މަސައްކަތް މިނިސްޓްރީ އޮފް އެޑިއުކޭޝަންގެ ދަށަށް ސަރުކާރުން ބަދަލުކުރުމާ ގުޅިގެން، އެ މަސައްކަތް އެ ރަށެއްގައި ހުންނަ ސަރުކާރުގެ ސުކޫލްތަކުން ބެލެހެއްޓުމަށް ނިންމާފައިވާތީ، ޖޫން 1 އިން ފެށިގެން ސުކޫލްތަކުން އެ މަސައްކަތް ކުރިއަށް ގެންދިޔުމަށް ވަނީ ނިންމާފައެވެ.
އެގޮތުން ޔޫތު މިނިސްޓްރީން ސޫކުލަށް ބަޖެޓް ޖަމާކުރުމުން، އެ ފައިސާ ފަންޑު އެކައުންޓުގައި ބަލަހައްޓާ، ޒުވާނުންގެ މަރުކަޒުން ފޮނުވާ ހިދުމަތާއި ތަކެތީގެ ރިކުއެސްޓްތަކާ އެއްގޮތަށް ދައުލަތުގެ މާލިއްޔަތުގެ ގަވާއިދާ އެއްގޮތަށް ޚަރަދުކޮށް، އެފަދަ ހިދުމަތްތަކާއި ތަކެތި މަރުކަޒަށް ފޯރުކޮށްދިނުމާއި ޒުވާނުންގެ މަރުކަޒުގެ ބަޖެޓަށް ޖަމާކުރާ ފައިސާގެ ރެކޯޑްތައް ވަކިން ބެހެއްޓުމުގެ އިތުރުން މަހުން މަހަށް ހަރަދު ރިޕޯޓްތައް އެ ސުކޫލްތަކުން ތައްޔާރު ކުރަން ޖެހޭނެ ކަމަށް މިނިސްޓްރީ އޮފް އެޑިއުކޭޝަނުން ބުނެފައިވެއެވެ.
ޒުވާނުންގެ މަރުކަޒު ހުންނަ ރަށެއްގައި ސަރުކާރުގެ އެއް ސުކޫލަށް ވުރެ އިތުރަށް ސުކޫލެއް ހުރި ނަމަ މަރުކަޒުގެ ބަޖެޓް ހިންގުން ހަވާލުކުރާނީ އެ މިނިސްޓްރީން އަންގާ ސުކޫލަކާ ކަމަށް ވެސް އެޑިއެކޭޝަން މިނިސްޓްރީން ބުންޏެވެ.
