މަސްތުވާތަކެއްޗާއެކު ބޯޓު އުރުނުއިރު އުލިގަމު ރާޑަރު ހުރީ ހަލާކުވެފައި:އެމްއެންޑީއެފް
ރާޑަރު ހަލާކުވީ ހޮނުއަޅައިގެން
ފުލުހުންނާއި އެމްއެންޑީއެފްއިން ނޫސްވެރިންނަށް މައުލޫމާތު ދެއްވަނީ
ހއ. އިންނަފިނޮޅު ފަރަށް މިދިޔަ ބުރާސްފަތި ދުވަހު މަސްތުވާތަކެއްޗާއެކު އީރާނު ބޯޓު އުރުނުއިރު އެއަތޮޅު އުލިގަމުގައި ހުންނަ ރާޑަރު ހުރީ ހޮނު އެޅުމުގެ ސަބަބުން ހަލާކުވެފައިކަމަށް އެމްއެންޑީއެފުން ބުނެފިއެވެ.
ސިފައިންނާއި ފުލުހުން އާދީއްތަ ދުވަހު ބޭއްވި ނޫސްވެރިންގެ ބައްދަލުވުމުގައި ރާއްޖެ އެމްވީން ދެންނެވި ސުވާލަކަށް ޖަވާބު ދެއްވަމުން ޕްރިންސިޕަލް ޑައިރެކްޓާ ކޯސްޓްގާޑް ލެފްޓިނެންޓް ކާނަލް މުހައްމަދު ސަލީމް ވިދާޅުވީ ހޮނު އެޅުމުގެ ސަބަބުން އުލިގަމުގައި ހުރި ރާޑަރު "ޑައުން" ވެފައިވާ ކަމަށާއި އެރާޑަރު އަޕްގްރޭޑް ކުރުމުގެ މަސައްކަތް ކުރަމުންދާ ކަމަށެވެ. އަދި އެކަމަށް ބޭނުންވާ ސާމާނު ލިބިފައިވާ ކަމަށާއި އިންޑިއާ ސަރުކާރުން އެކަން ހަވާލުކޮށްފައިވާ ޓީމު ޖޫން މަހު ރާއްޖެ އަންނާނެ ކަމަށެވެ.
"އުލިގަމުގައި ހުރި ރާޑަރަށް މިވަގުތު މައްސަލައެއް ދިމާވެފައި ހުރީ. ހޮނު އެޅުމުން ރާޑަރު ޑައުންވެފައި ހުރީ. އެހެން ނަމަވެސް ދެން ހުރި ބައެއް އިކުއިކްމަންޓް އޮޕަރޭޓްކުރޭ" ލެފްޓިނެންޓް ކާނަލް މުހައްމަދު ސަލީމް ވިދާޅުވިއެވެ.
މީގެ އިތުރުން އިންޑިއާ ސަރުކާރުގެ ހިލޭ އެހީގެ ދަށުން 10 ރާޑަރ ޕްރޮޖެކްޓްގެ ސްޓޭޝަންތައް ގާއިމު ކުރުމުގެ މަސައްކަތް ކުރަމުންދާ ކަމަށާއި އުލިގަމުގެ ރާޑަރު ވެސް އަޕްގްރޭޑް ކުރެވުމުން އެސަރަހައްދުން ދަތުރުކުރާ އުޅަނދުފަހަރު މޮނިޓާކޮށް ބެލެހެއްޓުމުގައި މިހާރަށްވުރެ ހަރުދަނާ ގޮތެއްގައި މަސައްކަތް ކުރެވިގެންދާނެ ކަމަށެވެ.
ސަލީމް ވިދާޅުވީ ރާޑަރ ސިސްޓަމް ގާއިމު ކުރެވުނުކަމުގައި ވިޔަސް އޭގެ މާނައަކީ ފުރޭނިގެން އެއްޗެއް އެތެރެ ނުވާނެއެކޭ ނޫން ކަމަށެވެ. އަދި ގިނަ ރާޑަރުތަކެއް ހުންނަ ކުރިއަރާފައިވާ ގައުމުތަކުގައިވެސް ނުފެނި ކަންކަން ހިނގާ ކަމަށް ސަލީމް ވިދާޅުވިއެވެ.
