ޕްރައިމަރީގައި އިސްކޮށް އުޅުނު މީހުންނަށް ފިޔަވަޅު އަޅަން އީސީން ފުލުހަށް
ޕާޓީއާމެދު ފިޔަވަޅު އަޅަން ނިންމާނީ ދެން އޮންނަ ބައްދަލުވުމެއްގައި
އެމްޑީޕީ ޕްރައިމަރީގައި މީހަކު ވޯޓުލަނީ
ކުރީގެ ރައީސް މުހައްމަދު ނަޝީދުގެ ނަންފުޅު ހިމަނައިގެން، އިދިކޮޅު އެންމެ ބޮޑު ޕާޓީ، އެމްޑީޕީގެ ރިޔާސީ ޕްރައިމަރީ ބާއްވާފައިވާތީ، އެ ޕްރައިމަރީ ބޭއްވުމުގައި އިސްކޮށް އުޅުނު މީހުންނާމެދު ފިޔަވަޅު އަޅައިދޭން ފުލުސް އޮފީހުގައި އެދެން އިލެކްޝަންސް ކޮމިޝަން (އީސީ)އިން ނިންމައިފިއެވެ.
އިލެކްޝަންސް ކޮމިޝަންގެ މެމްބަރު އަހުމަދު އަކުރަމް ވަނީ އެކަން "ރާއްޖެއެމްވީ"އަށް ކަށަވަރުކޮށްދެއްވާފައެވެ.
އަކްރަމް ވިދާޅުވީ އެ ކޮމިޝަނުން އާދީއްތަ ދުވަހު ބޭއްވި ބައްދަލުވުމެއްގައި އެމްޑީޕީގެ ޕްރައިމަރީއާ ގުޅިގެން، އެ ޕާޓީއާމެދު އަޅާނެ ފިޔަވަޅާ ގުޅޭ ގޮތުން މަޝްވަރާކޮށްފައިވާ ކަމަށެވެ. އަޅާނެ ފިޔަވަޅާ ނިންމާނީ ދެން ބާއްވާ އެ ކޮމިޝަންގެ ޖަލްސާއެއްގައި ކަމަށް ކަމަށް އަކްރަމް ވިދާޅުވިއެވެ.
"މިއަދު ނިންމީ ގާނޫނާ ހިލާފަށް ހިންގި ސިޔާސީ ހަރަކާތްތަކާ ގުޅިގެން އެމްޑީޕީއަށް ފިޔަވަޅު އަޅަންޖެހޭނެ ކަމަށް. އަޅާނެ ފިޔަވަޅާ ދޭތެރޭގައި މަޝްވަރާކޮށްފައި ބައެއް ގާނޫނީ ކަންކަން ފުރިހަމަ ކުރުމަށްފަހު، ދެން އޮންނަ ބައްދަލުވުމެއްގައި ފިޔަވަޅު އަޅާ ފިޔަވަޅު ނިންމާނެ،" އަކްރަމް ވިދާޅުވިއެވެ.
އޭނާ ވިދާޅުވި ގޮތުގައި އެމްޑީޕީ ޕްރައިމަރީގައި އިސްކޮށް ހަރަކާތްތެރިވި އެ ޕާޓީގެ އެންމެހާ ފަރާތްތަކަށް ފިޔަވަޅު އަޅައި ދިނުމަށް ފުލުސް އޮފީހުގައި އެދެން ނިންމީ ސިޔާސީ ޕާޓީތަކުގެ ގާނޫނުގައި ބުނާ ގޮތަށް ޕާޓީތަކުން ކުރާ ކަންކަމުގައި ޒިންމާވާންޖެހޭނީ މަސްއޫލުވެރި ފަރާތްތަކުން ކަމަށްވާތީ އެވެ.
ދެ ވަނަ ކަމަކަށް ނިންމީ އެ ހަރަކާތް ހިންގުމުގައި އިސްކޮށް ހަރަކާތްތެރިވި ޕާޓީގެ އެންމެހާ ފަރާތްތަކަށް، ސިޔާސީ ޕާޓީތަކުގެ ގާނޫނުގައި ބުނާ މަސްއޫލުވެރި ފަރާތްތަަކާމެދު ފިޔަވަޅު އެޅުމަށް މޯލްޑިވްސް ޕޮލިސް ސާވިސްގައި ދަންނަވާ ގޮތަށްކަމަށް އަމްރަމް ވިދާޅުވިއެވެ.
މިދިޔަ ބުދަ ދުވަހު ބޭއްވި އެމްޑީޕީ ޕްރައިމަރީގައި 43،000 ވުރެ ގިނަ އެމްޑީޕީގެ އާންމު މެމްބަރުން ވޯޓާއެކު، އެ ޕާޓީގެ ރިޔާސީ ޓިކެޓް ކުރީގެ ރައީސް މުހައްމަދު ނަޝީދު ވަނީ ކާމިޔާބުކުރައްވާފައެވެ. އެ ޕްރައިމަރީ ހުއްޓުވުމަށް ކޯޓު އަމުރެއްގެ ދަށުން ފުލުހުން ނުކުމެ، ވޯޓު ފޮށިތައް ގެންދިޔަ ނަމަވެސް، ޕްރައިމަރީ ހުއްޓުވިފައެއް ނުވެއެވެ.
