މާތް ވެގެންވާ އިސްލާމް ދީނަށާއި މި ދިވެހި ގައުމަށް ޑރ. އަބްދުލް މަޖީދު އަބްދުލް ބާރީ ކޮށްދެއްވައިފައިވާ ޚިދުމަތްތަކަކީ އެއަށް އަގެއް އަދާ ކުރެވޭނެ ނުވަތަ ބަދަލެއް ދެވޭނެ ކަމެއް ނޫން ކަމަށް އަދާލަތު ޕާޓީގެ ނާއިބު ރައީސް އަދި މަޝްހޫރު ގާނޫނީ ވަކީލް އަލީ ޒާހިރު ވިދާޅުވެއްޖެއެވެ.
ޑރ. މަޖީދު ވަކިވެގެން ދިއުމުން އެމަނިކުފާނަށް ތައުބީނު ކުރުމުގެ ގޮތުން ހުކުރު ދުވަހުގެ ރޭ ބޭއްވި ޖަލްސާގައި ވާހަކަ ދައްކަވަމުން އަލީ ޒާހިރު ވިދާޅުވީ އެމަނިކުފާނަކީ ވަރަށް ވަރުގަދަ ޝަޚްސިއްޔަތެއް ކަމަށާއި އެމަނިކުފާނު އިސްލާމިކް އެފެއާޒްގެ މިނިސްޓަރަކަށް ހުންނެވިއިރު ޚާއްސަ ސެކެޓްރީއެއްގެ ގޮތުގައި އަދި އޮފީހުގެ އިސް މީހެއްގެ ގޮތުގައި މަސައްކަތް ކުރުމުގެ ފުރުސަތު ލިބުނު ކަމަށް ވެސް ޒާހިރު ވިދާޅުވިއެވެ. އެތަނުގައި މަސައްކަތް ކުރުމުގެ ކުރިން ހީކުރި ގޮތާ ޚިލާފަށް ޑރ. މަޖީދު ފާހަގަ ކުރެވުނީ ވަރަށް ތަފާތު، ހީވާގި އަދި ހިތްހެޔޮ ޝަޚްސިއްޔަތެއްގެ ގޮތުގައި ކަމަށެވެ. ފަހަރުގައި އެމަނިކުފާނު ނުދަންނަ ބޭފުޅުންނަށް ނުވަތަ އެ މަނިކުފާނާއެކުގައި އުޅެފަ ނެތް ފަރާތަކަށް އެ މަނިކުފާނަކީ ވަރަށް ސީރިއަސް ނުވަތަ އެހެން ކަހަލަ މިޒާޖެއްގެ ބޭފުޅެއް ކަމަށް ހީވެފައި އޮވެދާނެ ކަމަށާއި އެހެން ނަމަވެސް އެއީ ބިލާހެއް ކަމަށް ޒާހިރު ވިދާޅުވިއެވެ.
އެމަނިކުފާނު ބައިވެރިވަޑައި ގަންނަވާ ނުވަތަ ހުންނެވި މަޖްލީހެއްގައި އެއްވެސް މުންކަރާތެއް ހިނގާ ކަމުގައިވާ ނަމަ، އެކަމަކަށް ބަސް ވިދާޅުވާ ބޭފުޅެއް ކަން ވަނީ ފާހަގަ ކުރައްވާފައެވެ. ޒާހިރު ވިދާޅުވީ ހަމަ އެއާއެކު އެމަނިކުފާނަކީ ވަރަށް މަޖާ މިޒާޖެއްގެ ބޭފުޅެއް ކަމަށެވެ. ޚާއްސަ ގޮތެއްގަ ބައެއް ބައްދަލުވުންތަކުގަޔާއި ކާމޭޒުދޮށުގައި އެމަނިކުފާނު ހެއްވާ މަޖާ ޖޯކްތައް ވިދާޅުވެ ދެއްވައެވެ. އެމަނިކުފާނު މަތިން ހަނދާންވާ ކޮންމެ އިރެއްގައި ވެސް އެ "ޖޯކްތަކުގެ" މަތިން ހަދާން އާ ވާކަމަށް ވެސް އަލީ ޒާހިރު ވިދާޅުވިއެވެ.
ރާއްޖޭގައި އިސްލާމީ ހޭލުންތެރިކަން އިތުރުކުރުމަށް ޑރ. މަޖީދު ކުރެއްވި މަސައްކަތަށް ޒާހިރު ވަނީ އަލި އަޅުއްވާ ލައްވާފައެވެ. އަދި ވިދާޅުވީ މި މުޖްތަމައުގެ އިސްލާމީ އުސޫލުތަކާއި މުއާމަލާތްތައް ފުރިހަމަ ކަމާ އެކު ގެންދެވޭނެ ފަދަ މާހައުލެއް އުފެއްދުމަށްޓަކައި ޑރ. މަޖީދު ވަކާލާތު ކުރައްވާފައިވާ ކަމަށާއި އެކަމަށް ވަރަށް ބޮޑަށް މަސައްކަތް ކުރެއްވި ކަމަށެވެ.
އެގޮތުން ދިވެހިރާއްޖެއަށް އިސްލާމިކް ބޭންކިންގް ނިޒާމް ތައާރަފް ކުރުމުގައި ވެސް ވަރަށް މުހިއްމު ދައުރެއް ޑރ. މަޖީދު އަދާކުރެއްވި ކަމަށް ވެސް ވިދާޅުވިއެވެ. އެމަނިކުފާނުގެ ޚިދުމަތްތަކުން މަންފާ ކުރަމުން ދިޔަ ފަރާތްތަކުގެ ނަންތައް ކިޔާ ހުސް ނުކުރެވޭނެ ކަމަކީ ޔަގީން ކަމެއް ކަމަށް ވެސް ވަނީ ވިދާޅުވެފައެވެ. ޚާއްސަކޮށް މަތީ ތައުލީމާއި ދީނީ ތައުލީމު އުނގެނެމުން ދިޔަ ވަރަށް ގިނަ ދަރި ވަރުންނަށް އެމަނިކުފާނުގެ ޚިދުމަތް މެދުކެޑުމެއް ނެތި ލިބިފައިވާކަން ފާހަގަކުރެއްވިއެވެ. ޑރ. މަޖީދު ފަދައިން ބުރަކޮށް މަސައްކަތް ކުރެއްވި، އިޚްލާސްތެރި އަދި ތެދުވެރި ބޭފުޅެއް މަދުވާނެ ކަމަށް ޒާހިރް ވިދާޅުވިއެވެ.
އެމަނިކުފާނު އެހާ ކުއްލި ގޮތެއްގައި ވަކި ވެގެން ދިޔަ ދިއުމަކީ މި ގައުމު އަބަދުގެ އަބަދަށް ހިތާމަ ކުރާނެ ކަމެއް ކަން ވެސް ވަނީ ފާހަގަ ކުރައްވާފައެވެ. އަދި އެފަދަ ބޭފުޅެއް އުފެދުމަކީ ކުޑަ ވަގުތު ކޮޅެއް ތެރޭގައި ނުވަތަ ހަމަ ހުރެފައި ކުއްލިއަކަށް ވެގެންދާނެ ކަމެއް ނޫން ކަމަށާއި އެމަނިކުފާނު ފުރުއްވި މަގާމް ފުރުއްވާނެ ދެވަނަ ފަރާތެއް ނެތް ކަމަށް ޒާހިރު ވިދާޅުވިއެވެ.
