އެސްޓީއޯގެ ހިއްސާއަކަށް 55 ރުފިޔާ ބަހަނީ

ސްޓޭޓް ޓްރޭޑިން އޮގަނައިޒޭޝަން (އެސްޓީއޯ)ގެ ހިއްސާއަކަށް 55 ރުފިޔާ ބަހަން އެ ކުންފުނިން ނިންމައިފިއެވެ.

އެސްޓީއޯގެ އަހަރީ އާންމު ޖަލްސާ ބާއްވާފައިވަނީ ބުދަ ދުވަހުގެ ރެއެވެ.

އެކުންފުނީގެ 118 ހިއްސާދާރުން މި ޖަލްސާގައި ބައިވެރިވެފައިވާއިރު އޭގެ ތެރޭގައި ހިމެނެނީ 55 ހިއްސާދާރަކާއި ޕްރޮކްސީ މެދުވެރިކޮށް ބައިވެރިވި 63 ހިއްސާދާރުންނެވެ. 2017 ވަނަ އަހަރު އެ ކުންފުންޏަށް 7.5 ބިލިއަން ރުފިޔާ ލިބިފައިވާއިރު އޭގެ ތެރޭގައި ސާފު ފައިދާގެ ގޮތުގައި ލިބިފައިވަނީ 211 މިލިއަން ރުފިޔާއެވެ. އަދި ކުންފުނި ހިންގުމުގެ ފައިދާގެ ގޮތުގައި 287 މިލިޔަން ރުފިޔާ ވަނީ ލިބިފައެވެ.

މި ޖަލްސާގައި، އެސްޓީއޯގެ މެނޭޖިން ޑިރެކްޓަރުގެ މަގާމުގައި ހުންނަވާ ބޭފުޅަކަށް އެ ކުންފުނީގެ ޗީފް އެގްޒެކެޓިވް އޮފިސަރު (ސީއީއޯ)ގެ މަގާމުލިބޭ ގޮތަށް ކުންފުނީގެ ހިންގާ ޤަވާއިދަށް ވަނީ ބަދަލު ގެނެސްފައެވެ.

މިދިޔަ އަހަރު އެކުންފުނިން ބަހާފައި ވަނީ 2016 ވަނަ އަހަރުގެ ފައިދާއިން ހިއްސާއަކަށް 51 ރުފިޔާގެ މަގުންނެވެ. އެސްޓީއޯއަށް 2016 ވަނަ އަހަރު ފައިދާގެ ގޮތުގައި 288 މިލިއަން ރުފިޔާ ވަނީ ލިބިފައެވެ.