ރަންވީރު ފަދައިން ހޮޓް އެންޑް ސެކްސީވާން ބޭނުންތަ؟

އިންޑިއާގެ ސްޕޯޓްސް އެންޑް ޔޫތު އެފެއާޒް މިނިސްޓަރ ރާޖްޔާވަރްދަން ސިންގް ރާތޯރުގެ ފިޓްނަސް ޗެލެންޖް ވަނީ އިންޑިއާގެ މަޝްހޫރު ގިނަ ފިލްމީ ތަރިންނާއި ކުޅިވަރު ކުޅުންތެރިން އެކްސެޕްޓް ކޮށަފައެވެ.

މާބަނޑު ސާނިއާ މިރްޒާ އިން ފެށިގެން ގޮސް އަޖޭ ދޭވްގަންގެ ހަތް އަހަރުގެ ދަރިފުޅު ޔުގް ވެސް ވަނީ މި ޗެލެންޖްގައި ބައިވެރި ވެފައެވެ.

ބޮލީވުޑްގެ ތަރިން ކަމަށްވާ ރަންވީރް ސިންގް، ސިދާތު މަލޯތްރާ އަދި އަދިތްޔާ ރޯއީ ކަޕޫރު ވަނީ މި ޗެލެންޖް މަޖާ ގޮތަކަށް އެކްސެޕްޓް ކޮށްފައެވެ. އަދި ބުރާސްފަތި ދުވަހު ތިންތަރިން ވަނީ ޖިމްގައި ވާހަކަ ދައްކަމުންދާ ވީޑިއޯއެއް ޕޯސްޓް ކޮށްފައެވެ.

މި ވީޑިއޯގައި ސިދާތު އާއި އަދިތްޔާ "ލުކިން ހޮޓް" އޭ ކިޔައި ރަންވީރާ ވާހަކަ ދައްކާ މަންޒަރު ފެނެއެވެ. ޕަދްމާވަތީގެ ތަރި މަޖާމިޒާޖެއްގެ ރަންވީރު ވަނީ މި ވީޑީއޯގައި އޭނާ ފަދައިން "ހޮޓް އެންޑް ސެކްސީ" ވާން ބޭނުންތޯ ސުވާލު ކޮށްފައެވެ. އަދި ޖަވާބަކީ އާއެކޭ ނަމަ ޖިމްއަށް އަށް އައިސް ކަސްރަތުކޮށް އޭނާ ފަދައިން "ހޮޓް އެންޑް ސެކްސީ" ވުމަށް އޭނާ އެދެއެވެ.

ރާތޯރުގެ މި އިސްނެގުމަށް ތައުރީފުކޮށް މި ވީޑިއޯގެ ކެޕްޝަގައި ހިންދީ ބަހުން ރަންވީރު ލިޔެފައި ވަނީ އެންމެންނަށް ވެސް އޭނާ ފަދައިން "ހޮޓް އެން ސެކްސީ" ވެވިދާނެ ކަމަށެވެ.

މީގެ އިތުރުން ހޯމަދުވަހު އަޖޭ ވެސް ވަނީ އޭނާގެ ދަރިފުޅު ޔުގް ޖިމް ކަސްރަތު ކުރަމުންދާ ވީޑިއޯއެއް ޕޯސްޓް ކޮށްފައެވެ.

މިހިނގާ މެއި މަހުގެ 22 ވަނަ ދުވަހު ރާތޯރު އޭނާގެ ޓްވިޓަރ އެކައުންޓްގައި ވީޑިއޯއެއް ޕޯސްޓްކޮށް އިންޑިއާ މީހުންގެ ފިޓްނަސް މަންތްރާ ޝެއަރ ކުރުމަށް އެދުނު ފަހުން ގިނަ އަދަދެއްގެ ސެލެބްރިޓީން ދަނީ މި ޗެލެންޖް އެކްސެޕްޓްކޮށް އެމީހުންކުރާ ކަސްރަތުތައް ހިއްސާކުރަމުންނެވެ.

އާލިއާ ބަޓް، ރިތިކް ރޯޝަން، ސެއިޔާމީ ކޭރް، ގުލް ޕަނަގް ވަރުން ދަވަން، އަނުޝްކާ ޝަރުމާ ސައުތް އިންޑިއަން އެކްޓަރ ލަކްޝްމީ މަންޗޫ، ޝީލްޕާ ޝެޓީ ކުންދުރާގެ އިތުރުން ޓީވީ އެކްޓަރ ހިތެން ތެޖްވާނީ، ޑައިރެކްޓަރ މަދޫ ބަންޑަރުކަރު، ރިމޯ ޑި ސޫޒާ، ކަރަން ޖޯހަރު އަދި އަދުނާން ސާމީގެ އިތުރުން ވެސް ގިނަ ތަރިން ވަނީ މި ޗެލެންޖް އެކްސެޕްޓް ކޮށްފައެވެ.

މި ޗެލެންޖް އެކްސެޕްޓް ކޮށްފައިވާ ކުޅިވަރު ކުޅުންތެރިންގެ ތެރޭގައި ޕީވީ ސިންދޫ، ސައިނާ ނެހްވަލް، ޔޯގޭޝްވަރު ދަތު، ސުޝިލް ކުމާރު ޕަރުޕައްލީ ކަޝްޔަޕް އަދި ވިރާތް ކޯލީގެ އިތުރުން ވެސް ގިނަ ބަޔަކު ހިމެނެއެވެ.