ލައިސެންސް ޕްރޮގްރާމްގެ ސަބަބުން ނުރައްކާތެރި އެކްސިޑެންޓްތައް ހިނގުން ގިނަވެގެންދާނެ : ޝިފާ
ގިނަ ފަރާތްތަކަކީ ރަނގަޅަށް ދުއްވަން ދަސްވެފައިވާ ފަރާތްތަކެއް ނޫން
ލައިސެންސް ދޫކުރުން ކުރިއަށްދަނީ
ޒުވާނުނަށް ޚާއްސަ ކޮށްގެން "އެއްލަކިން މަށަށް ލައިސަންސް"ގެ ނަމުގައި ޓްރާންސްޕޯޓު އޮތޯރިޓީން ކުރިއަށް ގެންދާ ފްރޮގްރާމްގެ ސަބަބުން މާލޭ ސިޓީގައި ނުރައްކާތެރި އެކްސިޑެންޓްތައް ހިނގުން ގިނަވެގެން ދާނެ ކަމަށް މާލޭ ސިޓީގެ މޭޔަރު ޝިފާ މުހައްމަދު ވިދާޅުވެއްޖެ އެވެ.
ރާއްޖެއެމްވީއަށް މައުލޫމާތު ދެއްވަމުން ޝިފާ ވިދާޅުވީ މި ޕްރޮގްރާމުގައި ބައިވެރިވެ ލައިސަންސް ލިބޭ ގިނަ ފަރާތްތަކަކީ ރަނގަޅަށް ދުއްވަން ދަސްވެފައިވާ ފަރާތްތައް ނޫން ކަމަށެވެ.
މި ޕްރޮގްރާމުގެ ދަށުން ލައިސެންސް ލިބިފައިވާ ގިނަ މީހުންނަކީ އެއްފަހަރު ދުއްވައިގެން ފާސް ނުވުމުން އަނެއްކާ އެ ކިއުގެ ފަހަތަށް އަރާ ދުއްވައިގެން ލައިސަންސް ހޯދާފައިވާ މީހުން ކަމަށެވެ.
އަދި މިއީ ރައްޔިތުންގެ ފަސޭހައަކަށް ރައްޔިތުންގެ މަންފާއަށް ކުރާ ކަމެއް ނޫން ކަމަށާއި މިއީ ސީދާ ރައީސް ޔާމީންގެ ކެމްޕޭން ހަރަކާތެއް ކަމަށް ޝިފާ ވިދާޅުވިއެވެ.
މި ޕްރޮގްރާމްގައި ސައިކަލާއި ކާރުގެ އިތުރުން ޕިކަޕްގެ ލައިސަންސް ވެސް ނެގެއެވެ.
މިޕްރޮގްރާމުގެ ދަށުން ވަނީ މިދިޔަ ހަފްތާ ބަންދާއި ހޯމަ ދުވަހުގެ ރޭ ލައިސެންސް ދޫކޮށްފައެވެ.
އެއްލަކިން މަށަށް ލައިސަންސްގެ ނަމުގައި ބާއްވާ މި ޕްރޮގްރާމުގައި ލައިސަންސް ހޯދުމަށް ފުރަންޖެހޭ ފޯމުގައި އެމީހެއްގެ އިންސްޓަގްރާމް އެކައުންޓް ނަމާއި ވައިބަރ ނަންބަރާއި ފޭސްބުކް ނަން އަދި ވަޓްސްއެޕް ނަންބަރު ޖަހަންޖެހެ އެވެ. މިކަމާއި ގުޅިގެން އާންމުންގެ ވަރަށް ބޮޑު ފާޑުކިޔުމެއް ވަނީ އަމާޒުވެފައެވެ.
