މޯލްޑިވްސް ޕޮލިސް ސަރވިސްއާއި މޯލްޑިވްސް މީޑިއާ އިންސްޓިޓިއުޓް ގުޅިގެން، ޕޮލިސް މީޑިއާ ސެންޓަރުގައި މަސައްކަތްކުރާ މުވައްޒަފުން މީޑިއާގެ އެކި ވަސީލަތްތަކަށް އަހުލުވެރި ކުރުވުމަށް ތަމްރީނު ކޮށްފިއެވެ.

މެއި 28 ވަނަ ދުވަހުގެރޭ ދިވެހިރާއްޖޭގެ އަޑުގެ ސެނަކޯ މާލަމުގައި ބޭއްވި ރަސްމިއްޔާތުގައި ބައިވެރިންނަށް ސެޓްފިކެޓް ހަވާލުކޮށް ދެއްވީ ޕަބްލިކް ސާރވިސް މީޑިއާގެ މެނޭޖިން ޑިރެކްޓަރ އިބްރާހީމް ޚަލީލުއެވެ. މިރަސްމިއްޔާތުގައި، ޕޮލިސް މީޑިއާ ސެންޓަރުގެ އިސްވެރިންނާއި ޕަބްލިކް ސަރވިސް މީޑިއާގެ އިސްވެރިންނާއި މޯލްޑިވްސް މީޑިއާ އިންސްޓިޓިއުޓްގެ އިސްވެރިން ވަނީ ބައިވެރިވެފައެވެ.

ދިހަ ދުވަހުގެ މުއްދަތަށް، މޯލްޑިވްސް މީޑިއާ އިންސްޓިޓިއުޓް (އެމްއެމްއައި)އިން ކުރިއަށް ގެންދިޔަ މިތަމްރީނު ޕްރޮގްރާމްގައި، ޕޮލިސް މީޑިއާ ސެންޓަރުގައި މަސައްކަތް ކުރާ މުވައްޒަފުންގެ އިތުރުން ޓްރެފިކް މެނޭޖްމަންޓް އަދި ޕަބްލިކް އެފެއަރޒް ޑިޕާޓްމަންޓްގައި މަސައްކަތް ކުރާ މުވައްޒަފުން ހިމެނޭގޮތަށް ޖުމްލަ 12 މުވައްޒަފުން ބައިވެރިވެ ސެޓްފިކެޓް ޙާސިލްކޮށްފައިވާ ކަމަށް ފުލުހުން ބުނެއެވެ.

"މި ތަމްރީނު ޕްރޮގްރާމަކީ، ޕޮލިސް މީޑިއާ ސެންޓަރުގައި މަސައްކަތް ކުރާ މުވައްޒަފުންނަކީ މަސައްކަތްތަކަށް އަހުލުވެރި، ކަމާގުޅުންހުރި ތަމްރީނުތައް ލިބިފައިވާ އަދި މިޑިއާގެ އެކި ވަސީލަތްތައް ބޭނުންކުރުމުގެ ޤާބިލްކަން ލިބިފައިވާ ބަޔަކަށް ހެދުމުގެ ގޮތުން، ޕޮލިސް މީޑިއާ ސެންޓަރުގެ އެދުމުގެ މަތިން މޯލްޑިވްސް މީޑިއާ އިންސްޓިޓިއުޓުން ކުރިއަށް ގެންދިޔަ ތަމްރީނު ޕްރޮގްރާމެއް" ފުލުހުން ބުނެފައިވެއެވެ.

މިތަމްރީނު ޕްރޮގްރާމުގައި، ނޫސްވެރިކަމާއި ފޮޓޯގްރަފީ އަދި ވީޑިއޯގްރަފީއާއި ގުޅޭ އަސާސީ މަޢުލޫމާތުތަކާއި މީޑިއާތަކަށް މަޢުލޫމާތުދޭއިރު ވިސްނަންޖެހޭނެ ކަންތައްތަކާއި މުއާޞަލާތު ކުރުމުގެ ހުނަރުތައް ބައިވެރިންނަށް ދަސްކޮށްދީފައިވާ ކަމަށް ފުލުހުން ވަނީ ބުނެފައެވެ.