ޝަރުޢީ ޙުކުމް ތަންފީޒު ކުރަމުންދާ ފަރާތްތަކާއި، ކުށުގެ ތުހުމަތުގައި ހައްޔަރުގައި ތިބޭ މީހުންގެ އިންޓަރވިއުތަކާއި ބަޔާންތައް ބްރޯޑްކާސްޓް ނުކުރުމަށް މޯލްޑިވްސް ބްރޯޑްކާސްޓިންގ ކޮމިޝަނުން ބްރޯޑްކާސްޓަރުންނަށް އަންގައި ނެރުނު ސަކިއުލަރ ބާތިލް ކުރަން ކޯޓަށް ހުށަހަޅާނެ ކަމަށް ރާއްޖެ ޓީވީން ބުނެފިއެވެ.
ބްރޯޑްކޮމްއިން ނެރުނު ސަރކިއުލާއާ ގުޅިގެން ރާއްޖެ ޓީވީން ނެރުނު ބަޔާނެއްގައި ބުނެފައިވަނީ އެ ސާކިއުލާއަކީ ގާނޫނީ އެއްވެސް ބިންގަލެއް ނެތި، ބްރޯޑްކާސްޓިން ކޮމިޝަނަށް ލިބިފައިވާ ގާނޫނީ ބާރު ނާޖާއިޒު ގޮތުގައި ހިފައި، ބްރޯޑްކާސްޓަރުންނަށް ބިރު ދައްކާ، މީޑިއާގެ މިނިވަން ކަމަށާއި މައުލޫމާތު ހޯދާ ލިބިގަތުމުގެ ހައްގައް އަރައިގަތުމަށް ކުރި ކަމެއް ކަމުގައި ދެކޭކަމަށެވެ. އަދި އެ ސަރކިއުލަރ އަކީ ސިޔާސީ ބޭނުމަކަށް ވަކި ފަރާތަކަށް މަންފާ ހޯދައިދިނުމުގެ މަގްސަދުގައި ނެރެފައިވާ ސަރކިއުލަރއެއް ކަމަށްވެސް ދެކޭ ކަމަށް ރާއްޖެ ޓީވީން ބުނެ އެވެ.
އެ ސާކިއުލާގައި ހަވާލާދީފައިވަނީ ދިވެހިރާއްޖޭގެ ޖަލުތަކާއި ޕެރޯލްގެ ޤާނޫނުގެ 62 ވަނަ މާއްދާ އަށާއި އެ ގާނޫނުގެ ދަށުން ހަދާފައިވާ ދެ ގަވާއިދަކަށެވެ. އެއީ ޤައިދީންނާއި ކުށުގެ ތުހުމަތުގައި ހައްޔަރުގައި ތިބޭ މީހުންނާއި، ކޯޓު އަމުރެއްގެ ދަށުން ބަންދުގައި ބައިތިއްބަންޖެހޭ މީހުންނަށް ލިބިދޭންޖެހޭ އަސާސީ ޚިދުމަތްތަކާއި އިނާޔަތްތަކާ ބެހޭ ގަވާއިދާއި ޤައިދީންނާއި ކުށުގެ ތުހުމަތުގައި ހައްޔަރުގައި ތިބޭ މީހުންނާއި، ކޯޓު އަމުރެއްގެ ދަށުން ބަންދުގައި ބައިތިއްބަންޖެހޭ މީހުން ބައްދަލުކުރުމާއި ފޯނުކުރުމާއި، ސިޓީފަދަ ތަކެތި ފޮނުވުމާއި ލިބިގަތުމުގެ ގަވާއިދަށެވެ.
ސަކިއުލަރ ގައި ވަނީ "ސިޔާސީ ޕާޓީއާއި، ޖަމްޢިއްޔާތަކަށް އާންމު މެންބަރެއްގެ ހައިސިއްޔަތުން ނިސްބަތްވުން ފިޔަވައި، އެއިން ތަނެއްގެ މަސްއޫލު ފަރާތެއްގެ ގޮތުގައި ހުރުމާއި އެތަންތަނުން ހިންގާ އެހެން ހަރަކާތްތަކުގައި ބައިވެރިވުމުގެ ޙައްޤު، ޙުކުމެއް ތަންފީޒުކުރުމަށްޓަކައި ޖަލުގައި ބަންދުކުރެވިފައި ހުންނަ މުއްދަތުގައި ލިބިގެނެއްނުވެއެވެ".
ރާއްޖެ ޓީވީން ބުނީ ބްރޯޑްކާސްޓިން ކޮމިޝަނުން ވަރަށް ކުއްލި ގޮތަކަށް ނެރުނު ސާކިއުލާގައި ގާނޫނުގެ 62 ވަނަ މާއްދާ ހަވާލާދީފައި އޮތަސް، ސަކިއުލަރ އެ މާއްދާގެ ތަފްސީލުގެ ގޮތުގައި ލިޔެފައިވަނީ ގާނޫނުގެ 63 ވަނަ މާއްދާގައި ބުނެފައިވާ ވާހަކަ އެވެ. ގާނޫނުގެ 63 ވަނަ މާއްދާގައި ވަނީ، ސިޔާސީ ޕާޓީއާއި ޖަމްއިއްޔާތަކަށް އާންމު މެންބަރެއްގެ ހައިސިއްޔަތުން ނިސްބަތްވުން ފިޔަވައި، އެއިން ތަނެއްގެ މަސްއޫލު ފަރާތެއްގެ ގޮތުގައި ހުރުމާއި އެ ތަންތަނުން ހިންގާ އެހެން ހަރަކާތްތަކުގައި ބައިވެރިވުމުގެ ހައްގު، ހުކުމެއް ތަންފީޒުކުރުމަށްޓަކައި ޖަލުގައި ބަންދުކުރެވިފައި ހުންނަ މުއްދަތުގައި ލިބިގެނެއްނުވާކަމަށެވެ. ބަޔާނުގައި ހަވާލާދީފައިވާ 62 ވަނަ މާއްދާގައި ބުނެފައިވަނީ، ގާނޫނުއަސާސީގެ 23 ވަނަ މާއްދާގެ (ބ) ގައި، ދައުލަތުގެ ތަނަވަސްކަމާއި ކުޅަދާނަކަން ހުރި މިންވަރަކަށް، ދިވެހިރާއްޖޭގެ ތަބީއީ މުއްސަނދިކަމާއި، ދަތުރުފަތުރު ކުރުމުގެ ވަސީލަތްތަކާއި، ދައުލަތުގެ ހަބަރު ފަތުރާ ވަސީލަތްތަކާއި، ހުރިހާ ބާވަތެއްގެ މުއާސަލާތީ ހިދުމަތްތައް ބޭނުންކުރުމުގެ ފުރުސަތު ހޯދޭނެ މަގު ފަހިކޮށްދިނުމަށް ދައުލަތުން މަސައްކަތް ކުރަންވާނެ ކަމަށް ބަޔާންކޮށްފައިވީ ނަމަވެސް، މި ގާނޫނާއި މި ގާނޫނުގެ ދަށުން ހަދާ ގަވާއިދުގައި ބަޔާންކޮށްފައިވާ މިންވަރަށް މެނުވީ، ގައިދީންނާއި ބަންދު މީހުންނަށް އެ ހައްގުތައް ލިބިގެނެއް ނުވާކަމަށެވެ.
ރާއްޖެ ޓީވީން ބުނީ ބްރޯޑްކާސްޓިންގ ކޮމިޝަނުގެ ސާކިއުލާގައި ދެ މާއްދާގެ ތަރުތީބު ނަންބަރު އޮޅުވާލާފައިވާއިރު، އަމަލުކުރަންވީ ކޮން މާއްދާއަކަށް ނޭނގޭ މިންވަރަށް ބްރޯޑްކާސްޓިން ކޮމިޝަންގެ ޒިންމާ ދޯދިޔާވެގެން ގޮސްފައިވާކަން ފާހަގަ ވުމަކީ ލަދުވެތި ކަމެއްކަމަށެވެ. ގާނޫނާއި ގަވާއިދުން ވެސް ފެންނަ އޮތް ގޮތުގައި، ގައިދީއެއްގެ އިންޓަވިއު އެއް ނުވަތަ ބަޔާނެއް ގެނެސްދީގެން ބްރޯޑްކާސްޓަރަކު ޒިންމާ އުފުލާކަށް ނުޖެހޭނެ ކަމަށާއި އެފަދަ ކަމެއް ބްރޯޑްކާސްޓިން ކޮމިޝަނުން ސަމާލުކަމަށް ވެސް ގެނެސްފައެއް ނެތްކަމަށް ރާއްޖެ ޓީވީން ވަނީ ބުނެފައެވެ. އަދި ބްރޯޑްކާސްޓް ކުރުމުގެ ގާނޫނާއި އަބުރާ ބެހުމުގެ ގާނޫނުގައި ވެސް އެފަދަ ކޮންޓެންޓެއް ބްރޯޑްކާސްޓަރަކަށް ބްރޯޑްކާސްޓް ކުރުން މަނާ ކޮށްފައެއް ވެސް ނެތް ކަމަށާއި މިކަންކަން މިހާ ސަރީހަކޮށް އެނގެން އޮއްވައި، ކޮމިޝަންގެ ދެ މެމްބަރަކު އިސްވެ ތިއްބަވައިގެން، އަދި ބައެއް މެމްބަރުން މާލޭގައި ވެސް ނެތި މިފަދަ ނުރައްކާތެރި އިންޒާރުގެ ސާކިއުލާއެއް ނެރުމަކީ، މިހާރު ވެސް އެ ކޮމިޝަނުން ހަނިކޮށްފައިވާ ނޫސްވެރިކަމުގެ މިނިވަންކަން އިތުރަށް ހަނިވެގެން ދިޔަ ކަމެއްކަމަށް ރާއްޖެޓީވީގެ ބަޔާނުގައިވަނީ ބުނެފައެވެ.
ސާކިއުލާގައި ބަޔާންކޮށްފައިވާ ކަންކަން ސާފުކުރުމަށާއި، އެ ސާކިއުލާއާ ހަވާލާ ދޭއިރު، ދެއްކޭނެ ކޮންޓެންޓާއި ނުދެއްކޭނެ ކޮންޓެންޓަކީ ކޮބައިކަން ގާނޫނެއްގެ މާއްދާއަކާ ހަވާލާދީ ބްރޯޑްކާސްޓިން ކޮމިޝަނަކަށް ނުދެއްކުނު ކަމަށާއި އޭގެ ބަދަލުގައި ރާއްޖެ ޓީވީން މިކަން ސާފު ކުރަން އުޅުމުން ލިބުނީ އިތުރު އިންޒާރުކަމަށް އެސްޓޭޝަނުން ވަނީ ބުނެފައެވެ. އަދި ފިޔަވަޅު އެޅުމުގެ ބާރު ލިބިފައިވާ ކަމަށް ބްރޯޑްކޮމްއިން ބުނެފައިވާކަމަށްވެސް ރާއްޖެޓީވީން ވަނީ ބުނެފައެވެ.
ބްރޯޑްކާސްޓިންގ ކޮމިޝަނުން މި ނެރުނު ސާކިއުރލައަކީ ނޫސްވެރިކަމުގެ މިނިވަން ކަމަށާއި ޚިޔާލުފާޅު ކުރުމުގެ މިނިވަން ކަމަށާއި، ބްރޯޑްކާސްޓަރުންނަށް ބިރުވެރި ކަމެއް ނެތި މިނިވަން ކަމާއެކު މަސައްކަތް ކުރުމަށް ތަނަވަސްވާން ޖެހޭ މާހައުލަށް ހުރަސް އެޅުމުގެ ގޮތުން އަދި ގާނޫނީ އެއްވެސް ބުރަދަނެއް ނެތި ވަކި ފަރާތަކުން އެންގީތީ އެންގި ކަމެއް ކޮށްލުމުގެ ބޭނުމުގައި ނެރުނު ސާކިއުލާ އެއް ކަމަށް ގަބޫލު ކުރެވޭތީ، ރާއްޖޭގައި ނޫސްވެރިކަމުގެ މިނިވަންކަން ރައްކާތެރިކޮށް ދެމެހެއްޓުމުގެ މަގްސަދުގައި އެ ސަރކިއުލަރ ބާތިލް ކުރުމަށް ކޯޓަށް ހުށަހެޅުމަށް ނިންމާފައިވާކަމަށް ރާއްޖެ ޓީވީގެ ބަޔާނުގައިވެ އެވެ. އަދި އެ ސްޓޭޝަނުން އުއްމީދު ކުރަނީ ހައްގު ހޯދުމަށް ތެދު ނިޔަތުގައި ކުރަންޖެހިފައިވާ މިންނެތް މަސައްކަތުގެ ތެރެއިން މިކަންވެސް ކާމިޔާބުވުމުގެ ތައުފީގް މިންވަރުވުންކަމަށްވެސް ރާއްޖެ ޓީވީގެ ބަޔާނުގައި ބުނެފައިވެއެވެ.
