ހޮޅުދޫގައި ނުރައްކާތެރި އެކްސިޑެންޓެއް ހިނގައި ދެ ޒުވާނަކު ނިޔާވެއްޖެ
27 މެއި 2018 | އާދީއްތަ 02:19އެކްސިޑެންޓްގައި ނިޔާވި 26 އަހަރުގެ ދެ ޒުވާނުން
ނ. ހޮޅުދޫ އެކްސިޑެންޓްވެ ނިޔާވި ދެ ޒުވާނުން ދުއްވި އެއާ ބްލޭޑް ސައިކަލް
ނ. ހޮޅުދޫގައި ނުރައްކާތެރި އެކްސިޑެންޓެއް ހިނގައި ދެ ޒުވާނަކު ނިޔާވެއްޖެ އެވެ.
މިއެކްސިޑެންޓްގެ މައުލޫމާތު ފުލުހުންނަށް ލިބިފައިވަނީ މެންދަމު 1:30 ހާއިރު ކަމަށާއި، މި އެކްސިޑެންޓުގައި ނިޔާވި ދެމީހުންނާއި ސައިކަލު ނަގާފައިވަނީ އެރަށުގެ ބަނދަރު ތެރެއިން ކަމަށާއި، އެ ދެމީހުން މޫދުން ނެގި އިރުވެސް ނިޔާވެފައިވާ ކަމަށެވެ. އެއީ 26 އަހަރުގެ ދެ ޒުވާނުން ކަމަށް ފުލުހުން ބުންޏެވެ.
މިއެކްސިޑެންޓު ހިނގަން މެދުވެރިވި ސީދާ ސަބަބެއް އަދި ސާފު ނުވާކަމަށާއި، މައްސަލަ އިތުރަށް ތަހުގީގު ކުރަމުންދާ ކަމަށް ވެސް ފުލުހުން ބުންޏެވެ.
ދެ ޒުވާނުން ދުއްވި ސައިކަލް މޫދުން ނެގިއިރު ވަރަށް ބޮޑަށް ހަލާކުވެފައި. ފޮޓޯ: ވަގުތު
ހޮޅުދޫއިން ވާހަކަ ދެއްކި މީހަކު ބުނި ގޮތުގައި ސައިކަލްގައި ދުއްވަން ނުކުމެ އުޅެނިކޮށް ހިނގި އެކްސިޑެންޓުގައި ނިޔާވީ އެ ރަށު ހުސްނާ އަހުމަދު އާއި އަހުމަދު އަދީލެވެ. މި ދެ ރަހްމަތްތެރިން ނިޔާވީ ބާރު ސްޕީޑްގައި ދުއްވި ސައިކަލް ކޮންޓްރޯލް ނުކުރެވިގެން ގޮސް، ފަޅުތެރެއަށް ވެއްޓިގެން ނެވެ. އެ ދެ މީހުން ތިބި ސައިކަލް ފަޅުތެރެއަށް ވެއްޓިފައި އޮއްވާ ފެނުނީ އާންމުންގެ ބަޔަކަށް ކަމަށާއި ނެގިއިރު، ވެސް ދެ މީހުން ނިޔާވެފައިވާ ކަމަށް އޭނާ ބުންޏެވެ.
