ގދ. ހޯޑެއްދޫގައި ރޭ ދަންވަރުން ފެށިގެން ކަރަންޓް ކެނޑިފައިވާ ކަމަށް އެރަށު ކައުންސިލުން ބުނެފިއެވެ.
އެރަށު ކައުންސިލްގެ ނައިބު ރައީސް މުހައްމަދު އަޝްރާފް ވިދާޅުވީ ރޭ ދަންވަރު އެރަށުން ކަރަންޓް ދިޔައީ ކަރަންޓް ދެމުންދިޔަ ދެ ޖަނަރޭޓަރުގެ ތެރެއިން އެއް ޖަނަރޭޓަރުގެ ބޮޑީ ކުއްލިއަކަށް ފަޅައިގެން ދިއުމުގެ ސަބަބުން ކަމަށެވެ.
ކުރިންވެސް ދޭތެރެ ދޭތެރެއިން އެރަށުން ކަރަންޓް ކެނޑޭ ކަމަށާއި އެހެން ނަމަވެސް މިހާރު އެއްވެސް ގޮތަކަށް ކަރަންޓް ނެތުމުގެ އުނދަގޫ އެރަށު ރައްޔިތުންނަށް ދިމާވެފައިވާ ކަމަށް އަޝްރާފް ވިދާޅުވިއެވެ. އަދި ކަރަންޓް ކެނޑެމުންދާތީ ރައްޔިތުންގެ ޝަކުވާ ބޮޑުވެފައިވާ ކަމަށާއި ހާއްސަކޮށް ރޯދަ މަހާ ދިމާކޮށް ކަރަންޓްގެ މައްސަލަ ދިމާވުމުން ރައްޔިތުންނަށް ބޮޑެތި ދަތިތަކާ ކުރިމަތިވެފައިވާ ކަމަށް އޭނާ ވިދާޅުވިއެވެ.
އަޝްރަފް ވިދާޅުވީ އެރަށާއި ޖެހިގެން އޮންނަ މަޑަވެލީގެ އިންޖީނެއް ގެނެސްގެން މިހާރު ކަރަންޓް ދިނުމުގެ މަސައްކަތް ކުރަމުން އަންނަ ކަމަށެވެ.
"ކުރިންވެސް ކަރަންޓް ކެނޑޭ. އޭރު ކަރަންޓް ގޮސްގެން ނުލިބި ތިންގަޑިއިރާއި ހަތަރު ގަޑިއިރު ވެދޭ. ރޭ ދަންވަރުން ފެށިގެން މިހާރު އެއްގޮތަކަށްވެސް ކަރަންޓެއް ނެތް މިހާރު" އަޝްރަފް ވިދާޅުވިއެވެ.
