ބ. ކިހާދޫ ރައްޔިތުން ނަމާދު ވޯރކްޝޮޕެއް ކުރިއަށް ގެންދަން ސްކޫލު ހޯލް ދިނުމަށް އެޑިޔުކޭޝަން މިނިސްޓްރީން ދެކޮޅު ހަދައިފި އެވެ.
ރާއްޖޭގެ މަޝްހޫރު ދީނީ އިލްމުވެރިޔާ ޝެއިޚް ހަސަން މުހައްމަދު ފިކްރީ ވިދާޅުވީ ކިހާދޫގައި ނަމާދު ވޯރކްޝޮޕެއް ބޭއްވުމަށް ނިންމީ އެރަށުގެ ރައްޔިތުންނާއި، ކައުންސިލުންނާއި، ބެލެނިވެރިން އެދިގެން ކަމަށެވެ. ނަމަވެސް މިވޯރކްޝޮޕް ކުރިއަށް ގެންދިއުމަށް އެރަށުގެ ސްކޫލު ހޯލް ދިނުމަށް އެދުމުން ވެސް އެތަން ލިބޭ ގޮތް ނުވުމަކީ ހިތާމަހުރި ކަމެއް ކަމަށެވެ.
ސްކޫލު ހޯލް ނުދިނުމުން ނަމާދު ވޯރކްޝޮޕް ކުރިއަށް ގެންދަން ޖެހުނީ މިސްކިތުގައި ޕްރޮޖެކްޓާރ ބަހައްޓައިގެންނެވެ.
Rashu council aai Rayyithun naai, Beleniverin edhigen bavvaa namaadhu workshop ah School ge hall nulibumakee nihaayathah hithaama huri kameh. @EducationMV https://t.co/3Go4jtWsd1
— Shk Hassan M. Fikree (@HassanFikree) May 25, 2018
އެޑިއުކޭޝަން މިނިސްޓްރީން ދީނީ ކަންކަމަށް ހުރަސްއަޅަމުންދާކަން ފާހަގަކުރައްވައި ޝެއިޚް ޒައިދް ވިދާޅުވީ އިސްލާމީ ދައުވަތަކަށް ހުރަސްއަޅާނީ ލާދީނީ މީހުން ކަމަށެވެ. އެހެންކަމުން އެޑިޔުކޭޝަން މިނިސްޓްރީގައި ލާދީނީ މީހަކު ހުރި ނަމަ އެމީހަކު އެމިނިސްޓްރީން ދުރުކޮށް ދެއްވުމަށް ސަރުކާރަށް އޭނާ ގޮވާލެއްވިއެވެ. އަދި މިމައްސަލައަށް އަވަސް ހައްލެއް ލިބޭނެ ކަމަށް އުންމީދު ކުރައްވާ ކަމަށް ވެސް ޝެއިހް ޒައިދު ވިދާޅުވިއެވެ.
މިފަހަކަށް އައިސް ރާއްޖޭގެ ފުންނާބުއުސް އެތައް ޢިލްމުވެރިންނެއްގެ ދަރުސްތައް ބޭއްވުމަށް ރަށްރަށުގެ ސްކޫލްތައް ނުލިބުމުގެ ޝަކުވާ، އެބޭބޭފުޅުންގެ ފޭސްބުކް ޕޭޖުގައާއި ޓްވީޓާތަކުގައި ހާމަކުރައްވާފައިވެއެވެ. އަދި ދީނީ ކަންކަމަށް ފަރުވާތެރިވާ ކަމަށް ބުނަމުންދާ މިއަދުގެ ސަރުކާރުގެ އެޑިއުކޭޝަން މިނިސްޓްރީން މިފަދަ ދަށުދަރަޖައިގެ ޢަމަލެއް ހިންގުމަކީ އެއްގޮތަކަށް ވެސް ބަލައިގަނެވޭނޭ ކަމެއް ނޫންކަމަށް ޢިލްމުވެރިން ދަނީ ވިދާޅުވަމުންނެވެ.
ދީނީ ދަރުސްތަކަށް ހުރަސްއެޅުމާއި، ދީނީ އެކިއެކި ޙަރަކާތްތަކަށް ހުރަސްއެޅުމުގެ ސިޔާސަތެއް އެޑިއުކޭޝަން މިނިސްޓްރީއިން ގެންގުޅެމުން ދާތީ، އެކަމާ ކަންބޮޑުވުން ފާޅުކޮށް، އެއަމަލުތަކާއި ދެކޮޅަށް ނުކުތުމަށް ޖަމްޢިއްޔަތުއްސަލަފުން ވެސް ވަނީ ޚާއްސަ ބައްދަލުވުމެއް ބާއްވާ ދީނީ އިލްމުވެރިންގެ މެދުގައި މުހިންމު މަޝްވަރާތަކެއް ކޮށްފައެވެ.