ރާއްޖެޓީވީގެ ސީނިއަރ ވީޑިއޯ ޖާރނަލިސްޓް މުހައްމަދު ވިސާމާއި ހެޑް އޮފް ޕްރޮގްރާމްސް އެންޑް ކޯޑިނޭޝަން އާމިރު ސަލީމްގެ މައްޗަށް އިންޓަރނެޓް މެދުވެރިކޮށް ބިރުދެއްކި ކަމަށް ފުލުހުން ކުރި ތުހްމަތުގައި އެކަށީގެންވާ ހެއްކެތް ނެތް ކަމަށް އިއުތިރާފުވެ އެކަން އެ ދެމީހުންނަށް އަންގައިފި އެވެ.
ފުލުހުންގެ ޔުނިފޯމުގައި ތިބެ ސަރުކާރަށް އިންޒާރު ދޭ ވީޑިއޯއެއް އުފައްދައި ސޯޝަލް މީޑިއާއަށް އަޕްލޯޑްކުރީ ވިސާމް އާއި އާމިރު ކަމަށް ތުހްމަތުކޮށް އެ ދެ މީހުން ހައްޔަރުކޮށްފައިވެ އެވެ. މާޗް 16، 2018 ވަނަ ދުވަހުގެ ރޭ އެމީހުން ހައްޔަރުކޮށް ޖެހިގެން އައި ދުވަހު އެމީހުންގެ ބަންދު އިތުރު ކޮށް ދޭން ފުލުހުން ކްރިމިނަލް ކޯޓުގައި އެދުމުން އެމީހުންގެ ބަންދަށް 10 ދުވަސް އިތުރުކޮށް ދީފައިވެ އެވެ.
އެއްވެސް ހެއްކެއް ނެތި އެ ދެ ނޫސްވެރިން ހައްޔަރުކޮށް، ބަންދުގެ މުއްދަތު ޖަހާފައި އޭރު ވަނީ ހަމަ އެކަނި ފުލުހުންގެ އިންޓެލިޖެންސް ރިޕޯޓެއް އޮތް ކަމަށް ފުލުހުން ބުނުމުންނެވެ. ނަމަވެސް ދެ ވަނަ ފަހަރަށް ބަންދުގެ މުއްދަތު އިތުރުކޮށްދޭން ފުލުހުން އެދުމުން ކޯޓުން ވަނީ އެކަން ކޮށްދޭނެ ތަނެއް ނެތް ކަމަށްބުނެ އެ ދެމީހުން ދޫކޮށްލަން އަމުރު ކޮށްފަ އެވެ.
އަދި އޭގެ ފަހުން ބުދަ ދުވަހު އާމިރު އާއި ވިސާމް އަށް ފުލުހުން ފޮނުވާފައި ލިޔުމުގައި ވަނީ އެ ދެ މީހުންގެ މައްޗަށް ކުރި ތުހްމަތާ ގުޅިގެން އެކަށީގެންވާ ހެއްކެތް ނެތުމުން އެ މައްސަލަ މިހާރު ފައިލް ކޮށްފައިވާ ކަމަށެވެ.
މި ދެ ނޫސްވެރިންނާ އެކު ހަމަ މިމައްސަލާގައި ހައްޔަރު ކުރި އެމްޑީޕީގެ ގައުމީ މަޖިލީހުގެ ގަލޮޅު ދެކުނު ދާއިރާގެ ރައީސް އަދި މީޑިއާ ކޯޑިނޭޓަރު ހަސަން އިސްމާއީލް އެވެ. ނަމަވެސް އޭނާގެ ބަންދަށް އިތުރުކުރި ފަސް ދުވަހުގެ ބަންދުގެ މުއްދަތު ހަމަވުމުން، މުއްދަތު އިތުރުނުކޮށް، ކްރިމިނަލް ކޯޓުން ވަނީ އޭނާ ވެސް ދޫކޮށްލާފައެވެ.
ވިސާމާއި އާމިރު ހައްޔަރު ކުރީ، ރާއްޖެ ޓީވީއަކީ ޓެރަރިޒަމްގެ އަމަލުތަކަށް ހިތްވަރު ދޭ ސްޓޭޝަނެއް ކަމަށް ވެރިކަންކުރާ ޕާޓީ ޕީޕީއެމް ބުނެފައިވާ ދަނޑިވަޅެއްގައެވެ. އަދި ރާއްޖެ ޓީވީ ނައްތާލުމަށް ވެސް ގޮވާލާފައި ވަނިކޮށެވެ.
ވިސާމް އާއި އާމިރު ހައްޔަރު ކުރީ އެއްވެސް ހެއްކެތް ނެތި ކަމަށް ރާއްޖެޓީވީން އެންމެ ފުރަތަމަ ދުވަހުން ފެށިގެން ވެސް ދިޔައީ ބުނަމުންނެވެ.
