ޕްރައިމަރީއަށް ނުފޫޒު ނުފޯރުވަން އެމްޑީޕީއިން އިލެކްޝަންސްއަށް އަންގައިފި!
23 މެއި 2018 | ބުދަ 14:25ކެންޑިޑެސީއާއިމެދު ގޮތެއް ނިންމުމުގެ ބާރު އިލެކްޝަންސް ކޮމިޝަނަކަށް ނެތް
ރައީސް ނަޝީދު ޕްރައިމަރީގައި ވާދަކުރައްވަން ފޯމު ފުރުއްވަނީ
މިމަހުގެ 30 ވަނަ ދުވަހު ބާއްވާ އެމްޑީޕީގެ ރިޔާސީ ޕްރައިމަރީއަށް ނުފޫޒު ނުފޯރުވަން އެޕާޓީއިން އިލެކްޝަންސް ކޮމިޝަނަށް އަންގައިފިއެވެ.
އެމްޑީޕީގެ ރިޔާސީ ޕްރައިމަރީގައި ކުރީގެ ރައީސް މުހައްމަދު ނަޝީދަށް ވާދަކުރަން ފުރުސަތު ދީފިނަމަ އެމްޑީޕީ އުވާލާނެކަމުގެ އިންޒާރުދީ، އިލެކްޝަންސް ކޮމިޝަނުން ފޮނުވި ސިޓީގެ ޖަވާބުގައި އެމްޑީޕީގެ ޑެޕިއުޓީ ސެކްރެޓަރީ ޖެނެރަލް އަފްޝަން ލަތީފް ސޮއެކުރައްވައި އެމްޑީޕީއިން ފޮނުވި ސިޓީގައި ވަނީ އެޕާޓީއާއި ދޭތެރޭ ފިޔަވަޅު އެޅުމަށް އިލެކްޝަންސް ކޮމިޝަނުން ކުރަމުންދާ މަސައްކަތަކީ ކަނޑައެޅިިގެން ޤާނޫނާއި ޚިލާފް އަމަލުތަކެއްކަމަށް ސިފަކޮށްފައެވެ. އެހެންކަމުން އެކަން ކުރުން ހުއްޓުމަށް އިލެކްޝަންސް ކޮމިޝަނަށް އިލްތިމާސްކުރާކަމަށް އެމްޑީޕީގެ ސިޓީގައިވެއެވެ.
އެމްޑީޕީގެ ސިޓީގައި ރައީސް ނަޝީދަށް އެމްޑީޕީގެ ރިޔާސީ ޕްރައިމަރީގައި ވާދަކުރުމުގެ ފުރުސަތު ލިބިދޭ ނުކުތާއެއް ފާހަގަކޮށްފައިވެއެވެ.
އެގޮތުން ކެންޑިޑޭޓެއްގެ ކެންޑިޑެސީއާއި މެދު ސުވާލު އުފެދިއްޖެނަމަ އެމައްސަލައިގައި ގޮތެއް ނިންމާނީ ސުޕްރީމް ކޯޓުގެ 5 ފަނޑިޔާރުންގެ މައްޗަށް އެކުލެވޭ ފުލް ބެންޗުންކަމަށް ޤާނޫނުގައި ބުނެފައިވާތީ، އެބާރަކީ އިލެކްޝަންސް ކޮމިޝަނަށް ލިބިގެން ނުވާ، އަދި ހަމައެކަނި ދިވެހިރާއްޖޭގެ ސުޕްރީމް ކޯޓުގެ ފުލް ބެންޗަށް އެކަނި ލިބިގެންވާ ބާރެއްކަމަށްވާތީ، އެމައްސަލައިގައި އިލެކްޝަންސް ކޮމިޝަނަށް ކެންޑިޑޭޓެއްގެ ކެންޑިޑެސީއާއި މެދު ސުވާލު އުފެއްދުމުގެ ފުރުސަތު ނޯންނާނެކަމަށް އެމްޑީޕީއިން ފާހަގަކުރެއެވެ.
އަދި ރައީސް ނަޝީދުގެ ޤާނޫނީ ހައްޤެއް ނިގުޅައިގަންނަން އިލެކްޝަންސް ކޮމިޝަނުން މަސައްކަތްކުރަމުންދަނީ ޤާނޫނު އަސާސީގެ އެތައް މާއްދާތަކާއި ޚިލާފަށްކަމަށް އެމްޑީޕީއިން ފާހަގަކުރެއެވެ.
މީގެ އިތުރުން ރައީސް ނަޝީދަށް އިންތިޚާބުގައި ވާދަކުރުމުގެ ފުރުސަތު ލިބިދޭން ޖެހޭކަމަށާއި، އެމަނިކުފާނުގެ މައްޗަށް ކުރެވުނު ޝަރީޢަތަކީ އިންސާފުން އެއްކިބާވެގެން ކުރެވުނު ޝަރީޢަތެއްކަމަށް އދގެ ވޯކިންގ ގްރޫޕް އޮން އާބިޓްރަރީ ޑިޓެންޝަނުންނާއި، އދގެ ހިއުމަން ރައިޓްސް ކޮމިޓީއިން ނިންމާފައިވާތީ، އެއަށް ރާއްޖެއިން އިހްތިރާމްކުރަން ޖެހޭކަމަށް އެމްޑީޕީއިން ފާހަގަކުރިއެވެ. ސަބަބަކީ ރާއްޖެއަކީ ބައިނަލްއަޤްވާމީ މުޢާހަދާތަކުގައި ސޮއެއްކޮށްފައިވާ ޤައުމަކަށްވެފައި، އެމުޢަހަދާތަކުގެ ދަށުން ނިންމާ ނިންމުންތަކަށް އިހްތިރާމްކުރުމަކީ ރާއްޖޭގެ މައްޗަށް ލާޒިމްކަމަކަށް ވާތީއެވެ.
ހަމަމިއާއެކު، ސުޕްރީމް ކޯޓުން 1 ފެބްރުއަރީގައި ނެރުނު އަމުރުގައި ކުރީގެ ރައީސް މުހައްމަދު ނަޝީދުގެ މައްޗަށް އިއްވުނު ހުކުމް ބާތިލްކޮށް، އެމަނިކުފާނު މިނިވަންކުރަން އަމުރުކޮށްފައިވާތީ، ރައީސް ނަޝީދަށް އިންތިޚާބުގައި ވާދަކުރުމަށް އެއްވެސް ހުރަހެއް ނެތްކަމަށް އެމްޑީޕީއިން ބުންޏެެވެ.
އެމްޑީޕީއިން އިލެކްޝަންސް ކޮމިޝަނަށް ފޮނުވާފައިވާ ސިޓީގައި ބުނެފައިވަނީ އެޕާޓީގެ ރިޔާސީ ޕްރައިމަރީ ކުރިއަށް ގެންދަނީ ސިޔާސީ ޕާޓީތަކުގެ ޤާނޫނުގެ 17 ވަނަ މާއްދާގައި ވާ ގޮތުގެ މަތިން އެޕާޓީގެ އަސާސީ ޤަވާޢިދާއި އެއްގޮތަށްކަމަށެވެ. އެހެންކަމުން އިލެކްޝަންސް ކޮމިޝަނުން އެމްޑީޕީގެ އެތެރޭގެ އިންތިޚާބުތަކަށް ނުފޫޒު ފޯރުވަން ކުރާ މަސައްކަތްތައް ހުއްޓާލުމަށް ދަންނަވާކަމަށް އެޕާޓީގެ ސިޓީގައިވެއެވެ.
