ހާޝިމް ހައްޔަރުކުރީ ފުލުހުންގެ އިހުމާލުން 5000 ޑޮލަރު ގެއްލުނު ކަމަށްބުނެ މައްސަލައެއް ހުށަހަޅާފައި ވަނިކޮށް
އެފައިސާ ހުރީ އަލީ ހާޝިމްގެ ކޮޓަރިކޮޅުގައި
އަލީ ހާޝިމް މެޑަމް ފާތުންއާ ސަލާމް ކުރައްވަނީ
ދިއްދޫ ކައުންސިލްގެ ރައީސް އަލީ ޙާޝިމް ހައްޔަރުކޮށްފައި ވަނީ އޭނާގެ ވަތްގަނޑެއްގައި ބަހައްޓާފައި ހުރި އޭނާގެ 5000 ޑޮލަރު ފުލުހުންގެ އިހުމާލުން ގެއްލިފައިވާ ކަމަށް ބުނެ މައްސަލައެއް ހުށަހަޅާފައި ވަނިކޮށް ކަމަށް ރާއްޖެ އެމްވީއަށް އެނގިއްޖެއެވެ.
ރާއްޖެ އެމްވީއަށް މައުލޫމާތު ދެއްވަމުން ކައުންސިލްގެ މެންބަރަކު ވިދާޅުވީ ދިއްދޫ ކައުންސިލްގެ އިދާރާ ފުލުހުން ވަދެ ޗެކް ކުރިއިރު ކައުންސިލްގެ ރައީސްގެ ކޮޓަރިކޮޅު ޗެކްކުރީ ރައީސްގެ ޣައިރު ހާޒިރުގައި ކަމަށާއި އޭރު ކައުންސިލް ރައީސްގެ ކަބަޑެއްގެ ވަތްގަނޑުގައި 5000 ޑޮލަރު ހުންނާނެ ކަމަށް ރައީސް ވިދާޅުވިކަމަށެވެ. އެއީ ކައުންސިލްގެ ރައީސް އަމިއްލަ ކަމަކު ރާއްޖެއިން ބޭރަށް ވަޑައިގަތުމަށްޓަކައި އެދުވަހު ގެނެސް އޮފީހުގައި ބަހައްޓާފައި ހުރި އޭނާގެ އަމިއްލަ ފައިސާ ކަމަށް ކައުންސިލް މެމްބަރު ވިދޅާުވި އެވެ.
އެފައިސާ ނެތްކަން އެނގިވަޑައިގަތީ އޮފީސް ޗެކްކުރުމަށްފަހު ކައުންސިލްގެ ރައީސާއި އެހެން މެންބަރުން ސަސްޕެންޑް ކުރުމަށްފަހު އެސަސްޕެންޝަންގެ މުއްދަތު ހަމަވުމުން އޮފީހަށް ނިކުންނެވުމުންނެވެ.
ރާއްޖެ އެމްވީއަށް މައުލޫމާތު ދެއްވި ކައުންސިލް މެންބަރު ވިދާޅުވީ އެފައިސާ ނެތްކަން އެނގުމުން ދިއްދޫ ފުލުހުންނަށް ރަސްމީކޮށް އެމައްސަލަ ހުށަހަޅާފައިވާ ކަމަށް ކައުންސިލްގެ ރައީސް ވިދާޅުވެފައިވާ ކަމަށެވެ.
މީގެ ދެތިން ދުވަސްކުރިން އެމައްސަލަ ފުލުހުންނަށް ހުށަހަޅާފައިވަނިކޮށް ކައުންސިލްގެ ރައީސް ޢަލީ ހާޝިމް ފުލުހުން ހައްޔަރުކޮށްފައިވަނީ އަންގާރަ ދުވަހުގެ ރޭ މެންދަމު އޭނާ ދިރިއުޅުއްވާ ގެ، ހއ. ދިއްދޫ ބުރުނީވިލާ ބަލައި ފާސްކުރުމަށް ފަހުއެވެ. ހާޝިމް ދިރިއުޅުއްވާ ގެ ބަލާ ފާސްކުރުމަށް ފުލުހުން ގެންދިޔަ ކޯޓު އަމުރުގައިވަނީ ގެ ބަލާ ފާސްކުރަނީ ސައްހަ ނޫން ލިޔެކިޔުންތަކެއް ހުރިކަމަށް ތުހުމަތުކުރެވޭ މައްސަލައެއްގައި ކަމަށެވެ.
ރާއްޖެ އެމްވީއަށް މައުލޫމާތު ދެއްވި ކައުނސިލް މެންބަރު ވިދާޅުވީ ސައްޙަ ނޫން ލިޔެކިޔުންތަކެއްކަމަށް ފުލުހުން އެބުނާ ލިޔެކިޔުންތަކަކީ ފެބްރުއަރީގައި ސުޕްރީމް ކޯޓުގެ 5 ފަނޑިޔާރުން ނެރުނު އަމުރު ތަންފީޒް ނުކުރުމާ ގުޅިގެން ކައުންސިލުން ނެރެފައިވާ ނޫސްބަޔާންކަމަށް ބެލެވޭކަމަށެވެ. އެމައްސަލައިގައި ކައުންސިލަށް ފިޔަވަޅު އަޅާފައިވާއިރު ކައުންސިލްގެ އެހެން ބައެއް މެންބަރުންވެސް ވަނީ ފުލުސް އޮފީހަށް ހާޒިރުކޮށްފައެވެ.
މިކަމާ ގުޅޭ ގޮތުން ފުލުހުންގެ ބަހެއް ނުލިބެ އެވެ.
