ބިން ވިއްކޭ ގޮތަށް ޤާނޫނު އަސާސީއަށް ގެނައި އިސްލާހް ބަދަލު ކުރާނަން:ރައީސް ނަޝީދު

ރާއްޖޭގެ ޤާނޫނު އަސާސީއަށް އިސްލާހު ގެނެސްގެން ރާއްޖެއިން ބިން ވިއްކޭ ގޮތަށް ކަނޑައަޅާފައިވާ ކަނޑައެޅުން ބަދަލުކޮށް އެގޮތަށް ބިންވިއްކުން ހުއްޓުވާނެ ކަމަށް ކުރީގެ ރައީސް މުހައްމަދު ނަޝީދު ވިދާޅުވެއްޖެއެވެ.

ޖަޒީރާ ރައީސްގެ ގޮތުގައި އެމްޑީޕީގެ ރިޔާސީ ޕްރައިމަރީއަށް ވާދަ ކުރައްވާ ކެމްޕެއިންގެ ތެރެއިން ސްކައިޕް މެދުވެރިކޮށް ޒުވާނުންނާ ބައްދަލު ކުރައްވާ ރައީސް ނަޝީދު ވިދާޅުވީ ބޭރުމީހުންނަށް ބިން މިލްކުރެވޭގޮތަށް ޤާނޫން އަސާސީއަށް ގެނެސްފައިވާ އިސްލާހު އަލުން އަނބުރާ ބަދަލުކުރައްވާނެ ކަމަށެވެ.

Advertisement

އެބައްދަލުވުމުގައި ބައިވެރިވި ޒުވާނަކު "ބޭރު މީހުންނަށް ބިންވިއްކޭ ގޮތަށް ޤާނޫނު އަސާސީއަށް ގެނައި ބަދަލާ ގުޅޭގޮތުން އިތުރު ކަމެއް ކުރައްވާނަންތޯ" ކުރި ސުވާލަކަށް ޖަވާބު ދެއްވަމުން ޖަޒީރާ ރައީސް ވިދާޅުވީ އެމަނިކުފާނުގެ ސަރުކާރެއްގައި އެކަން އަލުން އަނބުރާ ބަދަލު ކުރައްވާނަން ކަމަށެވެ.

"އަލުން އަނބުރާ ބަދަލު ކުރާނަން. އެކަމަކު މީހަކު ސެކަންޑް ހޯމެއް ހޯދަން ރާއްޖެއިން ބޭނުންވީމާ މިލްކު ނުކުރެވޭ ގޮތަށް ދިގުމުއްދަތައް ބިމެއް ގަނެވޭގޮތަށް ފެސިލިޓޭޓް ކުރެވެން ޖެހޭނެ ކަމަށް ދެކެން." ރައީސް ނަޝީދު ވިދާޅުވިއެވެ.

ޗައިނާއިން ދުނިޔޭގެ ޤައުމުތަކުގެ ބިންތަކަށް ބާރުގަދަ ކުރާ ކުރުމަށް އިޝާރާތް ކުރައްވާ ނަޝީދު ވިދާޅުވީ ހުޅުލެއާ މާލެއާ ދެމެދު އަޅާ ބްރިޖްގެ ސަބަބުން ވެސް އާޚިރުގައި އެބްރިޖްގެ ހިއްސާ ޗައިނާއަށް ދޫކޮށްލަން ޖެހިދާނެ ކަމަށެވެ.

ރައީސް ނަޝީދު ވިދާޅުވީ ބްރިޖަކީ 100 މިލިއަން ޑޮލަރު ކަމަށާއި ބްރިޖް އަޅަމުންދަނީ 300 މިލިއަން ޑޮލަރަށް ކަމަށެވެ.

"ބްރިޖް އެޅީ 300 މިލިއަން ޑޮލަރޭ ބުނެފަ. އަސްލު ޚަރަދު ކުރީ 100 މިލިއަން ޑޮލަރު. އެގްޒިމް ބޭންކުންދިނީ ވެސް 100 މިލިއަން ޑޮލަރު. އެކަމަކު ސޮވެރިން ގެރެންޓީ ދިނީ 300 މިލިއަން ޑޮލަރަށް. އަނެއްކާ ޕްރޮޖެކްޓް ވެލިއުއަކީ ވެސް 300 މިލިއަނޭ މިމީހުން ބުނީ. އެއީ ޗައިނާ ކުންފުންޏަކުން ޕްރޮޖެކްޓް ހަދަނީ. ދެން އެބްރިޖްގެ ލޯނު ނުދެއްކުނީމާ އެމީހުން އައިސް ބުނާނެ ތިމަންނާމެންނަށް ދޭށޭ ބްރިޖްގެ އޮޕަރޭޝަން.ޝެއަރއެއް ދޭށޭ ބްރިޖުން. ދެން އަޅުގަނޑުމެން ދޫކޮށްލާނީ ބްރިޖްގެ ޝެއަރއެއް. އޭރުން އެދޫކޮށްލެވެނީ ބިން." ރައީސް ނަޝީދު ވިދާޅުވިއެވެ.