އިލެކްޝަންސް ކޮމިޝަންގެ އިއުލާނަކީ ޣައިރު ޤާނޫނީ ހާސަރެއް: ރައީސް ނަޝީދު

ކުށެއް ސާބިތުވެފައިވާ އެއްވެސް މީހަކަށް ސިޔާސީ ޕާޓީއެއްގެ ރިޔާސީ ޕްރައިމަރީގައި ވާދަ ނުކުރެވޭނެ ކަމަށް ބުނެ އިލެކްޝަންސް ކޮމިޝަނުން އާންމުކުރި އިއުލާންއަކީ ޣައިރު ޤާނޫނީ ހާސަރެއް ކަމަށް ވިދާޅުވެ، ކުރީގެ ރައީސުލްޖުމްހޫރިއްޔާ މުހައްމަދު ނަޝީދު އިލެކްޝަންސް ކޮމިޝަނަށް ފާޑު ވިދާޅުވެއްޖެ އެވެ.

އެމްޑީޕީގެ ރައީސްކަންވެސް ކުރައްވާ މުހައްމަދު ނަޝީދު ވަނީ ކުރިއަށް އޮތް އެމްޑީޕީގެ ރިޔާސީ ޕްރައިމަރީގައި ވާދަކުރައްވާނެކަން އިއުލާންކޮށް، ބޮޑު ތާއިދަކާއެކު ފޯމްވެސް ހުށައަޅުއްވާފަ އެވެ. އެމަނިކުފާނު ރިޔާސީ ޕްރައިމަރީގައި ވާދަކުރެއްވުމަށް ފޯމް ހުށައެޅިތާ އެއް ދުވަސްފަހުން އިލެކްޝަންސް ކޮމިޝަނުން އާދިއްތަ ދުވަހުކުރި އާންމު އިއުލާނެއްގައި ބުނެފައިވަނީ ގާނޫނާއި ގަވާއިދާ ޚިލާފަށް ބާއްވާ ޕްރައިމަރީތައް ބާތިލްކުރާނެ ކަމަށެވެ. ކުށެއް ސާބިތުވެފައިވާ އެއްވެސް މީހަކަށް ސިޔާސީ ޕާޓީއެއްގެ ރިޔާސީ ޕްރައިމަރީގައި ވާދަ ނުކުރެވޭނެ ކަމަށްވެސް އެ އިއުލާންގައި ބުނެފައިވެއެވެ.

އިލެކްޝަންސް ކޮމިޝަންގެ އެ އިއުލާނާއި ގުޅޭ ގޮތުން ރައީސް ނަޝީދު އާދިއްތަ ދުވަހުގެ ރޭ ކުރެއްވި ޓުވީޓެއްގައި ވިދާޅުވީ ރިޔާސީ ކެނޑިޑޭޓުންގެ ޝަރުތާއި ގުޅޭ ގޮތުން ގޮތް ނިންމާންޖެހޭނީ ހުރިހާ ފަނޑިޔާރުން ހާޒިރުވެ ތިއްބަވާ ފުރިހަމަ ސުޕްރީމް ކޯޓަކުން ކަމަށެވެ. އަދި އިލެކްޝަންސް ކޮމިޝަންގެ އިއުލާނަކީ ޢައިރު ޤާނޫނީ ހާސަރެއްކަމަށް ރައީސް ނަޝީދު ވިދާޅުވި އެވެ.

ރައީސް ނަޝީދު އިޝާރަތްކުރައްވާފައި އެވަނީ ޤާނޫނު އަސާސީގެ 113 ވަނަ މާއްދާއަށެވެ. ޤާނޫނު އަސާސީގެ 113 ވަނަ މާއްދާގައި ބުނެފައިވަނީ ރައީސުލްޖުމްހޫރިއްޔާކަމުގެ މަޤާމަށް ކުރިމަތިލާ މީހެއްގައި ނުވަތަ ރައީސުލްޖުމްހޫރިއްޔާގެ ނައިބަކަށް ހުންނާނެކަމަށް އިއުލާންކުރެވޭ މީހެއްގައި ހުންނަންޖެހޭ ޝަރުތުތައް ފުރިހަމަވާކަމާއިމެދު ގޮތެއް ނިންމުމުގެ ބާރުލިބިގެންވަނީ ހަމައެކަނި ސުޕްރީމް ކޯޓަށް ކަމަށެވެ. އެފަދަ ނިންމުމެއް ސުޕްރީމް ކޯޓުން ނިންމާވާނީ އެ ކޯޓުގައި ހިމެނޭ ހުރިހާ ފަނޑިޔާރުން ތިބެގެންކަމާއި، އެ ކޯޓުން ނިންމާ ނިންމުމަކީ އެންމެ ފަހުގެ ނިންމުންކަމަށް ޤާނޫނު އަސާސީގެ 113 ވަނަ މާއްދާގައި ބުނެފައިވެއެވެ.

ކުރީގެ ރައީސް މުހައްމަދު ނަޝީދުގެ މައްޗަށް 13 އަހަރުގެ ޖަލު ހުކުމެއް އިއްވި ނަމަވެސް އެމަނިކުފާނުގެ މައްޗަށް އިއްވި ހުކުމް ސުޕްރީމް ކޯޓުން ވަނީ 1 ފެބުރުއަރީގައި ބާތިލްކޮށްފަ އެވެ. އޭގެ ފަހުން އެމްއެންޑީއެފްއިން ސުޕްރީމް ކޯޓް ހިސޯރުކުރުމަށްފަހު ނެރުނު އަމުރަކުން 1 ފެބުރުއަރީގެ އަމުރުގައިވާ އެބައި ބާތިލްކަމަށް ވަނީ ކަނޑައަޅާފައެވެ.